കടലിൽ മുങ്ങിയ കപ്പലിൽനിന്ന് 16​ ജീവനക്കാരെ സാഹസികമായി രക്ഷിച്ചു - വിഡിയോ

മുംബൈ: മഹാരാഷ്​ട്രയിലെ റായ്​ഡഗ്​ ജില്ലയിലെ രേവന്ദക്ക്​ സമീപം കടലിൽ ഭാഗികമായി മുങ്ങിയ ചരക്ക്​ കപ്പലിൽനിന്ന്​ 16 ജീവനക്കാരെയും ഇന്ത്യൻ കോസ്​റ്റ്​ ഗാർഡ്​ രക്ഷിച്ചു. എം.വി മംഗലത്തിലെ ​ക്രൂ അംഗങ്ങളെയാണ്​ പ്രതികൂല കാലാവസ്​ഥ തരണം ചെയ്​ത്​ രക്ഷിച്ചത്​. ഒരു കപ്പലും രണ്ട്​ ഹെലികോപ്​റ്ററിലുമായിട്ടായിരുന്നു രക്ഷാപ്രവർത്തനം.

മാരിടൈം റെസ്ക്യൂ കോഓഡിനേഷൻ സെൻറിൽ (എം.ആർ.സി.സി) വ്യാഴാഴ്ച രാവിലെയാണ്​ എം.വി മംഗളത്തിൻെറ സെക്കൻഡ്​ ഓഫിസർ അപകട വിവരം അറിയിച്ച്​ വിളിക്കുന്നത്​. രേവന്ദ തുറമുഖത്തുനിന്ന് മൂന്ന് കിലോമീറ്റർ അകലെയാണ്​ കപ്പൽ ഭാഗികമായി മുങ്ങിയത്​. കപ്പലിൽ വെള്ളം കയറാൻ തുടങ്ങിയതോടെ ജീവനക്കാർ പരിഭ്രാന്തരായി.

ഉടൻ തന്നെ എം.ആർ.സി.സി അധികൃതർ കോസ്​റ്റ്​ ഗാർഡിനെ അറിയിച്ചു. തുടർന്ന് ഡിഗി തുറമുഖത്തുനിന്ന്​​ സുഭദ്ര കുമാരി ചൗഹാൻ കപ്പലും ​ദാമനിലെ എയർ സ്​റ്റേഷനിൽനിന്ന്​ രണ്ട്​ ചേതക്​ ഹെലികോപ്​റ്ററുകളും എം.വി മംഗലം ലക്ഷ്യമാക്കി കുതിച്ചു.

രാവിലെ 10.15ഓടെ ഇവ കപ്പലിന്​ അടുത്തെത്തി. തുടർന്ന്​ ജീവനക്കാരെ ഹെലികോപ്റ്റർ ഉപയോഗിച്ച്​ ഉയർത്തി. ഇങ്ങനെ 16 ജീവനക്കാരെയും രക്ഷിച്ചു. ക്രൂ അംഗങ്ങളെ രേവന്ദ തുറമുഖത്തേക്ക് കൊണ്ടുപോയി വൈദ്യസഹായം നൽകിയതായും കോസ്​റ്റ്​ ഗാർഡ്​ അറിയിച്ചു.