തമിഴ്​നാട്ടിൽ ആഗസ്​റ്റ്​ 31 വരെ ലോക്ക്​ഡൗൺ നീട്ടി

ചെന്നൈ: തമിഴ്​നാട്ടിൽ ആഗസ്​റ്റ്​ 31 വരെ ലോക്ക്​ഡൗൺ നിയന്ത്രണങ്ങൾ തുടരുമെന്ന്​ സംസ്​ഥാന സർക്കാർ അറിയിച്ചു. വ്യാഴാഴ്​ച രാവിലെ മെഡിക്കൽ വിദഗ്​ധ സമിതിയുമായ കൂടിയാലോചനക്കുശേഷമാണ്​ സർക്കാർ തീരുമാനം പ്രഖ്യാപിച്ചത്​. രോഗബാധയും മരണനിരക്കും വർധിക്കുന്ന സാഹചര്യത്തിൽ നിയന്ത്രണങ്ങളിൽ ഇളവ്​ നൽകേണ്ടതില്ലെന്നായിരുന്നു വിദഗ്​ധ സമിതിയുടെ ശിപാർശ. 

അന്തർ ജില്ല -സംസ്​ഥാന യാത്രക്ക്​ നിലവിലുള്ള ഇ-പാസ്​ സംവിധാനം തുടരും. ആഗസ്​റ്റ്​ മാസത്തിലെ ഞായറാഴ്​ചകളിൽ സമ്പൂർണ ലോക്ക്​ഡൗണായിരിക്കും. സംസ്​ഥാനത്തിനകത്തും അന്തർ സംസ്​ഥാന റൂട്ടുകളിലും ബസ്​ സർവീസ്​ പുനരാരംഭിക്കില്ല. പലചരക്ക്​ കടകളും പച്ചക്കറികടകളും രാവിലെ ആറു മുതൽ ​ൈവകീട്ട്​ ഏഴുവരെ  തുറക്കാം.

ലോഡ്​ജുകൾ, ഹോട്ടലുകൾ, മാളുകൾ, വിദ്യാലയങ്ങൾ തുടങ്ങിയവക്കുള്ള നിയന്ത്രണം തുടരും. 50 ശതമാനം തൊഴിലാളികളോടെ പ്രവർത്തിക്കുന്ന സ്വകാര്യ കമ്പനികൾക്കും വ്യവസായ സ്​ഥാപനങ്ങൾക്കും ഇനി മുതൽ 75 ശതമാനം വരെ തൊഴിലാളികളെ ജോലിക്ക്​ നിയോഗിക്കാം. ഹോട്ടലുകളിൽ പാർസൽ സർവീസ്​ മാത്രമാണുണ്ടായിരിക്കുക. 

നഗരങ്ങളിൽ സ്ഥിതിചെയ്യുന്ന ആരാധാനാലയങ്ങൾ തുറക്കില്ല. വിനോദസഞ്ചാര കേന്ദ്രങ്ങളിലെ വിലക്ക്​ തുടരും.