തമിഴ്​നാട്ടിൽ മദ്യശാലകൾ വീണ്ടും തുറക്കും; ഒരു ദിവസം 500 ​പേർക്ക്​ മാ​ത്രം

ചെന്നൈ: സുപ്രീംകോടതി വിധിക്ക്​ പിന്നാലെ മദ്യശാലകൾ തുറന്നുപ്രവർത്തിക്കാൻ പുതിയ മാർഗനിർദേശങ്ങളുമായി തമിഴ്​നാട്​ സർക്കാർ. മദ്യശാലകളിൽ ടോക്കൺ സംവിധാനം ഏർപ്പെടുത്തും. ഒരു ദിവസം ഒരു ഷോപ്പിൽ നിന്ന്​ 500 പേർക്ക്​ മാത്രമേ മദ്യം നൽകൂ. 

രാവിലെ 10 മണി മുതൽ വൈകിട്ട്​ അഞ്ചുവരെയായിരിക്കും മദ്യശാലകളുടെ പ്രവർത്തനം. ഉപഭോക്താക്കൾ നിർബന്ധമായും മാസ്​ക്​ ധരിച്ചിരിക്കണം. സംസ്​ഥാനത്തെ കോവിഡ്​ 19 ഹോട്ട്​സ്​പോട്ടായ ചെന്നൈ, തിരുവള്ളൂർ, മറ്റു കണ്ടെയിൻമ​െൻറ്​ മേഖലകൾ എന്നിവിടങ്ങളിൽ മദ്യവിൽപ്പന അനുവദിക്കില്ലെന്നും മാർഗനിർദേശത്തിൽ വ്യക്തമാക്കുന്നു. 

ഓൺലൈനായി മാത്രം മദ്യവിൽപ്പന അനുവദിച്ചുകൊണ്ടുള്ള മദ്രാസ്​ ഹൈകോടതി ഉത്തരവ് സുപ്രീംകോടതി​ സ്​റ്റേ ചെയ്​തിരുന്നു. 

അതേസമയം സംസ്​ഥാനത്ത്​ കോവിഡ്​-19 ബാധിച്ച്​ ചികിത്സയിൽ കഴിഞ്ഞിരുന്ന അഞ്ചു പേർ കൂടി മരിച്ചു. ഇതോടെ മൊത്തം മരണസംഖ്യ 71 ആയി. 24 മണിക്കൂറിനിടെ 11,672 സാമ്പിളുകൾ പരിശോധിച്ചതിൽ 434 പേർക്ക്​ പുതുതായി രോഗബാധ കണ്ടെത്തി. ചെന്നൈയിൽമാത്രം 310 പേർക്ക്​ രോഗബാധ ഉണ്ടായി. 

നഗരത്തിൽ മൊത്തം രോഗബാധിതരുടെ എണ്ണം 5,946 ആയി ഉയർന്നു. വെള്ളിയാഴ്​ച 359 പേരെ ഡിസ്​ചാർജ്​ ചെയ്​തു.  ​ഇതേവരെ രോഗം ഭേദമായി ആശുപത്രിയിൽനിന്ന്​ വിട്ടയച്ചവരുടെ മൊത്തം എണ്ണം 2,599 ആണ്​. 2,90,906 പേർക്കാണ്​ പരിശോധന നടത്തിയത്​.