ഭർത്താവിനെ​ ഉറക്കഗുളിക നൽകിയ ശേഷം ഷോക്കടിപ്പിച്ച്​ കൊന്നു; 63കാരിയായ കോളജ്​ പ്രഫസർ പിടിയിൽ

ഭോപാൽ: ഡോക്​ടറായ ഭർത്താവിനെ ഉറക്കഗുളിക നൽകിയ ശേഷം ഷോക്കടിപ്പിച്ച്​ കൊന്ന കേസിൽ 63കാരിയായ കോളജ്​ ​പ്രഫസറെ പൊലീസ്​ അറസ്റ്റ്​ ചെയ്​തു. മധ്യപ്രദേശിലെ ഛത്തർപുരിൽ ഗവ. മഹാരാജ കോളജിൽ കെമിസ്​ട്രി പ്രഫസറായ മമത പഥക്​ ആണ്​ അറസ്റ്റിലായത്​. കുടുംബവഴക്കിനെ തുടർന്ന്​ ഇവർ ഭർത്താവായ ഡോ. നീരജ് പഥക്കിനെ (65) കൊലപ്പെടുത്തുകയായിരുന്നെന്നും പ്രതി കുറ്റം സമ്മതിച്ചതായും പൊലീസ് അറിയിച്ചു.

ഏപ്രിൽ 29ന്​ ഛത്തർപുർ സിവിൽ ലൈൻ പൊലീസ്​ സ്​റ്റേഷൻ ഏരിയയിലെ ലോക്​നാഥ്​പുരം കോളനിയിലായിരുന്നു കേസിനാസ്പദമായ സംഭവം. നഗരത്തിലെ പ്രമുഖ ഡോക്ടറായ നീരജ് പഥകിന്‍റെ സ്വഭാവത്തിൽ ഭാര്യക്ക്​ സംശയമുണ്ടായിരുന്നെന്നും ഇതേച്ചൊല്ലി ഇവർക്കിടയിൽ വഴക്ക്​ പതിവായിരുന്നെന്നും പൊലീസ്​ പറയുന്നു. സംഭവദിവസവും ഇരുവരും തമ്മിൽ വഴക്കുണ്ടായി. തുടർന്ന്​ വൈകീട്ട്​ ​ഏ​ഴോടെ നീരജിന് ഭക്ഷണത്തിൽ ഉറക്കഗുളിക കലർത്തി നൽകി മയക്കിയ ശേഷം ശരീരത്തിൽ വൈദ്യുത വയറുകൾ ഘടിപ്പിച്ച ശേഷം മമത ഷോക്കടിപ്പിച്ച്​ മരണം ഉറപ്പാക്കുകയായിരുന്നെന്ന്​ ​പൊലീസ്​ പറയുന്നു.

കൊലപാതകം നടത്തി രണ്ട്​ ദിവസം കഴിഞ്ഞാണ്​ പ്രഫസർ ഭർത്താവിന്‍റെ മരണവിവരം പൊലീസിൽ അറിയിക്കുന്നത്​. നീരജിനും തനിക്കും മകൻ നിതേഷിനും ഒരാഴ്ചയായി പനിയായിരുന്നെന്നും ഏപ്രിൽ 30ന് രാവിലെ താനും മകനും ഝാൻസിയിലേക്ക് ചികിത്സയ്ക്കായി പോയെന്നുമാണ്​ ഇവർ പൊലീസിനോട്​ പറഞ്ഞത്​. തിരികെ എത്തി ഭക്ഷണം നൽകാൻ നോക്കിയപ്പോൾ ഭർത്താവിനെ മരിച്ചനിലയിൽ കണ്ടെത്തുകയായിരുന്നെന്നും ഇവർ പറഞ്ഞു.

എന്നാൽ മരണം സംഭവിച്ച് രണ്ടുദിവസമായെന്ന സംശയം തോന്നിയതോടെ പൊലീസ് വിശദമായ അന്വേഷണം നടത്തുകയായിരുന്നെന്ന്​ ഛത്തർപുർ ജില്ല പൊലീസ്​ സൂപ്രണ്ട്​ സചിൻ​ ശർമ്മ പറഞ്ഞു. മമതയുടെ പെരുമാറ്റത്തിലെ അസ്വാഭാവികതയും പൊലീസിൽ സംശയമുണർത്തി. തുടർന്ന് ഈമാസം ഏഴിന്​ ഇവരെ കസ്റ്റഡിയിലെടുത്തു. വിശദമായ ചോദ്യംചെയ്യലിൽ ഭർത്താവിനെ ഷോക്കടിപ്പിച്ച്​ കൊല്ലുകയായിരുന്നെന്ന്​ ഇവർ സമ്മതിച്ചതായി പൊലീസ്​ സൂപ്രണ്ട്​ പറഞ്ഞു. തുടർന്ന്​ അറസ്റ്റ്​ രേഖപ്പെടുത്തുകയായിരുന്നു.