കുടക്​ മഴക്കെടുതി നേരിടാൻ 100 കോടി കേന്ദ്ര സഹായം വേണം - എച്ച്​.ഡി കുമാരസ്വാമി

ബംഗളൂരു: കർണാടകയിലെ കുടക്​ ജില്ലയിലുണ്ടായ മഴക്കെടുതി നേരിടാൻ 100 കോടിയുടെ കേന്ദ്ര സഹായം വേണമെന്ന്​ മുഖ്യമന്ത്രി എച്ച്​.ഡി കുമാരസ്വാമി. പ്രധാനമന്ത്രി കേരളത്തിന്​ 500 കോടി അനുവദിച്ചിട്ടുണ്ട്​. കുടക്​ ജില്ലയിലെ ദുരന്തം നേരിടാൻ 100 കോടിയെങ്കിലും കേന്ദ്രം അനുവദിക്കുമെന്നാണ്​ പ്രതീക്ഷിക്കുന്നതെന്ന്​ കുമാരസ്വാമി മാധ്യമങ്ങളോട്​ പറഞ്ഞു. 

100 കോടി അനുവദിക്കണമെന്ന്​ കേന്ദ്രത്തോട്​ ആവശ്യപ്പെടും. ജില്ലയിലെ വിവിധ മേഖലകൾ തമ്മിലുള്ള ബന്ധം നഷ്​ടമാകാതിരിക്കാൻ റോഡുകൾ പുനർനിർമിക്കണം. സൈന്യത്തി​​​െൻറയും ദേശീയ ദുരന്ത നിവാരണ സേനയുടെയും സഹായം ആവശ്യപ്പെടുമെന്നും കുമാരസ്വാമി പറഞ്ഞു. 

പ്രളയ ദുരിതത്തി​​​െൻറ വ്യാപ്​തി തിരിച്ചറിയാൻ വ്യോമ നിരീക്ഷണം നടത്തും. ദുരന്തത്തിൽ 12 ജീവൻ നഷ്​ടപ്പെടുകയും 845 വീടുകൾ നശിക്കുകയും ചെയ്​തു. അതിൽ 773 എണ്ണം ഭാഗികമായി തകർന്നു. ആകെ 6620 ജനങ്ങൾ ദുരിതാശ്വാസ ക്യാമ്പുകളിൽ കഴിയുകയാണ്​. കുടകിൽ 41 ദുരിതാശ്വാസ ക്യാമ്പുകളും ദക്ഷിണ കന്നഡയിൽ ഒമ്പതു ക്യാമ്പുകളുമുണ്ട്​. ക്യാമ്പുകളിൽ ആവശ്യ​ത്തിന്​ കുടിവെള്ളവും പാലും ലഭ്യമാകുന്നുണ്ടെന്ന്​ ഉറപ്പുവരുത്തുമെന്നും കുമാരസ്വാമി പറഞ്ഞു. വീടുനഷ്​ടപ്പെട്ടവർക്ക്​ അഞ്ചു ലക്ഷം രൂപ നഷ്​ടപരിഹാരം കുമാരസ്വാമി സർക്കാർ നേരത്തെ പ്രഖ്യാപിച്ചിരുന്നു.