കോവിഡ് മുക്തരുടെ പട്ടികയിൽ കേരളമില്ല; പ്രതികരിക്കാതെ കേന്ദ്ര ആരോഗ്യ മന്ത്രാലയം

ന്യൂഡൽഹി: ഇന്ത്യയിലെ വിവിധ സംസ്​ഥാനങ്ങളിൽ കോവിഡ്​ മുക്​തരായവരുടെയും മരണപ്പെട്ടവരുടെയും ഡാറ്റകളിൽ വൻ അന്തരം. ഉദാഹരണമായി മെയ്​ ഏഴു വരെയുള്ള കണക്ക്​ പ്രകാരം 94 ശതമാനമാണ്​ കേരളത്തിൽ രോഗമുക്​തരായവരുടെ എണ്ണം. പഞ്ചാബിൽ ഇത്​ 9 ശതമാനവും. അതുപോലെ തെലങ്കാനയിൽ 62 ശതമാനമാണ്​ കോവിഡ്​ മുക്​തി നേടിയവരുടെ എണ്ണം. മഹാരാഷ്​ട്രയിൽ 17 ശതമാനവും. 

അതേസമയം, കേന്ദ്ര ആരോഗ്യ മന്ത്രാലയം പുറത്തവിട്ട കണക്കുപ്രകാരം രാജസ്​ഥാൻ (55 ശതമാനം), കർണാടക (52 ശതമാനം), ആന്ധ്രപ്രദേശ്​ (43 ശതമാനം), ഹരിയാന (42 ശതമാനം), ജമ്മുകശ്​മീർ (42 ശതമാനം) എന്നിവയാണ്​ ഏറ്റവും കൂടുതൽ രോഗമുക്​തരുള്ള സംസ്​ഥാനങ്ങൾ. ഈ പട്ടികയിൽ 94 ശതമാനം രോഗമുക്തരുള്ള കേരളത്തെ കുറിച്ച്​ പരാമർശിക്കുന്നേയില്ല. 

പശ്​ചിമ ബംഗാൾ (19 ശതമാനം), ഗുജറാത്ത് (24 ശതമാനം)​,തമിഴ്​നാട്​ (29 ശതമാനം), ഡൽഹി (32 ശതമാനം), മധ്യപ്രദേശ് (38 ശതമാനം)​ എന്നിവ ഏറ്റവും കുറച്ച്​ രോഗമുക്​തരുള്ള സംസ്​ഥാനങ്ങളും. ഇന്ത്യയിലെ ശരാശരി രോഗമുക്​തരുടെ എണ്ണം 30 ശതമാനമാണ്​. 

കോവിഡ്​ മരണനിരക്ക്​ ഏറ്റവും കൂടുതലുള്ള സംസ്​ഥാനങ്ങളിലൊന്നാണ്​ ബംഗാൾ. പിന്നാലെയുള്ള മധ്യപ്രദേശ്​, ഗുജറാത്ത്​ എന്നീ സംസ്​ഥാനങ്ങളിൽ അത്​ ആറു ശതമാനമാണ്​. ഡൽഹി, തമിഴ്​നാട്​, ജമ്മു കശ്​മീർ, ഹരിയാന, ബിഹാർ, കേരളം എന്നീ സംസ്​ഥാനങ്ങളിലെ കോവിഡ്​ മരണനിരക്ക്​ ഒരു ശതമാനമാണ്​. 

ഡാറ്റകൾ പ്രകാരം ആകെ രോഗബാധിതരും രോഗമുക്​തി നേടിയവരും തമ്മിലും നേരിട്ട്​ ബന്ധമില്ല. ഉദാഹരണമായി, കോവിഡ്​ മരണനിരക്ക്​ ഏറ്റവും കൂടുതലുള്ള സംസ്​ഥാനങ്ങളിലൊന്നായ​ ബംഗാളിൽ 1548 പേരാണ്​ രോഗമുക്​തരായത്​. കോവിഡ്​ മരണനിരക്ക്​ ഒരു ശതമാനമുള്ള ഡൽഹിയിൽ 5980 പേരും. രാജ്യത്തെ ശരാശരി കോവിഡ്​ മരണനിരക്ക്​ മൂന്നു ശതമാനമാണ്​. എന്തു കൊണ്ടാണിങ്ങനെ വൈരുധ്യമെന്ന ചോദ്യങ്ങൾക്ക്​ കേന്ദ്ര ആരോഗ്യ മന്ത്രാലയം പ്രതികരിച്ചിട്ടില്ല.