തൂത്തുക്കുടി സ്​റ്റെർലൈറ്റ്​ കോപ്പർ പ്ലാൻറ്​ വിപുലീകരണത്തിന്​ സ്​റ്റേ

തൂത്തുക്കുടി: തമിഴ്​നാട്ടിലെ തൂത്തുക്കുടിയിലുള്ള സ്​റ്റെർലൈറ്റ്​ കോപ്പർ മൈനിങ്​ ഇൻഡസ്​ട്രിയുടെ പുതിയ കോപ്പർ സ്​മെൽട്ടറി​​​​െൻറ വിപുലീകരണം​ ഹൈകോടതി സ്​റ്റേ ചെയ്​തു. മ​ദ്രാസ്​ ഹൈകോടതിയുടെ മധുര ബെഞ്ചാണ്​ രണ്ടാം യൂനിറ്റി​​​​െൻറ വിപുലീകരണം സ്​റ്റേ ചെയ്​തത്. 

സംഭവത്തി​​​െൻറ പശ്ചാത്തലത്തിൽ കേന്ദ്ര ആഭ്യന്തര മന്ത്രാലയംതമിഴ്​നാട്​ സർക്കാറിനോട്​ റിപ്പോർട്ട്​ തേടി​.

പുതിയ കോപ്പർ യൂനിറ്റി​​​​െൻറ നിർമാണത്തിനെതിരെ നടന്ന ജനകീയ സമരത്തിനു  നേരെ ചൊവ്വാഴ്​ചയുണ്ടായ പൊലീസ്​ വെടിവെപ്പിൽ 11 പേർ മരിക്കുകയും 100ഒാളം പേർക്ക്​ പരിക്കേൽക്കുകയ​ും ചെയ്​തിരുന്നു. പ്ലാൻറ്​ സമീപ പ്രദേശങ്ങളിലെ ജലം മലിനമാകുന്നതിന്​ കാരണമാകുന്നുവെന്നും ഗുരുതരമായ പരിസ്​ഥിതി പ്രശ്​നങ്ങൾക്ക്​ കാരണമാകുന്നുവെന്നും​ ആരോപിച്ചാണ്​ ജനങ്ങൾ പ്രതിഷേധ സമരവുമായി രംഗത്തിറങ്ങിയത്​. 

വെടിവെപ്പിൽ പരിക്കേറ്റ് ചികിത്സ‍യിൽ കഴിയുന്നവരെ എം.ഡി.എം.കെ നേതാവ് വൈകോ, നടനും മക്കൾ നീതി മയ്യം നേതാവുമായ കമൽ ഹാസൻ എന്നിവർ ആശുപത്രിയിൽ സന്ദർശിച്ചിര​ുന്നു. ഗ്രാ​മ​വാ​സി​ക​ൾ ന​ട​ത്തി​യ ക​ല​ക്​​ട​റേ​റ്റ്​ മാ​ർ​ച്ചി​നു​നേ​രെ​യു​ണ്ടാ​യ പൊ​ലീ​സ്​ വെ​ടി​വെ​പ്പ്​ ആസൂത്രിതമെന്ന് വൈകോ ആരോപിച്ചു. പൊലീസുകാർ സമരക്കാരെ തെരഞ്ഞുപിടിച്ചു അക്രമിക്കുകയായിരുന്നുവെന്നും ഉത്തരാവാദികളായ പൊലീസുകാർക്കെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടിരുന്നു. ആരാണ്​ വെടിവെപ്പിന്​ ഉത്തരവിട്ടതെന്ന്​ അറിയേണ്ടതുണ്ടെന്ന്​ കമൽ ഹാസൻ അഭിപ്രായപ്പെട്ടിരുന്നു. നഷ്​ടപരിഹാരം ഒരു പരിഹാരമല്ലെന്നും ഇൗ വ്യവസായം അടച്ചു പൂട്ടണമെന്നതാണ്​ ജനങ്ങളുടെ ആവശ്യമെന്നും അദ്ദേഹം അഭിപ്രായപ്പെട്ടു.

അതേ സമയം തൂത്തുകുടിയിൽ സമരക്കാർക്ക് നേരെയുള്ള വെടിവെപ്പ് ആസൂത്രിതമെന്ന ആരോപണത്തിന്​ ബലം പകർന്ന്​ സമരക്കാർക്ക് നേരെ പൊലീസ് വെടിവെക്കുന്ന ദൃശ്യങ്ങൾ വാർത്താ ഏജൻസിയായ എ.എൻ.ഐ പുറത്തുവിട്ടു. ബസിന് മുകളിൽ കയറിയ കമാൻഡോ സമരക്കാരെ തെരഞ്ഞുപിടിച്ച് വെടിവെക്കുന്ന ദൃശ്യങ്ങളാണ് പുറത്തുവന്നത്.