കഠ്​വ ചെറിയ സംഭവമെന്ന്​ കശ്​മീർ ഉപമുഖ്യമന്ത്രി

ശ്രീനഗർ:  കഠ്​വയിലെ പെൺകുട്ടിയുടെ ബലാൽസംഗം ചെറിയ സംഭവമാണെന്ന്​ ജമ്മുകശ്​മീർ ഉപമുഖ്യമന്ത്രി കവീന്ദർ ഗുപ്​ത. ഉപമുഖ്യമന്ത്രിയായി ചുമതലയേറ്റടുത്തയുടനാണ്​ കവീന്ദർ ഗുപ്​തയുടെ വിവാദ പ്രസ്​താവന. കഠ്​വയിൽ നടന്നത്​ ചെറിയ സംഭവമാണ്​. അതിന്​ ഇത്രത്തോളം പ്രാധാന്യം നൽകേണ്ട ആവശ്യമില്ലെന്ന്​ അദ്ദേഹം പറഞ്ഞു.

കഠ്​വ പോലുള്ള സംഭവം ഇനി ആവർത്തിക്കാതിരിക്കാനാണ്​ ശ്രദ്ധിക്കേണ്ടത്​. കഠ്​വയിൽ ബലാൽസംഗത്തിനിരയായി കൊല്ലപ്പെട്ട പെൺകുട്ടിക്ക്​ നീതി വാങ്ങി നൽകുക എന്നതാണ്​ സർക്കാറി​​​െൻറ മുന്നിലുള്ള ഇപ്പോഴത്തെ പ്രധാന വെല്ലുവിളി​യെന്നും അദ്ദേഹം പറഞ്ഞു. മെഹ്​ബൂബ മുഫ്​തിയുടെ നേതൃത്വത്തിലുള്ള പി.ഡി.പി-ബി.ജെ.പി മന്ത്രിസഭ ഇന്നാണ്​ എട്ട്​ മന്ത്രിമാരെ കൂടി ഉൾപ്പെടുത്തി പുന:സംഘടിപ്പിച്ചത്​. 

ജമ്മുകശ്​മീരിൽ മൂന്ന്​ തവണ മേയറായിരുന്നു ഗുപ്​ത 2014ലാണ്​ നിയമസഭ തെരഞ്ഞെടുപ്പിൽ മൽസരിക്കുന്നത്​. കോൺഗ്രസ്​ സ്ഥാനാർഥിയെ തോൽപ്പിച്ചാണ്​ അദ്ദേഹം നിയമസഭയിലെത്തിയത്​. സൻജുവാൻ ആർമി ക്യാമ്പിന്​ സമീപത്ത്​ താമസിക്കുന്ന റോഹിങ്ക്യകളാണ്​ ഫെബ്രുവരിയിലെ സൈനിക ക്യാമ്പിലെ തീവ്രവാദി ആക്രമണത്തിന്​ പിന്നിലെന്നും ഗുപ്​ത പറഞ്ഞിരുന്നു. ഇതും വിവാദത്തിന്​​ കാരണമായിരുന്നു.