എൻ.ഐ.എ കസ്​റ്റഡിയിലിരുന്ന കശ്​മീരി വനിതക്ക്​ കോവിഡ് സ്ഥിരീകരിച്ചു

ന്യൂഡല്‍ഹി: ഐ.എസുമായി ബന്ധപ്പെട്ട്​ ഭീകരാക്രമണം നടത്താന്‍ പദ്ധതിയിട്ടു, പൗരത്വ നിയമ ഭേദഗതിക്കെതിരെ പ്രക്ഷോഭം നടത്താന്‍ പ്രേരണ നല്‍കി എന്നീ കേസുകളിൽ ദേശീയ അന്വേഷണ ഏജന്‍സിയുടെ (എന്‍.ഐ.എ) കസ്​റ്റഡിയില്‍ കഴിയുന്ന കശ്​മീരി വനിതക്ക്​ കോവിഡ് 19 സ്ഥിരീകരിച്ചു.

വൈറസ്​ ബാധ സ്​ഥിരീകരിച്ച ഹിന ബഷീര്‍ ബേഗി​െന ഡല്‍ഹിയിലെ ലോക് നായക് ജയ് പ്രകാശ് ആശുപത്രിയിലേക്ക് മാറ്റാന്‍ കോടതി ഉത്തരവിട്ടു. ​കൊറോണ വൈറസ്​ കേസുകൾ കൊണ്ട്​ വീർപ്പുമുട്ടുന്ന ഡൽഹിയിൽ മതിയായ ചികിത്സ സൗകര്യങ്ങൾ ഇല്ലാത്തതിനാൽ ഇവർക്ക്​ രണ്ട്​ മാസത്തെ ഇടക്കാല ജാമ്യം അനുവദിക്കണമെന്ന ഹരജി കോടതിയുടെ പരിഗണനയിലാണ്​. ഹിനയുടെ ഭര്‍ത്താവ് ജഹാന്‍സെയ്ബ് സമി, ഇവർക്കൊപ്പം കസ്​റ്റഡിയിലായ അബ്​ദുൽ ബാസിത്ത്​ എന്നിവരെ ജുഡീഷ്യൽ കസ്​റ്റഡിയിൽ വിട്ടു.  

ഇസ്​ലാമിക്​ സ്​റ്റേറ്റ്​ ഖൊറാസൻ പ്രൊവിൻസ്​ (ഐ.എസ്​.കെ.പി) എന്ന ഭീകര സംഘടനയുമായി ബന്ധമുണ്ടെന്നാരോപിച്ച്​ മാർച്ച്​ 23നാണ്​ മൂവരെയും ഡൽഹി ​പൊലീസി​ലെ സ്​പെഷൽ സെൽ അറസ്​റ്റ്​ ചെയ്യുന്നത്​. ഇവർ ഇന്ത്യയിൽ ഭീകരാക്രമണം പദ്ധതിയി​ട്ടെന്നും പൗരത്വ നിയമ ഭേദഗതിക്കെതിരെ പ്രക്ഷോഭം നടത്താൻ പ്രേരണ നൽകിയെന്നും ചൂണ്ടിക്കാട്ടി കേസ്​ പിന്നീട്​ എൻ.ഐ.എക്ക്​ കൈമാറി.

ഐ.എസ്​.കെ.പിയിലേക്ക്​ യുവാക്കളെ റിക്രൂട്ട്​ ചെയ്യാൻ ഇവർ ശ്രമിച്ചിരുന്നെന്നും എൻ.ഐ.എ പറയുന്നു. ജഹാൻസെയ്​ബും ബാസിത്തും നടത്തിയ സംഭാഷണത്തിൽ നിന്ന്​ ഇവർ ട്ര​ക്കോ ലോറിയോ ആൾക്കൂട്ടത്തിനിടയിലേക്ക്​ ഓടിച്ചുകയറ്റി നിരവധി പേരെ കൊല്ലാൻ യുവാക്കളെ പേരിപ്പിച്ചതിന്​ തെളിവുകൾ കിട്ടിയെന്നും എൻ.ഐ.എ ചൂണ്ടിക്കാട്ടിയിരുന്നു. മൂന്നുപേരും ഐ.എസ്​.കെ.പിയുടെ ഇന്ത്യയിലെ പ്രവർത്തനങ്ങൾക്ക്​ നേതൃത്വം നൽകുന്ന അബു ഉസ്​മാൻ അൽ കശ്​മീരിയുമായി ബന്ധ​പ്പെട്ടിരുന്നെന്നും എൻ.ഐ.എ പറയുന്നു.  

ഇവരുടെ സ്രവ സാമ്പിള്‍ കോവിഡ്​ പരിശോധനയ്ക്ക് അയയ്ക്കാന്‍ ജൂണ്‍ ആറിനാണ്​ കോടതി നിർദേശിച്ചത്​. ഇതിൽ ഹിനയുടെ ഫലം പൊസിറ്റിവ്​ ആയെന്നാണ്​ എൻ.ഐ.എ കോടതിയെ അറിയിച്ചത്​.