ഡോക്ടറുടെ മരണം കൊലപാതകമെന്ന്​ സംശയം; ഭർത്താവ്​ വേദനസംഹാരി ഇൻജക്ഷൻ നൽകിയിരുന്നെന്ന്​ ആരോഗ്യവകുപ്പ്

ചെന്നൈ: മധുരയിൽ 26കാരിയായ ഡോക്ടർ കോവിഡ് വാക്സിൻ സ്വീകരിച്ചതിനെ തുടർന്നാണ്​ മരിച്ചതെന്ന പ്രചാരണം തെറ്റെന്ന വാദവുമായി തമിഴ്​നാട്​ ആരോഗ്യവകുപ്പ് രംഗത്ത്​. മധുരൈ മെഡിക്കൽ കോളജിൽ അനസ്​തേഷ്യോളജിയിൽ പോസ്റ്റ് ഗ്രജ്വേഷൻ വിദ്യാർഥിനിയായ ഹരി ഹരിണിയാണ്​ മാർച്ച് 11ന്​ മരിച്ചത്. കോവിഡ് വാക്സിൻ സ്വീകരിച്ചതിന്​ ശേഷമാണ്​ ഹരി ഹരിണി മരിച്ചതെന്ന് സമൂഹ മാധ്യമങ്ങളിൽ വാർത്ത പ്രചരിച്ചിരുന്നു. ഇതിന്​ വിശദീകരണവുമായാണ്​ ഇപ്പോൾ ആരോഗ്യവകുപ്പ് രംഗത്തെത്തിയത്.

ഫെബ്രുവരി അഞ്ചിനാണ് ഹരി ഹരിണി കോവിഡ് വാക്സിന്‍റെ ആദ്യഡോസ് സ്വീകരിച്ചത്. ഒരു മാസത്തിന്​ ശേഷം മാർച്ച് അഞ്ചിന്​ അവർക്ക്​ പനിയും ശരീര വേദനയും അനുഭവപ്പെട്ടു. ഡോക്​ടർ കൂടിയായ ഭർത്താവ്​ അശോക്​ വിഗ്​നേഷ്​ അന്ന്​ അവർക്ക്​ വേദനസംഹാരിയായ ഡൈ​ക്ലോഫെനാക്​ സോഡിയം കുത്തിവെച്ചു. മണിക്കൂറുകൾ കഴിഞ്ഞപ്പോൾ ഛർദിച്ച ശേഷം ഹരി ഹരിണി ബോധരഹിതയാകുകയും ആശുപത്രിയിൽ പ്രവേശിപ്പിക്കുകയും ചെയ്​തു. മെക്കാനിക്കൽ വെന്‍റിലേഷനിൽ ആറ്​ ദിവസം കഴിഞ്ഞശേഷം മാർച്ച്​ 11നാണ്​​ ഹരി ഹരിണി മരിച്ചതെന്ന്​ ആരോഗ്യ വകുപ്പ്​ വ്യക്​തമാക്കുന്നു.

മാർച്ച്​ 12ന്​ നടത്തിയ പോസ്റ്റുമോർട്ടത്തിൽ ഗുരുതരമായ അലർജി റിയാക്​ഷൻ മൂലം ആവശ്യമായ അളവിൽ ഓക്​സിജൻ ലഭിക്കാഞ്ഞതിനെ തുടർന്ന്​ തലച്ചോറിന്‍റെ പ്രവർത്തനം നിലച്ചതാണ്​ മരണകാരണമെന്ന്​ കണ്ടെത്തിയതായി ജില്ലാ പ്രതിരോധ കുത്തിവെപ്പ്​ ഓഫിസർ ഡോ. കെ.വി. അർജുൻ കുമാർ വ്യക്​തമാക്കി. 'വേദനസംഹാരി കുത്തിവെച്ചത്​ മൂലമാകാം​ അലർജി റിയാക്ഷൻ ഉണ്ടായത്​. കോവിഡ്​ വാക്​സിൻ സ്വീകരിച്ചതാണ്​ മരണകാരണമെന്ന പ്രചാരണം തെറ്റാണ്​. വേദനസംഹാരി എന്ന നിലയിൽ വർഷങ്ങളായി ഡൈ​ക്ലോഫെനാക്​ സോഡിയം കുത്തിവെക്കാറില്ല. കോവിഡ്​ വാക്​സിൻ സ്വീകരിച്ച ശേഷം ഇത്തരം കുത്തിവെപ്പുകൾ നടത്തരുതെന്ന്​ ആരോഗ്യ വകുപ്പ്​ നിർദേശം നൽകിയിട്ടുമുണ്ട്​.'- ഡോ. അർജുൻ കുമാർ പറഞ്ഞു.

അതേസമയം, ഹരി ഹരിണിയുടെ മരണം കൊലപാതകമാണെന്ന സംശയവും ഉയരുന്നുണ്ട്​. സംഭവത്തിൽ ആവണിപുരം പൊലീസ്​ കേസ്​ രജിസ്റ്റർ ചെയ്​തിട്ടുണ്ട്​. മധുരൈ മെഡിക്കൽ കോളജിൽ തന്നെ ജനറൽ സർജറിയിൽ പോസ്റ്റ് ഗ്രജ്വേഷന് പഠിക്കുന്ന ഡോ. അശോക്​ വിഗ്നേഷുമായി കഴിഞ്ഞ വർഷം നവംബറിലായിരുന്നു ഹരിണിയുടെ വിവാഹം. മേല അനുപ്പനാടിയിലായിരുന്നു ഇവർ താമസിച്ചിരുന്നത്​. വിവാഹം കഴിഞ്ഞ് മാസങ്ങൾക്കകമാണ് മരണം എന്നതിനാൽ ആർ.ഡി.ഒ അന്വേഷണവും നടക്കുന്നുണ്ടെന്ന്​ അധികൃതർ അറിയിച്ചു.