മാരുതി സുസുക്കിയുടെ ഫാക്​ടറിയിൽ പുലി

ന്യൂഡൽഹി: ഹരിയാനയിലെ ഗുരുഗ്രാമിലുള്ള മാരുതി സുസുക്കിയുടെ വാഹന എന്‍ജിന്‍ നിര്‍മ്മാണശാലയില്‍ പുലി. വ്യാഴാഴ്​ച പുലര്‍ച്ചെ 3.30 ഓടെ കമ്പനിയുടെ ഗേറ്റ്​ നമ്പർ രണ്ടിലൂടെ പുലി പ്​ളാൻറിനകത്തേക്​ കടക്കുന്നത്​ സുരക്ഷാ ഉദ്യോഗസ്ഥൻ കാണുകയായിരുന്നു.  അധികൃതരെ വിവരം അറിയിച്ചതിനെ തുടർന്ന്​ എന്‍ജിന്‍ നിര്‍മ്മാണം നിര്‍ത്തിവെക്കുകയും ജീവനക്കാരെ മുഴുവന്‍ പ്ലാൻറിൽ നിന്ന് പുറത്തിറക്കുകയും ചെയ്തു. ഫാക്ടറിയിലെ സി.സി.ടി.വി ക്യാമറകളില്‍ പുള്ളിപ്പുലിയുടെ ദൃശ്യങ്ങള്‍ പതിഞ്ഞിട്ടുണ്ട്.

 350 ഒാളം ജീവനക്കാരാണ്​ പ്​ളാൻറിൽ ഉണ്ടായിരുന്നത്​. കമ്പനി അധികൃതർ അറിയിച്ചതിനെ തുടർന്ന്​ പൊലീസും ഫോറസ്​റ്റ്​ വകുപ്പ്​ ഉദ്യോഗസ്ഥരും സ്ഥലത്തെത്തി. പുലിയെ പിടികൂടുന്നതിന്​ വേണ്ടി രാവിലെ 6.30 ന്​ ആരംഭിക്കുന്ന ഷിഫ്​റ്റ്​ മാറ്റിവെച്ചു. 2000 ത്തോളം ജീവനക്കാരാണ്​ രാവിലെയുള്ള ഷിഫ്​റ്റുകളിലായി ഇവിടെ ജോലി ചെയ്യുന്നത്​. 

 നിരവധി വലിയ യന്ത്രങ്ങളുള്ള പ്​ളാൻറായതിനാൽ പുലിയെ തെരഞ്ഞ്​ കണ്ടുപിടിക്കുന്നത്​ ദുഷ്​കരമാണെന്ന്​ പൊലീസ്​ ഉദ്യോഗസ്ഥൻ നരേന്ദ്രർ കുമാർ പറഞ്ഞു. 

മാരുതി സുസുക്കി വാഹനങ്ങള്‍ക്കുവേണ്ടി എന്‍ജിനുകള്‍ നിര്‍മ്മിക്കുന്ന പ്​ളാൻറ്​ 750 ഏക്കര്‍ പ്രദേശത്താണ് വ്യാപിച്ചു കിടക്കുന്നത്. ഓരോ ഷിഫ്റ്റിലും 1200 എന്‍ജിനുകളാണ് ഇവിടെ നിര്‍മ്മിക്കുന്നത്.