മതസൗഹാർദത്തിനായി ക്ഷേത്രമുറ്റത്ത്​ നമസ്​കരിച്ചു; യു.പിയിൽ സാമൂഹിക പ്രവർത്തകൻ അറസ്​റ്റിൽ

ലഖ്​നോ: മതസാഹോദര്യം പ്രചരിപ്പിച്ച്​ നടത്തിയ തീർഥയാത്രക്കിടയിൽ അമ്പലമുറ്റത്ത്​ നമസ്​കരിച്ചതിന്​ സാമൂഹിക- മനുഷ്യാവകാശ പ്രവർത്തകൻ ഫൈസൽ ഖാനെ ഉത്തർപ്രദേശ്​ പൊലീസ്​ അറസ്​റ്റ്​ ചെയ്​തു. അതിർത്തി ഗാന്ധി എന്നറിയപ്പെടുന്ന ഖാൻ അബ്​ദുൽ ഗഫാർ ഖാൻ രൂപം നൽകിയ ഖുദായി ഖിദ്​മത്​ഗാർ (ദൈവിക സേവകർ) എന്ന സേവന സംഘടനയുടെ ദേശീയ കൺവീനറാണ്​ ഫൈസൽ ഖാൻ.

മതസൗഹാർദ സന്ദേശമുയർത്തി ഒക്​ടോബർ 24 മുതൽ 29 വരെ വിവിധ ആരാധനാലയങ്ങളിലേക്ക്​ ഖാൻ യാത്ര സംഘടിപ്പിച്ചിരുന്നു. 29ന്​ മഥുരയിലെ നന്ദ്​ബാബാ ക്ഷേത്രത്തിലെത്തിയ ഖാനും കൂട്ടുകാരും ഉച്ച നമസ്​കാരത്തിന്​ പോകാൻ ഒരുങ്ങിയപ്പോൾ അവിടെയുണ്ടായിരുന്ന നാട്ടുകാർ അമ്പലമുറ്റത്തുതന്നെ നമസ്​കരിക്കാൻ അനുമതി നൽകുകയായിരുന്നുവെന്ന്​ സ​ുഹൃത്തുക്കൾ പറയുന്നു. ക്ഷേത്ര പൂജാരിയുമായി മനുഷ്യസ്​നേഹത്തെക്കുറിച്ചും വേദങ്ങളെക്കുറിച്ചും ചർച്ച ചെയ്​താണ്​ ഖാൻ പിരിഞ്ഞത്​.

എന്നാൽ, ക്ഷേത്രമുറ്റത്ത്​ നമസ്​കരിക്കുന്ന ചിത്രം സമൂഹമാധ്യമങ്ങളിൽ പ്രചരിച്ചതോടെ ചിത്രം മാറി. ക്ഷേത്രപൂജാരി കൻഹാ ഗോസ്വാമിയുടെ പരാതിയിൽ മതസൗഹാർദം തകർക്കൽ, ആരാധനാലയങ്ങളുടെ പവിത്രത നശിപ്പിക്കൽ തുടങ്ങിയ വകുപ്പുകൾ ചുമത്തിയാണ്​ ഖാനെതിരെ കേസെടുത്തത്​. പ്രവൃത്തിക്കു പിന്നിൽ വിദേശ ഫണ്ടിങ്​ സംശയിക്കുന്നതായും പരാതിയിൽ ആരോപിക്കുന്നു.

കേസ്​ യു.പി രഹസ്യാന്വേഷണ വിഭാഗത്തിന്​ കൈമാറിയതായി മഥുര എസ്​.പി ഗൗരവ്​ അറോറ അറിയിച്ചു. മതവിഭാഗങ്ങൾക്കിടയിൽ ക​ുഴപ്പങ്ങളുണ്ടാക്കലായിരുന്നു സംഭവത്തി​െൻറ ലക്ഷ്യമെന്നും കുറ്റക്കാരെ വെറുതെ വിടില്ലെന്നും സംസ്ഥാന മന്ത്രി ശ്രീകാന്ത്​ ശർമ മുന്നറിയിപ്പ്​ നൽകി. ഖാ​െൻറ ഒപ്പമുണ്ടായിരുന്ന ചാന്ദ്​ മുഹമ്മദ്​, നിലേഷ്​ ഗുപ്​ത, സാഗർ രത്​ന എന്നിവർക്ക്​ വേണ്ടി പൊലീസ്​ തിരച്ചിൽ ആരംഭിച്ചിട്ടുണ്ട്​