കോവിഡിനെ തുരത്താൻ വിമാനത്താവളത്തിൽ പൂജയുമായി ബി.ജെ.പി മ​ന്ത്രി -VIDEO

ഭോപ്പാല്‍: കോവിഡിനെ തുരത്താൻ ഇന്‍ഡോര്‍ വിമാനത്താവളത്തിൽ പൂജയും പാട്ടുമായി മധ്യപ്രദേശിലെ ബി.ജെ.പി നേതാവും ടൂറിസം സാംസ്‌കാരിക മന്ത്രിയുമായ ഉഷാ താക്കൂര്‍. മാസ്‌ക് പോലും ധരിക്കാതെയാണ്​ പൂജ. ദിവസവും പൂജയും ഹനുമാൻ ഭജനയും നടത്തുന്ന താൻ മാസ്​ക്​ ഇടേണ്ടതില്ലെന്ന്​ മന്ത്രി എൻ.ഡി.ടി.വിയോട്​ പറഞ്ഞു.

വെള്ളിയാഴ്ച വിമാനത്താവളത്തിലെ ദേവി അഹല്യ ബായ് ഹോള്‍ക്കറുടെ പ്രതിമയ്ക്ക് മുമ്പിലായിരുന്നു മാസ്​ക്​ ധരിക്കാതെ മന്ത്രിയുടെ ​വിവാദ പൂജ. എയര്‍പോര്‍ട്ട് ഡയറക്ടർ ആര്യമ സന്യാസ്​, മന്ത്രിയുടെ സ്റ്റാഫ് അംഗങ്ങൾ തുടങ്ങിയവർ ചടങ്ങിൽ പ​ങ്കെടുത്തു. ഇവരൊക്കെ മാസ്​ക്​ അണിഞ്ഞിട്ടുണ്ട്​. പൂജയുടെ ദൃശ്യങ്ങൾ സോഷ്യൽ മീഡിയയിൽ വൈറലാണ്​.

ചാണകം കത്തിച്ചാൽ 12 മണിക്കൂറോളം വീട് അണുവിമുക്തമാക്കാമെന്ന്​ ഉഷ താക്കുര്‍ നേരത്തെ കണ്ടുപിടിച്ചിരുന്നു. കഴിഞ്ഞ വർഷം 'ഗോ കൊറോണ ഗോ, കൊറോണ ഗോ' എന്ന മന്ത്രം ഉരുവിട്ടാൽ കൊറോണ ​പമ്പകടക്കു​മെന്ന്​ കേന്ദ്ര മന്ത്രി രാംദാസ് ആത്തേവാല പ്രഖ്യാപിച്ചിരുന്നു. ഇതിനു​പിന്നാലെ അദ്ദേഹത്തിന്​ ​കോവിഡ് ബാധിച്ച്​ ചികിത്സ തേടിയിരുന്നു. നിലവില്‍ 3,27,220 രോഗികളാണ് മധ്യപ്രദേശിലുള്ളത്​. 24 മണിക്കൂറിനുള്ളില്‍ 4,882 പേറക്കാണ്​ പുതുതായി രോഗം ബാധിച്ചത്​.