മഹാരാഷ്ട്രയിൽ സി.ബി.ഐക്ക് കേസന്വേഷിക്കാൻ പൊതുസമ്മതം നൽകി ഷിൻഡെ സർക്കാർ

മുംബൈ: മഹാരാഷ്ട്രയിലെ കേസുകൾ അന്വേഷിക്കാൻ സി.ബി.ഐക്ക് പൊതുസമ്മതം നൽകി സംസ്ഥാന സർക്കാർ. നേരത്തെ, മഹാവികാസ് അഘാഡി സർക്കാർ സംസ്ഥാനത്ത് പൊതു സമ്മതം പിൻവലിച്ചിരുന്നു. ഈ തീരുമാനം ഏക്നാഥ് ഷിൻഡെ സർക്കാർ തിരുത്തുകയായിരുന്നു​.

മഹാവികാസ് അഘാഡി സർക്കാറിന്റെ തീരുമാനം തിരുത്തി സി.ബി.ഐക്ക് കേസുകൾ അന്വേഷിക്കാൻ പൊതുസമ്മതം നൽകണമെന്ന് ഉപമുഖ്യമന്ത്രി ദേവേന്ദ്ര ഫട്നാവിസിന്റെ ചുമതലയിലുള്ള ആഭ്യന്തര വകുപ്പ് ശിപാർശ നൽകിയിരുന്നു. ഈ ശിപാർശ മുഖ്യമന്ത്രി അംഗീകരിച്ചു. ഇതോടെ, സംസ്ഥാനത്തെ കേസുകൾ അന്വേഷിക്കാൻ സി.ബി.ഐക്ക് സർക്കാറിന്റെ അനുമതി ആവശ്യമില്ല.

2020 ഒക്ടോബർ 21നാണ് ഉദ്ദവ് താക്കറെയുടെ നേതൃത്വത്തിലുള്ള സർക്കാർ പൊതുസമ്മതം ഒഴിവാക്കിയത്. കേന്ദ്രസർക്കാർ രാഷ്ട്രീയ നേട്ടത്തിനായി അന്വേഷണ ഏജൻസികളെ ദുരുപയോഗം ചെയ്യുന്നുവെന്ന ആരോപണങ്ങളെ തുടർന്നായിരുന്നു നടപടി.