അമൂല്യ കേസ്​ എൻ.​ഐ.എക്ക്​ കൈമാറാൻ മാത്രം എന്താണ്​ പ്രത്യേകതയെന്ന്​ കർണാടക ​ഹൈകോടതി

ബംഗളൂരു: അമൂല്യ ലിയോണ നെറോണക്കെതിരായ കേസ്​ ദേശീയ അന്വേഷണ ഏജൻസിക്ക് (എൻ.​ഐ.എ) കൈമാറാൻ മാത്രം എന്ത്​ പ്രത്യേകതയാണുള്ളതെന്ന്​ കർണാടക ഹൈകോടതി. അമൂല്യക്കെതിരായ രാജ്യദ്രോഹകേസ്​ എൻ.​ഐ.എക്ക്​ ​ൈകമാറണമെന്ന്​ ആവശ്യപ്പെട്ട്​ അഭിഭാഷകനായ പവനചന്ദ്ര ഷെട്ടി നൽകിയ ഹരജി പരിഗണിക്കവെയാണ്​ ചീഫ്​ ജസ്​റ്റിസ്​ അഭയ്​ ശ്രീനിവാസ ഒാഖ, ജസ്​റ്റിസ്​ നടരാജ്​ രംഗസ്വാമി എന്നിവരടങ്ങുന്ന ബെഞ്ചി​​െൻറ ചോദ്യം. 

കേസ്​ ശരിയായ രീതിയിൽ അന്വേഷിക്കാനും 90 ദിവസത്തിനകം കുറ്റപത്രം സമർപ്പിക്കാനും കർണാടക പൊലീസിന്​ കഴിഞ്ഞില്ലെന്ന്​ ഹരജിയിൽ ചൂണ്ടിക്കാട്ടിയ അഭിഭാഷകൻ, അമൂല്യ കേസ്​ ഗൗരവമുള്ളതാണെന്ന്​ വാദിച്ചു. എന്നാൽ,  നിശ്​ചിത സമയത്തിനകം സർക്കാർ കുറ്റപത്രം സമർപ്പിക്കാതിരുന്ന ഏക കേസാണോ ഇതെന്നായിരുന്നു കോടതിയുടെ ചോദ്യം. 

അമൂല്യയുടെ ജാമ്യം റദ്ദാക്കണമെന്ന അഭിഭാഷക​​െൻറ ആവശ്യം നിരസിച്ച കോടതി, 90 ദിവസത്തിനകം കുറ്റപത്രം സമർപ്പിച്ചില്ലെങ്കിൽ പ്രതിക്ക്​ ജാമ്യം അനുവദിക്കുന്നത്​ ഒഴിവാക്കാനാവില്ലെന്നും വ്യക്തമാക്കി. കേസ്​ ജൂലൈ 20ന്​ വീണ്ടും പരിഗണിക്കും. 

പൗരത്വ ഭേദഗതി നിയമത്തിനെതിരെ ഫെബ്രുവരി 20ന്​ ബംഗളൂരു ഫ്രീഡം പാർക്കിൽ നടന്ന പ്രതിഷേധ പരിപാടിയിൽ പാകിസ്​താൻ അനുകൂല മുദ്രാവാക്യം വിളിച്ചു എന്ന പേരിലാണ്​  19കാരിയായ വിദ്യാർഥിനി അമൂല്യക്കെതിരെ രാജ്യദ്രോഹക്കുറ്റം ചുമത്തി ബംഗളൂരു പൊലീസ്​ അറസ്​റ്റ്​ ചെയ്​തത്​. 

പരപ്പന അഗ്രഹാര സെൻട്രൽ ജയിലിൽ കഴിഞ്ഞിരുന്ന അമൂല്യക്ക്​ ജാമ്യം അനുവദിക്കുന്നതിനെ കർണാടക സർക്കാർ എതിർത്തെങ്കിലും കുറ്റപത്രം നിശ്ചിത കാലയളവിനുള്ളിൽ സമർപ്പിച്ചില്ലെന്ന കാരണം ചൂണ്ടിക്കാട്ടി, ബംഗളൂരു മെട്രോപൊളിറ്റൻ മജിസ്​ട്രേറ്റ്​ കോടതി ജൂൺ 10ന്​ അമൂല്യക്ക്​ ജാമ്യം അനുവദിച്ചിരുന്നു. ബംഗളൂരുവിലെ കോളജിൽ ജേണലിസം വിദ്യാർഥിനിയായ അമൂല്യയുടെ അറസ്​റ്റിന്​ പിന്നാലെ അമൂല്യയുടെ മാതാപിതാക്കൾ താമസിക്കുന്ന ചിക്കമഗളൂരു കൊപ്പയിലെ വീടിനുനേരെ ഹിന്ദുത്വ സംഘടനകളുടെ നേതൃത്വത്തിൽ അക്രമം അരങ്ങേറിയിരുന്നു.