ആനയുടെ ആക്രമണത്തിൽ പാപ്പാനും ബന്ധുവും മരിച്ചു

നാഗർകോവിൽ: തമിഴ്നാട് തിരുച്ചെന്തൂരിൽ ആനയുടെ ആക്രമണത്തിൽ പാപ്പാനും ബന്ധുവും കൊല്ലപ്പെട്ടു. തിരുച്ചെന്തൂർ മുരുകൻ ക്ഷേത്രത്തിൽ ക്ഷേത്രാവശ്യങ്ങൾക്ക് ഉപയോഗിക്കുന്ന പിടിയാനയുടെ ആക്രമണത്തിൽ പാപ്പാൻ പളുകൽ സ്വദേശി ഉദയകുമാർ (45), ഇദ്ദേഹത്തിൻ്റെ ബന്ധു ശിശുപാലൻ (55) എന്നിവരാണ് മരിച്ചത്. തിങ്കളാഴ്ച വൈകീട്ട് മൂന്നരയോടെ ആണ് സംഭവം.

ക്ഷേത്രത്തിലെ വിലാസ മണ്ഡപത്തിൽ നിന്നിരുന്ന ദൈവാനൈ എന്ന പിടിയാനയ്ക്ക് ആഹാരം കൊടുക്കുന്നതിനിടയിലാണ് സംഭവം. ആന പ്രകോപിതയായി ഇരുവരെയും ആക്രമിക്കുകയായിരുന്നു. ഇതിൽ ശിശുപാലൻ സംഭവസ്ഥലത്തും ഉദയകുമാർ ആശുപത്രിയിലുമാണ് മരിച്ചത്.