ഇനി 24 ആഴ്​​ച വരെ ഗർഭച്ഛിദ്രമാകാം; നിയമഭേദഗതി നിലവിൽവന്നു

ന്യൂഡൽഹി: രണ്ട്​ ഡോക്​ടർമാരുടെ റിപ്പോർട്ടുണ്ടെങ്കിൽ 24ാം ആ​ഴ്ചയിലും ഗർഭം അലസിപ്പിക്കാൻ അനുമതി നൽകുന്ന നിയമഭേദഗതി നിലവിൽ വന്നു. അമ്മയുടെയും കുഞ്ഞിന്‍റെയും ആരോഗ്യം കണക്കിലെടുത്താണ്​ ഭേദഗതിയെന്ന്​ കേന്ദ്രസർക്കാർ അറിയിച്ചു. ബലാത്സംഗത്തിന്​ ഇരയായവർ ഗർഭം ധരിച്ചാലും ഗർഭച്ഛിദ്രത്തിന്​ ഈ അനുമതി നൽകും.

ഡോക്​ടർമാർ നൽകുന്ന റിപ്പോർട്ട് സർക്കാർ രൂപവത്​കരിക്കുന്ന ​പ്രത്യേക ​െമഡിക്കൽ ബോർഡ് ​വിലയിരുത്തും. ഇവരാണ്​ അന്തിമാനുമതി നൽകുക. ഗൈനക്കോളജിസ്റ്റ്, ശിശുരോഗവിദഗ്ധർ, റേഡിയോളജിസ്റ്റ്, സർക്കാർ പ്രതിനിധി എന്നിവരാണ് ബോർഡിലെ അംഗങ്ങൾ. ഇത്തരം ബോർഡുകൾ ഉടൻ രൂപവത്​കരിക്കാൻ കേന്ദ്രസർക്കാർ സംസ്ഥാനങ്ങൾക്ക് നിർദേശം നൽകി.

20 ആഴ്ച വരെയുള്ള ഗർഭച്ഛിദ്രത്തിന്​ ഒരു ഡോക്ടറുടെ പരിശോധനാ റിപ്പോർട്ട്​ മതി. 20 മുതൽ 24 വ​െ​ര ആഴ്ചയായാൽ രണ്ട് ഡോക്ടർമാർ പരിശോധിച്ച്​ ​െമഡിക്കൽ ബോർഡിന്​ റിപ്പോർട്ട്​ നൽകണം. ഗർഭസ്ഥ ശിശുവിന് ആരോഗ്യപ്രശ്‌നങ്ങൾ കണ്ടെത്തിയാൽ എപ്പോൾ വേണമെങ്കിലും ഗർഭഛിദ്രം നടത്താനും അനുമതി ലഭിക്കും. ഗർഭനിരോധന മാർഗങ്ങൾ അവലംബിച്ചിട്ടും വീഴ്ചയെ തുടർന്ന്​ ഗർഭിണിയായാൽ മാതാവിന്‍റെ മാനസികാരോഗ്യം കണക്കിലെടുത്ത്​ 20 ആഴ്ചക്കുള്ളിൽ ഗർഭഛിദ്രം നടത്താം. മെഡിക്കൽ ബോർഡാണ് ഇക്കാര്യത്തിൽ തീരുമാനമെടുക്കേണ്ടത്.

നിലവിൽ പ്രത്യേക സാഹചര്യങ്ങളിൽ 20 ആഴ്ച വരെയുള്ള ഗർഭച്ഛിദ്രത്തിന്​ അനുമതിയുണ്ടായിരുന്നു. 12 ആഴ്ച വരെ ഒരു ഡോക്​ടറുടെയും 12 മുതൽ 20 ആഴ്ചവരെ രണ്ട്​ ഡോക്​ടർമാരുടെയും റിപ്പോർട്ടായിരുന്നു പരിഗണിച്ചിരുന്നത്​. ഈ നിയമമാണ്​ ഇപ്പോൾ ഭേദഗതി വരുത്തിയത്​.

ഗർഭഛിദ്രം നടത്തിയ സ്ത്രീയുടെ വിവരങ്ങൾ നിയമപരമായ ആവശ്യങ്ങൾക്കല്ലാതെ വെളിപ്പെടുത്താൻ പാടില്ല. ഈ വ്യവസ്ഥ ലംഘിക്കുന്നവർക്ക് ഒരു വർഷം വരെ തടവുശിക്ഷ ലഭിക്കും.

മുംബൈയിലെ ഗൈനക്കോളജിസ്റ്റായ ഡോ. നിഖിൽ ദത്തറിന്‍റെ 2008 മുതലുള്ള നിയമപോരാട്ടം കൂടിയാണ്​ ഇതോടെ ഫലം കാണുന്നത്​. തന്‍റെ ചികിത്സയിലുള്ള ​സ്​ത്രീയുടെ ഗർഭസ്​ഥ ശിശുവിന്​ ഗുരുതരമായ ഹൃദ്രോഗവും തലച്ചോറിലെ പിഴവുകളും ചൂണ്ടിക്കാട്ടിയാണ്​ അന്ന്​ ഡോ. ദത്തർ കോടതി കയറിയത്​. 20 ആഴ്ചത്തെ സമയപരിധി 24 ആക്കണമെന്നായിരുന്നു ആവശ്യം. തലച്ചോറിലെയും ഹൃദയത്തിലെയും ചില തകരാറുകൾ 20ം ആഴ്ച വരെ സ്കാനിങ്ങുകളിൽ കാണില്ലെന്നതായിരുന്നു ഇതിന്​ കാരണമായി ചൂണ്ടിക്കാട്ടിയത്​. ആദ്യം ബോംബെ ഹൈക്കോടതിയെയും പിന്നീട് സുപ്രീം കോടതിയെയും സമീപിച്ചു. കഴിഞ്ഞ അഞ്ച് വർഷത്തിനിടെ, 20 ആഴ്ച പിന്നിട്ട 200ലധികം കേസുകളിൽ അബോർഷന്​ അനുമതി തേടി കോടതി കയറിയതായും അദ്ദേഹം പറഞ്ഞു.