രാജസ്​ഥാനിൽ കിരോഡി ലാൽ മീണ ബി​.ജെ.പിയിലേക്ക്​

ജയ്​പുർ: രാജസ്​ഥാനിൽ ഇൗവർഷം അവസാനം നിയമസഭ തെരഞ്ഞെടുപ്പ്​ നടക്കാനിരിക്കെ, നാഷനൽ പീപ്ൾസ്​ പാർട്ടി (എൻ.പി.പി) എം.എൽ.എ കിരോഡി ലാൽ മീണ വീണ്ടും ബി.ജെ.പിയിൽ ചേരാൻ തീരുമാനിച്ചു. 2008ലാണ്​ ഇദ്ദേഹം ബി​.ജെ.പി വിട്ടത്​. മീണ സമുദായത്തി​​​െൻറ നേതാവായ കിരോഡി ലാൽ, ജലവിഭവ മന്ത്രി രാം പ്രതാപുമായി കൂടിയാലോചിച്ചാണ്​ ഇക്കാര്യത്തിൽ അന്തിമ തീരുമാനമെടുത്തത്​. വീട്ടിലേക്കുള്ള മടങ്ങിവരവാണ്​​ തന്നെ സംബന്ധിച്ച്​ ബി.ജെ.പിയി​ൽ ചേരലെന്ന്​ യോഗത്തിനുശേഷം മീണ മാധ്യമങ്ങളോട്​ പറഞ്ഞു.

പാർട്ടി ദേശീയ നേതൃത്വത്തെ ഇക്കാര്യം ധരിപ്പിച്ചതായും നേതാക്കൾ തിരക്കിലായതിനാൽ തീരുമാനം ഉടനുണ്ടാകുമെന്നാണ്​ പ്രതീക്ഷയെന്നും ബി.​െജ.പി സംസ്​ഥാന പ്രസിഡൻറ്​ അശോക്​ പർണമി പറഞ്ഞു. എൻ.പി.പിക്ക്​ മീണയടക്കം നാലു എം.എൽ.എമാരാണുള്ളത്​. അതിൽ മൂന്നുപേർ മേയിൽ ബി.ജെ.പിയിൽ ചേരാൻ തീരുമാനിച്ചിരുന്നു​. ബി.ജെ.പി വിട്ട ശേഷം 2009 ൽ മീണ സ്വതന്ത്ര സ്​ഥാനാർഥിയായാണ്​ മത്സരിച്ച്​ വിജയിച്ചത്​. 2013ൽ എൻ.പി.പിയിൽ ചേർന്നു.