മൂന്നാംഘട്ട ലോക്​ഡൗണിന്​ ശേഷം ഇനിയെന്ത്​ ? സൂചനകൾ പുറത്ത്​

ന്യൂഡൽഹി: ഇന്ത്യയിൽ കോവിഡ്​ 19 വൈറസ്​ ബാധയെ തുടർന്ന്​ പ്രഖ്യാപിച്ച ലോക്​ഡൗൺ മൂന്നാം ഘട്ടത്തിലേക്ക്​ കടന്നിരിക്കുകയാണ്​. മെയ്​ 17 വരെയാണ്​ ലോക്​ഡൗൺ. ഇതിന്​ ശേഷം എന്താവും കേന്ദ്രസർക്കാറിൻെറ നടപടികളെന്നത്​ സംബന്ധിച്ച്​ ഇപ്പോൾ തന്നെ ചോദ്യങ്ങൾ ഉയർന്നിട്ടുണ്ട്​. ഇതിനിടെ ഇതുമായി ബന്ധപ്പെട്ട്​ ചില സൂചനകൾ ഉദ്യോഗസ്ഥർ നൽകിയതായി ഇക്കോണിമിക്​സ്​ ടൈംസ്​ റിപ്പോർട്ട്​ ചെയ്യുന്നു.

മൂന്നാം ഘട്ടം ലോക്​ഡൗൺ പ്രഖ്യാപിച്ചപ്പോൾ തന്നെ ചില ഇളവുകൾ കേന്ദ്രസർക്കാർ നൽകിയിരുന്നു. എന്നാൽ, ഈ ഇളവുകളിൽ അവ്യക്​തതയുള്ളതായി പരാതിയുണ്ടായിരുന്നു. ഇത്​ അധികാരം പ്രാദേശിക തലങ്ങളിൽ കേന്ദ്രീകരിക്കുന്നതിനും ഉദ്യോഗസ്ഥ രാജിനും ഇടയാക്കുമെന്നായിരുന്നു​ വിമർശനം. ഈയൊരു സാഹചര്യത്തിൽ കൂടുതൽ വ്യക്​തത ഇളവുകളുടെ കാര്യത്തിൽ കേന്ദ്രസർക്കാർ ഉണ്ടാക്കുമെന്നാണ്​ സൂചന.

മെയ്​ 17ന്​ ശേഷം ചില പ്രവർത്തനങ്ങൾ നെഗറ്റീവ്​ ലിസ്​റ്റിലുൾപ്പെടുത്തി പൂർണമായും നിയന്ത്രിക്കും. അല്ലാത്ത ഭൂരിപക്ഷം സാമ്പത്തിക പ്രവർത്തനങ്ങൾക്കും കേന്ദ്രസർക്കാർ അനുമതി നൽകിയേക്കും. രാജ്യത്തെ വിതരണ സ​മ്പ്രദായം പൂർണമായും തുറന്ന്​ കൊടുക്കും. എന്നാൽ, ശാരീരിക അകലം കർശനമായി പാലിച്ചും മറ്റ്​ സുരക്ഷാ സംവിധാനങ്ങളോട്​ കൂടിയാവും സമ്പദ്​വ്യവസ്ഥ തുറന്നു കൊടുക്കുക. ചെറുകിട വ്യവസായങ്ങൾക്ക്​ ചില ഇളവുകൾ അനുവദിച്ചിട്ടുണ്ടെങ്കിലും പൂർണമായ രീതിയിൽ പ്രവർത്തന സജ്ജമായിട്ടില്ല. ഇത്​ വീണ്ടും തുറന്ന്​ കൊടുക്കുന്നതിനുള്ള നടപടികളും സർക്കാർ മൂന്നാം ഘട്ട ലോക്​ഡൗണിന്​ ശേഷം സ്വീകരിച്ചേക്കും.