കോവിഡിന്​ പിടി​കൊടുക്കാതെ ലക്ഷദ്വീപ്​; കരുതൽ ഇവി​​ടെ വെറുംവാക്കല്ല

കവരത്തി: രാജ്യത്ത്​ കോവിഡ്​ രോഗികളുടെ എണ്ണം 10 ലക്ഷത്തോടടു​ക്കവെ, ഇതുവരെ ഒരാൾക്കുപോലും രോഗം​ ബാധിക്കാത്ത ലക്ഷദ്വീപ്​ ആരോഗ്യരംഗത്തെ മുൻകരുതലിന്​ മാതൃകയാകുന്നു. കേന്ദ്ര ആരോഗ്യ മന്ത്രാലയത്തി​​െൻറ കോവിഡ് -19 ബാധിത പട്ടികയിൽ ഇടംപിടിക്കാത്ത ഇന്ത്യയിലെ ഒരേയൊരു പ്രദേശമാണിത്. 

കേന്ദ്രഭരണ പ്രദേശമായ ഇവിടേക്ക്​ വരുന്നവർക്ക്​ ഏർപ്പെടുത്തിയ കർശന നിയന്ത്രണങ്ങളാണ്​ രോഗബാധ തടയാൻ സഹായിച്ചതെന്ന്​ ലക്ഷദ്വീപ് ആരോഗ്യ സെക്രട്ടറി ഡോ. എസ്. സുന്ദരവടിവേലു പറഞ്ഞു. വളരെ കുറച്ച്​ ആശുപത്രികൾ മാത്രമുള്ള ദ്വീപിൽ ഈ മുൻകരുതലല്ലാതെ മറ്റുമാർഗമില്ലെന്നും അദ്ദേഹം ദി പ്രിൻറിനോട്​ പറഞ്ഞു.

ജനവാസമുള്ള 10 എണ്ണം ഉൾപ്പെടെ 36 ദ്വീപുകൾ ഉൾക്കൊള്ളുന്ന ലക്ഷദ്വീപിൽ ആകെ ജനസംഖ്യ 64,473 ആണ്​. കർശനമായ പ്രവേശന നിയന്ത്രണവും ദിവസങ്ങൾ നീണ്ട ക്വാറൻറീനും കൃത്യമായ രോഗ പരിശോധനയുമാണ്​ കോവിഡ്​ നിയന്ത്രണത്തിന്​ മുതൽക്കൂട്ടായത്​. രോഗവ്യാപനം റിപ്പോർട്ട്​ ചെയ്യാത്ത സാഹചര്യത്തിൽ സ്കൂളുകൾ തുറക്കാൻ അനുവദിക്കണമെന്ന് ആവശ്യപ്പെട്ട്​ കേന്ദ്രസർക്കാരിന് ലക്ഷദ്വീപ്​ ഭരണകൂടം അടുത്തിടെ അപേക്ഷ നൽകിയിരുന്നു. 

രോഗപരിശോധന നടത്തിയത്​ 61 പേർക്ക്​
ഇതുവരെ വെറും 61 പേരെയാണ്​ സ്രവപരിശോധനക്ക്​ വിധേയമാക്കിയത്​. ഈ പരിശോധനകളുടെയെല്ലാം ഫലം നെഗറ്റീവായിരുന്നു. അവശ്യസാധനങ്ങൾ മുതൽ ആരോഗ്യ സംരക്ഷണം വരെ എല്ലാത്തിനും ഇവർ കൊച്ചിയെയാണ്​ ആശ്രയിക്കുന്നത്​. ഈ ദ്വീപ്​ സമൂഹത്തിലേക്കുള്ള വിമാനങ്ങളും കപ്പലുകളുമെല്ലാം കൊച്ചി കേന്ദ്രീകരിച്ചാണ്​  പ്രവർത്തിക്കുന്നത്​. 

തുടക്കത്തിൽ തന്നെ അതിജാഗ്രത
ദ്വീപിൽ​ കോവിഡ്​ ബാധിച്ചാൽ പിന്നെ പിടിച്ചുനിൽക്കാനാവില്ലെന്ന തിരിച്ചറിവാണ്​ ശക്​തമായ പ്രതിരോധത്തിന്​ തങ്ങളെ പ്രേരിപ്പിച്ചതെന്ന്​ ഡോ. സുന്ദരവടിവേലു വ്യക്​തമാക്കി. ഇപ്പോൾതന്നെ ദുർബലമായ ആരോഗ്യ സംവിധാനം രോഗം പരന്നാൽ പിന്നെ പൂർണ്ണമായും തകരുമെന്ന ​േബാധ്യം ഭരണകൂടത്തിനുണ്ട്​. പുറത്തുള്ളവർക്ക്​ ദ്വീപിലേക്ക്​ വരാൻ​ നിരവധി കടമ്പകളാണ്​ ഏർപ്പെടുത്തിയത്​. അനാവശ്യമായി വരുന്നത് തടയുക എന്നത്​ തന്നെയായിരുന്നു ഇതി​​െൻറ ലക്ഷ്യം. 

