ബദായൂനിലെ യുവതിയെ മാനഭംഗപ്പെടുത്തിയത്​ ബി.ജെ.പിക്കാരനായ മുൻ ആഭ്യന്തര സഹമന്ത്രി

കാൺപുർ: ഉത്തർപ്രദേശിലെ ഉന്നാവോ ജില്ലയിൽ ബലാത്സംഗത്തിനിരയായ യുവതി യോഗി ആദിത്യനാഥ്​ സർക്കാറിൽനിന്ന്​ നീതിതേടി അലയു​േമ്പാൾ ബദായൂനിൽനിന്ന്​ മറ്റൊരു യുവതിയും ഇതേ ആവശ്യവുമായി രംഗത്ത്​. ​ തന്നെ ബലാത്സംഗത്തിനിരയാക്കിയ മുൻ കേന്ദ്രമന്ത്രിക്കെതിരെ നടപടി ആവശ്യപ്പെട്ട്​ 39കാരിയാണ്​ രാഷ്​ട്രപതി രാംനാഥ്​ കോവിന്ദിനും ഉത്തർപ്രദേശ്​ ഗവർണർ രാംനായിക്കിനും സുപ്രീംകോടതി ചീഫ്​ ജസ്​റ്റിസ്​ ദീപക്​ മിശ്രക്കും പരാതി നൽകിയത്​.  

വിഡിയോ സന്ദേശമായും പരാതി അയച്ചിട്ടുണ്ട്​. അടൽ ബിഹാരി വാജ്​പേയി മന്ത്രിസഭയിൽ ആഭ്യന്തര സഹമന്ത്രിയും മൂന്നുവട്ടം ബി.ജെ.പി എം.പിയുമായിരുന്ന സ്വാമി ചിന്മയാനന്ദ്​ 2011ലാണ്​ തന്നെ ബലാത്സംഗം ചെയ്​തതെന്നും ഇയാൾക്കെതിരായ കേസ്​ പിൻവലിക്കാനുള്ള നീക്കത്തിലാണ്​ യോഗി സർക്കാറെന്നും യുവതി പരാതിയിൽ ആരോപിച്ചു. പ്രതിക്കെതിരെ അറസ്​റ്റ്​ വാറൻറ്​ പുറപ്പെടുവിക്കണമെന്നാവശ്യപ്പെട്ട്​ ത​​​െൻറ സത്യവാങ്​മൂലം കോടതിയിലുണ്ട്​. ഇതിൽ ഉത്തരവ്​ വരുന്നതിനു മുൻപേ കേസ്​ ഇല്ലാതാക്കാനാണ്​ സർക്കാർ ശ്രമിക്കുന്നതെന്നും  യുവതി പറഞ്ഞു.

2011ൽ ഷാജഹാൻപുർ കോട്​വാലി പൊലീസ്​ സ്​റ്റേഷനിലാണ്​ ചിന്മയാനന്ദിനെതിരെ കേസ്​ രജിസ്​റ്റർ ചെയ്​തത്​.  ഇതേ തുടർന്ന്​ അലഹബാദ്​ ഹൈകോടതിയിൽനിന്ന്​ ഇദ്ദേഹം സ്​റ്റേ വാങ്ങിയതിനാൽ തുടർ നടപടികൾ ഉണ്ടായിട്ടില്ല. അതേസമയം, ഉന്നാവോയിൽ ബി.ജെ.പി എം.എൽ.എ കുൽദീപ്​ സിങ്​ സെങ്കാർ ബലാത്സംഗത്തിനിരയാക്കിയെന്ന യുവതിയുടെ പരാതിയിൽ ഇതുവരെ നടപടിയെടുക്കാൻ യോഗി സർക്കാർ തയാറായിട്ടില്ല.

കഴിഞ്ഞ ദിവസം യുവതിയെയും കുടുംബത്തെയും ആക്രമിച്ച സംഭവത്തിൽ എം.എൽ.എയുടെ സഹോദരനെ അറസ്​റ്റ്​ ചെയ്​തിട്ടുണ്ട്​​. 2017 ജൂണിലാണ്​ സെങ്കാർ ഉന്നാവോയിലെ യുവതിയെ മാനഭംഗപ്പെടുത്തിയത്​.