കർണാടകയിൽ തൊഴിലാളികൾക്ക്​ വേണ്ടി ഇടപെട്ട ഐ.എ.എസ്​ ഓഫിസറെ മാറ്റി 

ബംഗളൂരു: ലോക്​ഡൗണിൽ ബുദ്ധിമുട്ടിയ അന്തർ സംസ്​ഥാന തൊഴിലാളികളുടെ പ്രശ്​നങ്ങൾ പരിഹരിക്കാൻ മുൻകൈയെടുത്ത മുതിർന്ന ഐ.എ.എസ്​ ഓഫിസറെ കർണാടക സർക്കാർ ചുമതലയിൽ നിന്ന്​ മാറ്റി. തൊഴിൽ വകുപ്പ്,​ ഇൻഫർമേഷൻ ആൻറ്​ പബ്ലിക്​ റിലേഷൻസ്​ പ്രിൻസിപ്പൽ സെക്രട്ടറി ക്യാപ്​റ്റൻ മണിവണ്ണനെയാണ്​ തിങ്കളാഴ്​ച വൈകീട്ട്​ മാറ്റിയത്​. 

സ്​ഥലം മാറ്റം സംബന്ധിച്ച മുന്നറിയിപ്പോ, പുതിയ ചുമതലയെ കുറിച്ചുള്ള വിവരങ്ങളോ ഇദ്ദേഹത്തിന്​ നൽകിയിട്ടില്ല. ഐ.എ.എസ്​ ഓഫിസറായ മഹേശ്വർ റാവുവിനെ തൽസ്​ഥാനത്ത്​ നിയമിക്കുകയും ചെയ്​തു. 

രണ്ടുമാസം മുമ്പ്​ കർണാടകയിൽ ആദ്യമായി കോവിഡ്​ റിപ്പോർട്ട്​ ചെയ്​തതുമുതൽ അതിനെതിരെ പോരാടാൻ സാമൂഹിക മാധ്യമമായ ടെലഗ്രാം വഴി വോളൻറിയർമാരുടെ സംഘത്തെ ക്യാപ്​റ്റൻ മണിവണ്ണൻ​ സജ്ജമാക്കിയിരുന്നു. കോവിഡിനെ കുറിച്ച്​ ജനങ്ങളിൽ ആശങ്കയുണ്ടാക്കുന്ന വാർത്തകൾക്കെതിരെയായിരുന്നു തുടക്കത്തിൽ  പ്രവർത്തിച്ചത്. പിന്നീട്​ ലോക്​ഡൗണിൽ ബുദ്ധിമുട്ടനുഭവിക്കുന്ന അന്തർ സംസ്​ഥാന തൊഴിലാളികൾക്ക്​ സഹായമെത്തിക്കാനുള്ള ശ്രമങ്ങൾ ഊർജിതമാക്കി. ലോക്​ഡൗണിനിടെ തൊഴിൽ നിയമങ്ങളിൽ ഉദാരത വരുത്താൻ തീരുമാനിച്ചപ്പോൾ തൊഴിലാളികളുടെ അവകാശങ്ങൾക്കായി മണിവണ്ണൻ വാദിച്ചിരുന്നു. ഇതിനു പിന്നാലെയാണ്​ സർക്കാർ സ്ഥലംമാറ്റ ഉത്തരവ്​ പുറത്തിറക്കിയത്​. 

ഉത്തർപ്രദേശ്​ മാതൃകയിൽ ബംഗളൂരുവിലുള്ള തൊഴിലാളി സംഘടനയാണ്​ ഇദ്ദേഹത്തെ മാറ്റണമെന്നാവശ്യപ്പെട്ട്​ മുഖ്യമന്ത്രി ബി.എസ്​ യെദ്യൂരപ്പക്ക്​ കത്തെഴുതിയത്​. കോവിഡ്​ കാലത്ത്​ ശമ്പളം കൊടുക്കാൻ നിർവാഹമില്ലാത്ത തൊഴിലുടമകൾക്കെതിരെ പരാതി നൽകാൻ തൊഴിൽ വകുപ്പ്​ സെക്രട്ടറി പ്രേരിപ്പിച്ചുവെന്നാ​യിരുന്നു കത്തിലുന്നയിച്ച ആരോപണം. അതേസമയം ഇൻഫർമേഷ​ൻ വകുപ്പിലെ ചുമതലയിൽനിന്ന്​ ഇദ്ദേഹത്തെ ഒഴിവാക്കിയോ എന്നതിൽ വ്യക്​തയില്ല. ​സ്​ഥലംമാറ്റ ഉത്തരവ്​ പുറത്തുവന്നതിനു പിന്നാലെ ഇദ്ദേഹത്തെ തിരിച്ചെടുക്കണമെന്നാവശ്യപ്പെട്ട്​ സാമൂഹിക മാധ്യമങ്ങളിൽ ബ്രിങ്​ബാക്​ ക്യാപ്​റ്റൻ എന്ന ഹാഷ്​ടാഗിൽ പ്രചാരണം തുടങ്ങിയിട്ടുണ്ട്​​.