ഗുജറാത്തിലും മതംമാറ്റ നിരോധന നിയമം; ബജറ്റ്​ സമ്മേളനത്തിൽ അവതരിപ്പിക്കും

അഹ്​മദാബാദ്​: ലൗ ജിഹാദിന്‍റെ പേര്​ പറഞ്ഞ്​ ഗുജറാത്തിലും മതംമാറ്റ നിരോധന നിയമം നടപ്പാക്കുന്നു. ഇത്​ സംബന്ധിച്ച്​ തയാറാക്കിയ മത സ്വാതന്ത്ര്യ ഭേദഗതി ബിൽ നിയമസഭയുടെ ബജറ്റ് സമ്മേളനത്തിൽ അവതരിപ്പിക്കുമെന്ന് ഗുജറാത്ത് ആഭ്യന്തരമന്ത്രി പ്രദീപ്സിങ് ജഡേജ പറഞ്ഞു.

''തെറ്റിദ്ധരിപ്പിച്ചും സമ്മർദ്ദം ചെലുത്തിയുമുള്ള മതംമാറ്റം തടയും. ബലാൽക്കാരത്തിലൂടെയോ വിവാഹത്തിന്‍റെ പേരിലോ വഞ്ചനയിലുടെയോ മതപരിവർത്തനത്തിന് ശ്രമിക്കുന്നത്​ പുതിയ നിയമപ്രകാരം ശിക്ഷാർഹമായ കുറ്റകൃത്യമാണ്​" -ജഡേജ മാധ്യമപ്രവർത്തകരോട് പറഞ്ഞു. ലവ് ജിഹാദ്​ ഭീഷണി തടയലാണ്​ ബിൽ ലക്ഷ്യമിടുന്നത്. പേരുമാറ്റി ഹിന്ദു പെൺകുട്ടികളെ വഞ്ചിക്കാൻ ശ്രമിക്കുന്ന എല്ലാവരെയും ഈ നിയമപ്രകാരം ശിക്ഷിക്കും -അദ്ദേഹം കൂട്ടിച്ചേർത്തു.

ഇന്നലെ​ തുടങ്ങിയ ഗുജറാത്ത്​ നിയമസഭ ബജറ്റ്​ സമ്മേളനം ഏപ്രിൽ ഒന്നുവരെ നീണ്ടുനിൽക്കും. ഉപമുഖ്യമന്ത്രി നിതിൻ പട്ടേൽ ഇന്ന് ബജറ്റ് അവതരിപ്പിക്കും.

ബജറ്റ് സമ്മേളനത്തിൽ മതസ്വാതന്ത്ര്യ ധർമ്മ ബിൽ അവതരിപ്പിക്കുമെന്ന്​ കഴിഞ്ഞ മാസം ഗുജറാത്ത് മുഖ്യമന്ത്രി വിജയ് രൂപാനി വഡോദരയിൽ നടന്ന റാലിയിൽ പ്രഖ്യാപിച്ചിരുന്നു. "ലവ് ജിഹാദിനെതിരെ കടുത്ത നിയമം ഒരുങ്ങുന്നുണ്ട്​. വരുന്ന നിയമസഭാ സമ്മേളനത്തിൽ ബിൽ കൊണ്ടുവരും. പെൺകുട്ടികളെ വഞ്ചിക്കുന്ന പരിപാടി കൂടുതൽ കാലം നിലനിൽക്കില്ല" രൂപാനി പറഞ്ഞു.