ബി.എസ്​.പിയിൽനിന്ന്​ പുറത്തായ എൻ. മഹേഷ്​ എം.എൽ.എ ബി.ജെ.പിയിൽ ചേർന്നു

ബംഗളൂരു: കൊല്ലഗൽ എം.എൽ.എ എൻ. മഹേഷ്​ ബി.ജെ.പിയിൽ ചേർന്നു. രണ്ടു ദശാബ്​ദത്തോളം കർണാടകയിൽ ബി.എസ്​.പിയുടെ മുഖമായിരുന്ന നേതാവാണ്​ മഹേഷ്​. കഴിഞ്ഞ നിയമസഭ തെരഞ്ഞെടുപ്പിൽ ജെ.ഡി-എസുമായുള്ള തെരഞ്ഞെടുപ്പ്​ സഖ്യത്തി​െൻറ ബലത്തിൽ ചാമരാജ്​ നഗറിലെ കൊല്ലഗലിൽനിന്ന്​ ആദ്യമായി നിയമസഭയിലെത്തിയ മഹേഷ്, സഖ്യ സർക്കാറിൽ വിദ്യാഭ്യാസ മന്ത്രിയായിരുന്നു. കർണാടകയുടെ ചരിത്രത്തിൽ ബി.എസ്​.പിയുടെ ആദ്യ എം.എൽ.എയായിരുന്നു അദ്ദേഹം.

സഖ്യ സർക്കാറിൽ വിമത നീക്കം ശക്തിപ്പെട്ട സമയത്ത്​ മന്ത്രിസ്​ഥാനം രാജിവെച്ച അദ്ദേഹം ഭരണപക്ഷത്തി​െൻറയും പ്രതിപക്ഷത്തി​െൻറയും ഭാഗമാവാതെ നിയമസഭയിൽ പ്രത്യേക ഇരിപ്പിടത്തിലായിരുന്നു. ബി.എസ്​.പി അധ്യക്ഷ മായാവതിയുടെ നിർദേശം അവഗണിച്ച്​, സഖ്യസർക്കാറി​െൻറ വിശവാസവോ​െട്ടടുപ്പിൽനിന്ന്​ വിട്ടുനിന്നതോടെ അദ്ദേഹത്തെ ബി.എസ്​.പിയിൽനിന്ന്​ പുറത്താക്കി. പിന്നീട്​ ബി.ജെ.പിയോട്​ ചേർന്നായിരുന്നു മ​േഹഷി​െൻറ ​പ്രവർത്തനം.

ബംഗളൂരു ബി.ജെ.പി ഒാഫിസിൽ നടന്ന ചടങ്ങിൽ മുഖ്യമന്ത്രി ബസവരാജ്​ ബൊമ്മൈ, മുൻ മുഖ്യമന്ത്രി ബി.എസ്​. യെദിയൂരപ്പ, ബി.ജെ.പി സംസ്​ഥാന അധ്യഷൻ നളിൻകുമാർ കട്ടീൽ, വൈസ്​ പ്രസിഡൻറ്​ ബി.വൈ. വിജയേന്ദ്ര തുടങ്ങിയവർ മഹേഷിനെ സ്വീകരിച്ചു. ദലിത്​ നേതാവായ മഹേഷി​െൻറ ബി.ജെ.പി പ്രവേശനം മൈസൂരു, ചാമരാജ്​ നഗർ മേഖലയിൽ പാർട്ടിക്ക്​ വേരോട്ടമുണ്ടാക്കുമെന്ന കണക്കുകൂട്ടലിലാണ്​ നേതാക്കൾ.