മഹാരാഷ്​ട്രയിൽ 1089 പേർക്ക്​ കൂടി കോവിഡ്​്; ഇന്ന് 37 മരണം

മുംബൈ: മഹാരാഷ്​ട്രയിൽ വെള്ളിയാഴ്​ച 1089 പേർക്കു കൂടി കോവിഡ്​ സ്​ഥിരീകരിച്ചു. 37 പേർ മരിക്കുകയും ചെയ്​തു. ഇതോടെ സംസ്​ഥാനത്തെ രോഗികളുടെ എണ്ണം 19,063 ആയും മരണം 731 ആയും ഉയർന്നു. കഴിഞ്ഞ നാല്​ ദിവസമായി പ്രതിദിനം ആയിരത്തിലേറെ പേർക്കാണ്​ രോഗം സ്​ഥിരീകരിക്കുന്നത്​. 30 ലേറെ പേർ മരിക്കുകയും ചെയ്യുന്നു. 

43 പേരുടെ മരണമാണ്​ വ്യാഴാഴ്​ച റിപ്പോർട്ട്​ ചെയ്​തത്​. ഒരു ദിവസം റിപ്പോർട്ട്​ ചെയ്യുന്ന വലിയ മരണ സംഖ്യയാണിത്​. രോഗികളിലും മരിച്ചവരിലും പകുതിയിലേറെയും മുംബൈ നഗരത്തിൽ നിന്നാണ്​.

നഗരത്തിലെ ഹോട്ട്​ സ്​പോട്ടായ ധാരാവി ചേരിയിൽ വെള്ളിയാഴ്ച 25 പേർക്ക്​ കൂടി രോഗം സ്​ഥിരീകരിക്കുകയും നാല്​ പേർ മരിക്കുകയും ചെയ്​തു. 808 പേർക്കാണ്​ ഇതുവരെ ധാരാവിയിൽ രോഗം പടർന്നത്​. 26 പേരുടെ ജീവൻ പൊലിഞ്ഞു. 

നഗരത്തിൽ കോവിഡ് വ്യാപനം കുതിക്കുന്ന സാഹചര്യത്തിൽ നഗരസഭ (ബി.എം.സി) കമിഷണർ പ്രവീൺ പർദേശിയെ പദവിയിൽ നിന്ന്​ മഹാരാഷ്​ട്ര സർക്കാർ നീക്കി. പർദേശിയെ നഗര വികസന വകുപ്പിന്‍റെ ചുമതലയുള്ള അഡീഷണൽ ചീഫ്​സെക്രട്ടറിയായി മാറ്റി നിയമിച്ച സർക്കാർ ആ പദവിയിലുണ്ടായിരുന്ന ഇഖ്​ബാൽ ചഹലിനെ നഗരസഭ കമിഷണറാക്കി. നഗരസഭയുടെ അഡീഷണൽ കമിഷണറെയും നീക്കിയിട്ടുണ്ട്​.