കർണാടക തദ്ദേശസ്​ഥാപനങ്ങളിൽ കോൺഗ്രസ്​-ജനതാദൾ സഖ്യം; ബി.ജെ.പിക്ക്​ പലയിടത്തും ഭരണം നഷ്​ടമാവും

ബംഗളൂരു: കർണാടക തദ്ദേശ തെരഞ്ഞെടുപ്പിൽ കോൺഗ്രസും ജെ.ഡി^എസും സഖ്യമില്ലാതെയാണ്​ മത്സരിച്ചതെങ്കിലും ബി.ജെ.പിയെ ഭരണത്തിൽ നിന്നകറ്റാൻ നിയമസഭ തെരഞ്ഞെടുപ്പിനു ശേഷം സ്വീകരിച്ച അടവുനയം തന്നെ തദ്ദേശ തെരഞ്ഞെടുപ്പിലും സ്വീകരിക്കും. ബി.ജെ.പിക്ക്​ ഭൂരിപക്ഷമുള്ള തദ്ദേശ സ്​ഥാപനങ്ങളിലും കോൺഗ്രസും ജെ.ഡി^എസും കൈകോർത്ത്​ ഭരിക്കാനാണ്​ തീരുമാനം. ഇതോടെ ബി.ജെ.പിക്ക്​ പലയിടത്തും ഭരണം നഷ്​ടമാവും.

മൊത്തം സീറ്റുകളുടെ എണ്ണത്തിൽ കോർപറേഷനുകളിലും സിറ്റി മുനിസിപ്പാലിറ്റിയിലും ബി.ജെ.പിയും ടൗൺ മുനിസിപ്പാലിറ്റിയിലും ടൗൺ പഞ്ചായത്തുകളിലും കോൺഗ്രസുമാണ്​ മുന്നിൽ. മൈസൂരു, ശിവമൊഗ്ഗ, തുമകുരു കോർപറേഷനുകളിൽ ശിവമൊഗ്ഗ ബി.ജെ.പി നിലനിർത്തി. നേരത്തേ ജെ.ഡി-എസും ബി.ജെ.പിയും അധികാരം പങ്കിട്ട മൈസൂരു കോർപറേഷനിലും കോൺഗ്രസ്​ ഭരിച്ച തുമകുരു കോർപറേഷനിലും ഇത്തവണ ആർക്കും ഭൂരിപക്ഷമില്ല. ശിവമൊഗ്ഗ കോർപറേഷനിൽ ആകെയുള്ള 35 സീറ്റിൽ ബി.ജെ.പി- 20, കോൺഗ്രസ്​- ഏഴ്​, ജെ.ഡി(എസ്​) - രണ്ട്​, മറ്റുള്ളവർ -ആറ്​ എന്നിങ്ങനെയാണ്​ കക്ഷിനില. മൈസൂരുവിൽ 65 സീറ്റിൽ ബി.ജെ.പി-22ഉം കോൺഗ്രസ്​ 19ഉം ജെ.ഡി-എസ്​ 18ഉം സ്വതന്ത്രർ ആറും നേടിയപ്പോൾ തുമകുരുവിലെ 35 സീറ്റിൽ ബി.ജെ.പി 12ഉം കോൺഗ്രസ് 10ഉം ജനതാദൾ എസ്​ 10ഉം സ്വതന്ത്രർ മൂന്നും സീറ്റിൽ വിജയിച്ചു.

കോർപറേഷനുകളിലെ 135 സീറ്റിൽ ബി.ജെ.പി 54 എണ്ണവും കോൺഗ്രസ്​ 36ഉം ജെ.ഡി-എസ്​ 30 ഉം സീറ്റ്​ നേടി. സ്വതന്ത്ര സ്​ഥാനാർഥികൾ 14 സീറ്റിലും ബി.എസ്​.പി ഒരു സീറ്റിലും വിജയിച്ചു. നഗരസഭകളിലെ 926 സീറ്റിൽ ബി.ജെ.പി 370 എണ്ണം കൈക്കലാക്കി. കോൺഗ്രസ്​- 294, ജെ.ഡി-എസ്​ -106, സ്വതന്ത്രർ- 123, എസ്​.ഡി.പി.​െഎ- 13, ബി.എസ്​.പി- 10, കെ.പി.ജെ.പി-10 എന്നിങ്ങനെയാണ്​ മറ്റു കക്ഷി നില. ടൗൺ പഞ്ചായത്തിലെ 355 സീറ്റിൽ 138 എണ്ണം കോൺഗ്രസിനൊപ്പമാണ്​.

ബി.ജെ.പി 130ഉം ജെ.ഡി-എസ് 57ഉം സ്വതന്ത്രർ 29ഉം ന്യൂ ഇന്ത്യൻ കോൺഗ്രസ്​ ഒന്നും സീറ്റ്​ നേടി. മുനിസിപ്പാലിറ്റി കൗൺസിലിലെ 1246 സീറ്റുകളിൽ ​514 ആണ്​ കോൺഗ്രസി​​​െൻറ നേട്ടം. ബി.ജെ.പി- 375, ജെ.ഡി-എസ്​- 210, സ്വതന്ത്രർ -135, എസ്​.ഡി.പി.​െഎ-നാല്​, എസ്​.പി- നാല്​, ബി.എസ്​.പി- രണ്ട്​, കെ.ആർ.ആർ.എസ്​- ഒന്ന്​, വെൽഫെയർ പാർട്ടി- ഒന്ന്​ എന്നിങ്ങനെയാണ്​ മറ്റുള്ളവരുടെ നേട്ടം. മഴക്കെടുതി കണക്കിലെടുത്ത്​ കുടകിലെ സോമവാർപേട്ട, വീരാജ്​പേട്ട, കുശാൽ നഗർ എന്നിവിടങ്ങളിലെ തെരഞ്ഞെടുപ്പ്​ മാറ്റി​െവച്ചിരുന്നു.