കൂടുതൽ ലോക്​ഡൗൺ ഇളവുകൾ; നാളികേരം, അടക്ക, കൊക്കോ സംസ്​കരണമാകാം

ന്യൂഡൽഹി: തിങ്കളാഴ്​ച തുടങ്ങുന്ന ലോക്​ഡൗൺകാല ഇളവുകളിൽ കൂടുതൽ മേഖലകൾ ഉൾപ്പെടുത്തി കേന്ദ്ര സർക്കാർ. കേരളം ആവ ശ്യപ്പെട്ട ചില ഇളവുകളും അനുവദിച്ചു. ​നാളികേരം, അടയ്​ക്ക, കൊക്കോ, മുള, സുഗന്ധവിളകൾ എന്നിവയുടെ സംസ്കരണം, പാ​ക്കേജിങ്​, വിപണനം എന്നിവ നിയ​ന്ത്രണങ്ങളിൽ നിന്ന്​ ഒഴിവാക്കി.

ചെറു വനവിഭവങ്ങളെ ആശ്രയിച്ചു കഴിയുന്ന ഗിരിവർഗക്കാർക്കും മറ്റും തടിയല്ലാത്ത വനവിഭവങ്ങൾ ശേഖരിക്കാം. വിളവെടുത്ത്​ സംസ്​കരിക്കാം. സഹകരണ, ഭവന വായ്പ സ്​ഥാപനങ്ങൾക്കും ചെറുകിട ധനകാര്യ സ്ഥാപനങ്ങള്‍ ഉള്‍പ്പെടെ ബാങ്കിങ് ഇതര ധനകാര്യ സ്ഥാപനങ്ങൾക്കും കുറഞ്ഞ ജീവനക്കാരെ നിയോഗിച്ച്​ പ്രവർത്തിക്കാം.

ഗ്രാമീണ മേഖലയിലെ കുടിവെള്ളം, ശുചിത്വം എന്നിവയുടെ ഭാഗമായുള്ള നിർമാണ പ്രവര്‍ത്തനങ്ങളും വൈദ്യുതി വിതരണം, ടെലികോം കമ്പനികളുടെ ഒപ്റ്റിക്കല്‍ ഫൈബര്‍ കേബിള്‍ സ്ഥാപിക്കല്‍ തുടങ്ങിയവയും അനുബന്ധ പ്രവൃത്തികളും അനുവദിക്കും.

ഈ മാറ്റങ്ങളോടെ മാർഗരേഖ പരിഷ്​കരിച്ച്​ ആഭ്യന്തര മന്ത്രാലയം എല്ലാ സംസ്​ഥാനങ്ങൾക്കും കൈമാറി.