മഹാരാഷ്​ട്ര ലോക്​ഡൗണിലേക്ക്​; തീരുമാനം ബുധനാഴ്ചക്ക്​ ശേഷം

മുംബൈ: കോവിഡ്​ വ്യാപനം അതിരൂക്ഷമാകുന്ന സാഹചര്യത്തിൽ മഹാരാഷ്​ട്ര വീണ്ടും അടച്ചിടലിലേക്ക്​ നീങ്ങുന്നു. ലോക്​ഡൗൺ സംബന്ധിച്ച തീരുമാനം ബുധനാഴ്ചക്ക്​ ശേഷം കൈാകൊള്ളുമെന്ന്​ ആരോഗ്യമന്ത്രി രാജേഷ്​ ടോപെ പറഞ്ഞു.

വൈറസ്​ വ്യാപനം തടയുന്നതിനാവശ്യമായ കാര്യങ്ങൾ കൈകൊള്ളുന്നതിനും ലോക്​ഡൗൺ സംബന്ധിച്ച തീരുമാനമടുക്കുന്നതിനുമായി സംഘടിപ്പിച്ച കോവിഡ്​ 19 ടാസ്​ക്​ ഫോഴ്​സിന്‍റെ യോഗത്തിന്​ ശേഷം മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം. മുഖ്യമന്ത്രി ഉദ്ദവ്​ താക്കറെയാണ്​ ഓൺലൈൻ യോഗത്തിന്​ അധ്യക്ഷത വഹിച്ചത്​.

'ലോക്​ഡൗൺ കാലാവധിയും അത്​ കാരണമുണ്ടാകുന്ന സാമ്പത്തിക തകർച്ചയും എങ്ങനെ കൈകാര്യം ചെയ്യാമെന്നും യോഗത്തിൽ ചർച്ച ചെയ്തു. സംസ്ഥാനത്തെ നിലവിലെ സാഹചര്യം പരിശോധിക്കു​േമ്പാൾ ലോക്​ഡൗൺ ആവശ്യമാണെന്നാണ്​ ടാസ്‌ക് ഫോഴ്‌സിന്‍റെ അഭിപ്രായം' -മന്ത്രി പറഞ്ഞു. സംസ്​ഥാനത്ത്​ ഓക്​സിജൻ ജനറേഷൻ പ്ലാന്‍റ്​ സ്​ഥാപിക്കുന്നത്​ സംബന്ധിച്ച്​ ചർച്ചകൾ നടന്നതായി ടോപെ പറഞ്ഞു.

ധനകാര്യ വകുപ്പുമായും മറ്റ്​ വകുപ്പുകളുമായും മുഖ്യമന്ത്രി ഇന്ന്​ ചർച്ച നടത്തുന്നുണ്ട്​. ഈ ആഴ്ച തന്നെ നടക്കുന്ന കാബിനറ്റ്​ യോഗത്തിലും കൂടുതൽ ചർച്ചകൾ നടക്കും.

സംസ്​ഥാനത്ത്​ കോവിഡ്​ രോഗികളുടെ എണ്ണം ഗണ്യമായി വർധിക്കുന്നതിന്‍റെ അടിസ്​ഥാനത്തിൽ ലോക്​ഡൗണിലേക്ക്​ നീങ്ങുകയാണെന്ന്​ താക്കറെ ശനിയാഴ്ച സൂചന നൽകിയിരുന്നു. കോവിഡ്​ സാഹചര്യത്തിൽ സംസ്​ഥാനത്ത്​ ഏർപ്പെടുത്തിയ രാത്രികാല കർഫ്യൂ അടക്കമുള്ള നിയന്ത്രണങ്ങൾ ഏപ്രിൽ 30 വരെ നിലനിൽക്കുന്നുണ്ട്​.

നിലവിൽ രാജ്യത്ത്​ ഏറ്റവും കൂടുതൽ കോവിഡ്​ കേസുകൾ റിപ്പോർട്ട്​ ചെയ്യപ്പെടുന്ന സംസ്​ഥാനമാണ്​ മഹാരാഷ്​ട്ര. 24 മണിക്കൂറിനിടെ 63,294 പേർക്ക്​ മഹാരാഷ്​ട്രയിൽ ​കോവിഡ്​ സ്​ഥിരീകരിച്ചിരുന്നു. 349 പേരാണ്​ സംസ്​ഥാനത്ത്​ കോവിഡ്​ ബാധിച്ച്​ മരിച്ചത്​.