ഔറംഗാബാദ് ട്രെയിനപകടം: മഹാരാഷ്​ട്ര സർക്കാർ സഹായധനം പ്രഖ്യാപിച്ചു

മുംബൈ: ഔറംഗാബാദിൽ ചരക്ക്​ ട്രെയിനിടിച്ച്​ 16 അന്തർ സംസ്ഥാന തൊഴിലാളികൾ മരിച്ച സംഭവത്തിൽ ആശ്രിതർക്കുള്ള സഹായധനം മഹാരാഷ്​ട്ര സർക്കാർ പ്രഖ്യാപിച്ചു. ഒാരോ കുടുംബത്തിനും അഞ്ച് ലക്ഷം രൂപ വീതം സഹായധനം നൽകുമെന്ന് മുഖ്യമന്ത്രിയുടെ ഒാഫീസ് അറിയിച്ചു.

വെള്ളിയാഴ്​ച പുലർച്ചെയാണ് മധ്യപ്രദേശിലേക്ക്​ മടങ്ങുന്ന അന്തർ സംസ്ഥാന തൊഴിലാളികളെ ചരക്ക്​ ട്രെയിനിടിച്ചത്​. അപകടത്തിൽ 16 പേർ മരിക്കുകയും അഞ്ച്​ പേർക്ക് പരിക്കേൽക്കുകയും ചെയ്തു. 

റെയിൽവേ ട്രാക്കുകളിലൂടെ നടന്ന്​ മധ്യപ്രദേശിലേക്ക്​ മടങ്ങാൻ ശ്രമിക്കുകയായിരുന്നു തൊഴിലാളികൾ. ഇതിനിടെ ട്രാക്കിൽ കിടന്നുറങ്ങിയ തൊഴിലാളികളാണ്​ ദുരന്തത്തിൽ പെട്ടത്. മുംബൈയിൽ നിന്നും 360 കിലോ മീറ്റർ അകലെ ബദാനപൂർ-കർമാഡ്​ റെയിൽവേ സ്​റ്റേഷനുകൾക്കിടയിലാണ്​ അപകടമുണ്ടായത്​.