പാക്​ അധീന കശ്​മീർ ഉപമ ശരിയെന്ന്​ തെളിഞ്ഞു; മുംബൈ വിടുന്നത്​ വേദനയോടെയെന്ന്​ കങ്കണ

മുംബൈ: പാക്​ അധീന കശ്​മീരിലേതിന്​ സമാനമായ അനുഭവങ്ങളാണ്​ തനിക്ക്​ മുംബൈയിൽ നിന്നുണ്ടായതെന്ന്​ ബോളിവുഡ്​ താരം കങ്കണ റണാവത്ത്​. ത​െൻറ ഓഫീസും വീടും തകർക്കപ്പെടുകയും നിരന്തരം ആക്രമിക്കപ്പെടുകയും ചെയ്​ത​ുവെന്നും അതീവ ദുഃഖത്തോടെയാണ്​ മുംബൈ വിടുന്നതെന്നും കങ്കണ ട്വിറ്ററിൽ കുറിച്ചു. സെപ്​തംബർ 10നാണ്​ വൈ പ്ലസ്​ സുരക്ഷയോടെ ​കങ്കണ മുംബൈയിലെത്തിയത്​.

''അതീവ ദുഃഖത്തോടെയാണ്​ മുംബൈ വിടുന്നത്​. നിരന്തരമായ ആക്രമണങ്ങളിലൂടെ ഈ ദിവസങ്ങളിലെല്ലാം എന്നെ ഭയപ്പെടുത്തിയ രീതിയും, എ​െൻറ വീടു​ം ഓഫീസും തകർക്കാനുള്ള ശ്രമവും ആയുധങ്ങളുമായി എ​െൻറ ചുറ്റിലുമുള്ള സുരക്ഷാ ഉദ്യോഗസ്ഥരുമെല്ലാം പാക്​ അധീന കശ്​മീർ എന്ന ഉപമ ശരിവെക്കുന്നു''- കങ്കണ മുംബൈ വിടുന്നതിന്​ മുമ്പ്​ ട്വിറ്ററിൽ കുറിച്ചു.

ജനങ്ങൾ സന്തോഷ​ത്തോടെയാണ്​ തന്നെ വരവേൽക്കുന്നതെന്ന്​ ഛണ്ഡീഗഡിൽ എത്തിയ താരം ട്വീറ്റ്​ ചെയ്​തു. '' ഞാന്‍ രക്ഷപ്പെട്ടതായാണ് ഇപ്പോള്‍ തോന്നുന്നത്. ഒരു അമ്മയുടെ സ്പര്‍ശനം മുംബൈയില്‍ അനുഭവിച്ചിരുന്ന ഒരു സമയം ഉണ്ടായിരുന്നു. എന്നാല്‍ ഇപ്പോഴത്തെ സാഹചര്യത്തിൽ ഞാന്‍ ജീവനോടെ തന്നെ ഇരിക്കുന്നുവെന്നത്​ ഭാഗ്യമാണ്. ശിവസേന സോണിയ സേന ആയി മാറി, മുംബൈ ഭരണകൂടം ഭീകരരായി മാറിയിരിക്കുകയാണ്''- കങ്കണ ട്വീറ്റ്​ ചെയ്​തു.

സുശാന്ത്​ സിങ്​ രജ്​പുത്തുമായി ബന്ധ​െപ്പട്ട്​ 'മുംബൈ പാക്​ അധീനകശ്​മീർ' ആയി മാറിയെന്ന കങ്കണയുടെ പരാമർശം വൻ വിവാദത്തിന്​ വഴിവെച്ചിരുന്നു. പരാമർശത്തിൽ ശിവസേന നേതാക്കളും കങ്കണയും തമ്മിൽ തുറന്ന പോരും നടന്നു. അതിനിടെ അനധികൃത നിർമാണം എന്ന്​ ചൂണ്ടിക്കാട്ടി ബി.എം.സി അധികൃതർ കങ്കണയുടെ ഓഫീസ്​ ഭാഗികമായി പൊളിക്കുകയും ചെയ്​തിരുന്നു. ബി.എം.സിയുടെ നടപടിക്കെതിരെ കങ്കണ ഹൈകോടതിയെ സമീപിക്കുകയും കോടതി പൊളിക്കലിന്​ സ്​റ്റേ ഏർപ്പെടുത്തുകയും ചെയ്​തിരുന്നു.