ദ്വീപിലേക്കുള്ള കപ്പൽ യാത്രക്കാർക്ക്​ ഫെബ്രുവരി ഒന്നുമുതലും വിമാന യാത്രക്കാർക്ക്​ ഫെബ്രുവരി ഒമ്പതു മുതലും കൊച്ചിയിൽ പരിശോധന ഏർപ്പെടുത്തിയിരുന്നു. ദ്വീപിലെ ഏക വിമാനത്താവളമായ അഗത്തിയിൽ ഫെബ്രുവരി ഒന്നിന് തന്നെ ഈ സംവിധാനം തുടങ്ങി. “തുടക്കത്തിൽ തന്നെ ഞങ്ങൾ യാത്രക്കാരെ പരിശോധിക്കാൻ തുടങ്ങി. ഏറെക്കഴിഞ്ഞാണ്​ രാജ്യത്തി​​െൻറ മറ്റ് സംസ്​ഥാനങ്ങളൊക്കെ ഇതേക്കുറിച്ച്​ ആലോചിച്ചത്​. ലക്ഷദ്വീപിലേക്കുള്ള യാത്രക്കാർക്ക്​ വളരെമുമ്പുതന്നെ കൊച്ചി വിമാനത്താവളത്തിൽ പ്രീ-ബോർഡിങ്​ സ്ക്രീനിങ്​ ആരംഭിച്ചിരുന്നു” -അദ്ദേഹം പറഞ്ഞു.

ദ്വീപിലെത്താൻ കടമ്പകൾ പലത്​
“ഇവിടെ വരാൻ ആഗ്രഹിക്കുന്നവർ ഞങ്ങളുടെ ഗസ്റ്റ് ഹൗസിൽ ഏഴ് ദിവസത്തെ നിരീക്ഷണത്തിൽ കഴിയണം. ഇതിനായി ഇപ്പോൾ കൊച്ചിയിൽ ഞങ്ങൾ രണ്ട് ഹോട്ടലുകളും എടുത്തിട്ടുണ്ട്. ആ കാലയളവിനുശേഷം കോവിഡ്​ പരിശോധനയ്ക്ക് വിധേയനാകണം. അഗത്തി വിമാനത്താവളത്തിലെത്തിയാൽ അധിക സുരക്ഷയ്ക്കായി 14 ദിവസ ഹോംക്വാറൻറീനിലും കഴിയണം. ഞങ്ങളുടെ ആരോഗ്യരംഗം വളരെ മോശമാണെന്ന് അറിയാവുന്നതിനാലാണ്​ ഇത്​ പ്രാവർത്തികമാക്കിയത്​. രോഗം ഒരുതവണ ദ്വീപിൽ പ്രവേശിച്ചാൽ പിന്നെ എളുപ്പത്തിൽ എല്ലാവരെയും പിടികൂടും’ -ഡോ. സുന്ദരവടിവേലു കൂട്ടിച്ചേർത്തു.

ഹോട്ടലിലായാലും ഗെസ്​റ്റ്​ ഹൗസിലായാലും താമസിക്കുന്നവരുടെ മുഴുവൻ ചെലവും സർക്കാറാണ്​ വഹിക്കുന്നത്​. 

ദ്വീപി​േലക്ക്​ വരാൻ കൊച്ചിയിലെത്തുന്ന അന്താരാഷ്ട്ര യാത്രക്കാർ കേരള സർക്കാറി​​െൻറ 14 ദിവസ നിർബന്ധിത നിരീക്ഷണം അവസാനിച്ചശേഷം ലക്ഷദ്വീപ് ഭരണകൂടത്തി​​െൻറ 14 ദിവസത്തെ ഹോം ക്വാറൻറീനും പാലിക്കണം.  

കൊച്ചിയിൽനിന്ന്​ പുറപ്പെടുതിന്​ മുമ്പ്​ നടത്തുന്ന പരിശോധനയിൽ ഇതുവരെ രണ്ടുപേർക്ക്​ മാത്രമാണ് കോവിഡ്​ പോസിറ്റീവ് കണ്ടെത്തിയത്​. നേരത്തെ, ആർ‌.ടി-പി‌.സി.‌ആർ പരിശോധനയായിരുന്നു നടത്തിയത്​. എന്നാൽ, ഇപ്പോൾ വിലകുറഞ്ഞ ട്രൂനാറ്റ് പരിശോധനക്കാണ്​ യാത്രക്കാരെ വിധേയരാക്കുന്നത്​. 

ആശുപത്രികൾ വിരളം
അത്യാവശ്യം സൗകര്യങ്ങളുള്ള മൂന്ന്​ ആശുപത്രികൾ മാത്രമാണ്​ ദ്വീപിലുള്ളത്​. കവരത്തിയിലെ ഇന്ദിരാഗാന്ധി (ഐ.ജി) ആശുപത്രി, രാജീവ് ഗാന്ധി സ്പെഷ്യാലിറ്റി ആശുപത്രി, മിനിക്കോയിയിലെ സർക്കാർ ആശുപത്രി എന്നിവയാണത്​. ഐ‌.ജി ആശുപത്രിയിലും സർക്കാർ ആശുപത്രിയിലും കൂടി ആകെ 70 കിടക്കകൾ. കോവിഡിനെ തുടർന്ന്​ ഐ‌.ജി ആശുപത്രിയിൽ 30 കിടക്കകളുള്ള പുതിയ ബ്ലോക്ക് ഒരുക്കിയിട്ടുണ്ട്​. 100 കിടക്കകളാണ്​ രാജീവ് ഗാന്ധി ആശുപത്രിയിലുള്ളത്​. 

ആ​േന്ത്രാത്ത്, അമിനി, അഗത്തി എന്നീ മൂന്ന് ദ്വീപുകളിൽ 30 കിടക്കകളുള്ള മൂന്ന് കമ്മ്യൂണിറ്റി ഹെൽത്ത് സ​െൻററുകളുണ്ട്. കടമത്ത്, കൽപ്പേനി, കിൽത്താൻ, ചെത്‌ലത്ത്​ എന്നിവിടങ്ങളിലായി 10 കിടക്കകൾ വീതമുള്ള നാല് പ്രാഥമിക ആരോഗ്യ കേന്ദ്രങ്ങളുമുണ്ട്. അതേസമയം, മെഡിക്കൽ കോളജുകളോ സ്വകാര്യ ആശുപത്രികളോ ദ്വീപിലില്ല.