പാർലമെന്‍റിൽ 'വിലക്കയറ്റം' കത്തിക്കയറവെ രണ്ട്​ ലക്ഷത്തിന്‍റെ ബാഗ്​ ഒളിപ്പിച്ച്​ മഹുവ മൊയ്​ത്ര VIDEO

ന്യൂഡൽഹി: പാർലമെന്‍റിൽ ചടുലമായ ഭാഷയിൽ ബി.ജെ.പിയെയും ഹിന്ദുത്വ ശക്​തികളെയും വെള്ളം കുടിപ്പിക്കുന്ന അംഗമാണ്​ പശ്ചിമ ബംഗാളിൽനിന്നുള്ള തൃണമൂൽ കോൺഗ്രസ്​ എം.പി മഹുവ മൊയ്​ത്ര. മഹുവയുടെ ഓരോ ​പാർലമെന്‍റ്​ പ്രസംഗങ്ങളും സമൂഹമാധ്യമങ്ങളിൽ വൈറലാണ്​. തെളിഞ്ഞ ഇംഗ്ലീഷിൽ യുക്​തിസഹമായി കാര്യങ്ങൾ വിവരിച്ച്​ അവർ പലപ്പോഴും ബി.ജെ.പിയുടെ വമ്പൻമാരെ വരെ മുട്ടുകുത്തിക്കാറുമുണ്ട്​. ഇപ്പോൾ ലോക്​സഭയിൽനിന്നുള്ള ഒരു വീഡിയോ തീവ്ര വലതുപക്ഷം മഹുവയെ പഴിക്കുന്നതിനായി വ്യാപകമായി ഉപയോഗിക്കുകയാണ്​.

വിലക്കയറ്റവും പണപ്പെരുപ്പവും ചർച്ച ചെയ്യുന്ന അവസരത്തിൽ ത​െന്‍റ രണ്ട്​ ലക്ഷം രൂപ വിലവരുന്ന ലൂയിസ്​ വിറ്റൺ ബാഗ്​ മഹുവ ഒളിപ്പിക്കാൻ ശ്രമിക്കുന്നു എന്ന പേരിലാണ്​ ദൃശ്യങ്ങൾ പ്രചരിക്കുന്നത്​. എന്നാൽ, ഇതിനോട്​ എം.പി ഇതുവരെയും പ്രതികരിച്ചിട്ടില്ല. തൃണമൂൽ കോൺഗ്രസിന്റെ കക്കോലി ഘോഷ് ദസ്തിദാർ ലോക്‌സഭയിൽ സംസാരിക്കുന്നതും മൊയ്ത്ര അവരുടെ തൊട്ടടുത്ത് ഇരിക്കുന്നതും സോഷ്യൽ മീഡിയയിൽ പുറത്തുവന്ന ഒരു വീഡിയോയിൽ കാണാം.

@MahuaMoitra hiding her $2500 ( 2,00,000) louis vuitton bag during price rise debate..😂😂@PoliticalKida @ARanganathan72 @smitadeshmukh @Spoof_Junkey @delhichatter @ pic.twitter.com/D82a9ph2HM

— JaiShriRam ©️ (@thesaviour78) August 1, 2022

വിലക്കയറ്റത്തിന്റെ പ്രശ്നം ദസ്തിദാർ ഉന്നയിച്ചയുടനെ മൊയ്ത്ര, പെട്ടെന്ന് തന്റെ ലൂയിസ് വിറ്റൺ ബാഗ് മേശയ്ക്കടിയിലേക്ക് തള്ളി. അജിത് ദത്തയാണ് വീഡിയോ ട്വിറ്ററിൽ പങ്കുവെച്ചത്. "മെഹെംഗായി-വിലക്കയറ്റം" എന്ന വിഷയം ഉയർന്നുവരുമ്പോൾ, ഒരാളുടെ ലൂയിസ് വിറ്റൺ ബാഗ് പെട്ടെന്ന് ബെഞ്ചിനടിയിലേക്ക് തെന്നിമാറുന്നു," -ഈ അടിക്കുറിപ്പോടെ അദ്ദേഹം വീഡിയോ പങ്കിട്ടു.

ഇത്​ പിന്നീട്​ സമൂഹമാധ്യമങ്ങളിൽ വൻ ചർച്ചകൾക്ക്​ വഴിവെച്ചു. തീവ്ര ഹിന്ദുത്വ പ്രൊഫൈലുകളാണ്​ മഹുവക്കെതിരെ വീഡിയോ വ്യാപകമായി പ്രചരിപ്പിക്കുന്നത്​. മഹുവക്ക്​ കിട്ടിയ വൻതിരിച്ചടിയാണ്​ ഈ വീഡിയോ എന്ന്​ അവർ അവകാശപ്പെടുന്നു.