തൊഴിലുറപ്പ് വേതനം: ലോക്സഭ സ്തംഭിപ്പിച്ച് കേരള എം.പിമാരുടെ പ്രതിഷേധം

ന്യൂ​ഡ​ൽ​ഹി: തൊ​ഴി​ലു​റ​പ്പ് വേ​ത​നം ന​ൽ​കാ​ത്തതി​ൽ പ്ര​തി​ഷേ​ധി​ച്ച് കേ​ര​ള​ത്തി​ൽ​നി​ന്നു​ള്ള എം.​പി​മാ​ർ ലോ​ക്സ​ഭ സ്തം​ഭി​പ്പി​ച്ച് പാ​ർ​ല​മെ​ന്റി​ന് മു​ന്നി​ൽ പ്ര​തി​ഷേ​ധി​ച്ചു. പ്ര​തി​പ​ക്ഷ നേ​താ​വ് രാ​ഹു​ൽ ഗാ​ന്ധി​യും വ​യ​നാ​ട് എം.​പി പ്രി​യ​ങ്ക ഗാ​ന്ധി​യും പ​​ങ്കെ​ടു​ത്തു. തൊ​ഴി​ലു​റ​പ്പ് പ​ദ്ധ​തി​യി​ൽ കേ​ന്ദ്രം ന​ൽ​കാ​നു​ള്ള കു​ടി​ശ്ശി​ക സം​ബ​ന്ധി​ച്ച് അ​ടൂ​ർ പ്ര​കാ​ശ് അ​ട​ക്ക​മു​ള്ള​വ​രു​ടെ ചോ​ദ്യ​ങ്ങ​ൾ​ക്ക് ന​ൽ​കി​യ മ​റു​പ​ടി പ്ര​തി​പ​ക്ഷ​ത്തെ പ്ര​കോ​പി​പ്പി​ക്കു​ന്ന​താ​യി​രു​ന്നു.

മ​ഹാ​ത്മാ​ഗാ​ന്ധി തൊ​ഴി​ലു​റ​പ്പ് പ​ദ്ധ​തി​യി​ൽ കു​ടി​ശ്ശി​ക ഉ​ട​ൻ ന​ൽ​കു​മെ​ന്ന് അ​ടൂ​ർ പ്ര​കാ​ശ് എം.​പി​യു​ടെ ചോ​ദ്യ​ത്തി​ന് ഗ്രാ​മ​വി​ക​സ​ന സ​ഹ​മ​ന്ത്രി ച​ന്ദ്ര​ശേ​ഖ​ർ പെ​മ്മ​സാ​നി മ​റു​പ​ടി ന​ൽ​കി. തൊ​ഴി​ലു​റ​പ്പ് തൊ​ഴി​ലാ​ളി​ക​ൾ​ക്ക് മൂ​ന്നു​മാ​സ​മാ​യി വേ​ത​നം ല​ഭി​ക്കാ​ത്ത​തും കേ​ര​ള​ത്തി​ന് പ​ദ്ധ​തി​യി​ൽ 811 കോ​ടി രൂ​പ കു​ടി​ശ്ശി​യുള്ള​തും ചൂ​ണ്ടി​ക്കാ​ണി​ച്ച​പ്പോ​ഴാ​യി​രു​ന്നു മ​ന്ത്രി​യു​ടെ മ​റു​പ​ടി. കു​റ​ഞ്ഞ വേ​ത​ന​വും മ​തി​യാ​യ തൊ​ഴി​ൽ​ദി​ന​ങ്ങ​ൾ ഇ​ല്ലാ​ത്ത​തും കാ​ര​ണം ആ​ളു​ക​ൾ പ​ദ്ധ​തി ഉ​പേ​ക്ഷി​ക്കുന്ന​ത് സം​ബ​ന്ധി​ച്ച ചോ​ദ്യ​ത്തി​ന് ഹ​രി​യാ​ന ക​ഴി​ഞ്ഞാ​ൽ കേ​ര​ള​ത്തി​ലാ​ണ് വേ​ത​നം കൂ​ടു​ത​ൽ ന​ൽ​കു​ന്ന​ത് എ​ന്നാ​യി​രു​ന്നു മ​ന്ത്രി​യു​ടെ മ​റു​പ​ടി.

ഈ ​വ​ർ​ഷം കേ​ര​ള​ത്തി​ന് 3,000 കോ​ടി രൂ​പ​ളം ന​ൽ​കി​. കു​ടി​ശ്ശി​ക ആ​ഴ്ച​ക​ൾ​ക്കു​ള്ളി​ൽ ന​ൽ​കുമെ​ന്നും മ​ന്ത്രി പ​റ​ഞ്ഞു. എ​ന്നാ​ൽ, കു​ടി​ശ്ശി​ക എന്ന് ന​ൽ​കു​മെ​ന്ന് പ​റ​യ​ണ​മെ​ന്ന് തൃ​ണ​മൂ​ൽ കോ​ൺ​ഗ്ര​സ് എം.​പി ബാ​പി ഹ​ൽ​ദാ​ർ ആ​വ​ശ്യ​പ്പെ​ട്ടു. തൊ​ഴി​ലു​റ​പ്പ് പ​ദ്ധ​തി​യി​ൽ മ​​ന്ത്രി ച​ന്ദ്ര​ശേ​ഖ​ർ പെ​മ്മ​സാ​നി ബം​ഗാ​ൾ സ​ർ​ക്കാ​റി​​ന്റെ സാ​മ്പ​ത്തി​ക ക്ര​മ​ക്കേ​ട് ആ​രോ​പി​ച്ച​തോ​ടെ തൃ​ണ​മൂ​ൽ കോ​ൺ​ഗ്ര​സ് എം.​പി​മാ​ർ പ്ര​തി​ഷേ​ധം ശ​ക്ത​മാ​ക്കി. പ്ര​തി​ഷേ​ധം ക​ന​ത്ത​തോ​ടെ ത​മി​ഴ്നാ​ടി​നോ​ടും പ​ശ്ചി​മ ബം​ഗാ​ളി​നോ​ടും വി​വേ​ച​നം കാ​ണി​ച്ചി​ട്ടി​ല്ലെ​ന്ന് ഗ്രാ​മ​വി​ക​സ​ന മ​ന്ത്രി ശി​വ​രാ​ജ് സി​ങ് ചൗ​ഹാ​ൻ പ​റ​ഞ്ഞു​വെ​ങ്കി​ലും അം​ഗ​ങ്ങ​ൾ ശാ​ന്ത​രാ​യി​ല്ല. പ്ര​തി​പ​ക്ഷം സ​ഭ​യു​ടെ ന​ടു​ത്ത​ളം വ​ള​ഞ്ഞ് മു​ദ്രാ​വാ​ക്യം വി​ളി​ച്ച് സ​ഭ സ്തം​ഭി​പ്പി​ച്ചു. സ​ഭ 12 മ​ണി​വ​രെ നി​ർ​ത്തി​വെ​ച്ച​തോ​ടെ കേ​ര​ള എം.​പി​മാ​ർ മു​ഖ്യ​ക​വാ​ട​ത്തി​ൽ പ്ര​തി​ഷേ​ധി​ക്കു​ക​യാ​യി​രു​ന്നു.