‘ജയ് ​ശ്രീറാം’ വിളിക്കാനാവശ്യപ്പെട്ട്​ ആൾക്കൂട്ടം മർദിച്ചെന്ന്​ യുവാവിന്റെ പരാതി

മുംബൈ: ട്രെയിനിൽവെച്ചും വീടിനടുത്തുവെച്ചും ‘ജയ് ​ശ്രീറാം’ വിളിക്കാൻ ആവശ്യപ്പെട്ട്​ സംഘ്​പരിവാർ ബന്ധമുള്ളവർ തന്നെയും കുടുംബത്തെയും ആക്രമിച്ചതായി മുസ്​ലിം യുവാവിന്റെ പരാതി. രണ്ടു തവണ പരാതി നൽകിയിട്ടും കേസെടുക്കാത്ത പൊലീസ്,​ ആക്രമിച്ചവരുടെ പരാതിയിൽ തനിക്കെതിരെ രണ്ടു തവണ കേസെടുത്തെന്നും മഹാരാഷ്ട്രയിലെ കങ്കവലി സ്വദേശി ആസിഫ്​ ശൈഖ്​ ആരോപിച്ചു.

ജനുവരി 19ന്​ കങ്കവലിയിൽനിന്ന്​ ഭാര്യക്കും മകൾക്കുമൊപ്പം മുംബൈക്കു​ വരുമ്പോഴാണ്​ ആദ്യ സംഭവം. ട്രെയിനിൽ ഇവർ യാത്രചെയ്ത കമ്പാർട്മെന്റിലുണ്ടായിരുന്ന 30ഓളം വിദ്യാർഥികൾ യാത്രക്കാരോട്​ ‘ജയ് ​ശ്രീറാം’ വിളിക്കാൻ ആവശ്യപ്പെട്ടു. പർദ ധരിച്ച തന്റെ ഭാര്യയോടും ആവശ്യപ്പെട്ടു. ഇത്​ ചോദ്യംചെയ്തതിന്​ വിദ്യാർഥികൾ മർദിക്കുകയായിരുന്നു. മകളുടെ ദേഹത്ത്​ ചൂടുള്ള ചായ ഒഴിച്ചതോടെ പൻവേൽ റെയിൽവേ പൊലീസിൽ പരാതി നൽകി. എന്നാൽ, കേസെടുത്തില്ല. മോശമായി പെരുമാറിയെന്നാരോപിച്ച്​ ആക്രമിച്ച കൂട്ടത്തിലെ സ്ത്രീ നൽകിയ പരാതിയിൽ തനിക്കെതിരെ കേസെടുക്കുകയും ചെയ്തു.

പിന്നീട്​ കേസ്​ കങ്കവലി സ്​റ്റേഷനിലേക്കു​ മാറ്റി. ജനുവരി 24ന്​ അവിടെ ചെല്ലാനും പൻവേൽ പൊലീസ്​ ആവശ്യപ്പെട്ടു. കങ്കവലി പൊലീസ്​ സ്​റ്റേഷനിലെത്തിയപ്പോൾ അവിടെ ആളുകൾ തടിച്ചുകൂടിയിരുന്നു. സ്​റ്റേഷനിൽ കാത്തുനിന്ന ബി.ജെ.പി നേതാവ്​ പരാതി പിൻവലിക്കാൻ ആവശ്യപ്പെടുകയും ഭീഷണിപ്പെടുത്തുകയും ചെയ്തു. അവിടെനിന്ന്​ പൊലീസാണ്​ വീട്ടിൽ കൊണ്ടുവിട്ടത്​. വീടിനു മുന്നിലും ആളുകൾ കൂടിയിരുന്നു. അതിലൊരാൾ നേതാവ്​ പറഞ്ഞിട്ടും ജയ്​ ശ്രീറാം വിളിക്കില്ലേ എന്ന്​ ചോദിച്ച്​ പിറകിൽനിന്ന്​ വടികൊണ്ട്​ അടിച്ചു. പൊലീസ്​ നോക്കിനിന്നതേയുള്ളൂ. ഈ സംഭവത്തിലും പരാതി നൽകി. പൊലീസ്​ സാക്ഷിയായിട്ടും സംഭവത്തിന്റെ വിഡിയോ വൈറലായിട്ടും കേസെടുത്തില്ല. പകരം ആക്രമിച്ചവരിൽ ഒരാളുടെ പരാതിയിൽ പൊലീസ്​ തനിക്കെതിരെ കേസെടുക്കുകയായിരുന്നുവെന്നും ആസിഫ്​ ശൈഖ്​ ആരോപിച്ചു.