മുൻ ജയിൽ ഡി.​െഎ.ജി രൂപക്ക്​ രാഷ്​ട്രപതിയുടെ​ മെഡൽ

ബംഗളൂരു: ജയിലിൽ കഴിയുന്ന അണ്ണാ ഡി.​എം.കെ നേതാവും ജയലളിതയുടെ തോഴിയുമായിരുന്ന ശശികലക്ക്​ അനധികൃത സൗകര്യങ്ങൾ ലഭിക്കുന്നുവെന്ന റിപ്പോർട്ടിലൂടെ ശ്രദ്ധനേടിയ കർണാടകയി​ലെ മുൻ ജയിൽ ഡി.​െഎ.ജി രൂപക്ക്​ രാഷ്​ട്രപതിയുടെ മെഡൽ. രാജ്​ഭവനിൽ നടന്ന ചടങ്ങിലാണ്​ മികച്ച സേവനത്തിന്​ അവർ മെഡൽ ഏറ്റുവാങ്ങിയത്​. 2016ൽ രാഷ്​​ട്രപതിയുടെ പൊലീസ്​ മെഡലും ലഭിച്ചിട്ടുണ്ട്​. 

ജയിൽ സൂപ്രണ്ട്​ ഉൾപ്പെടെയുള്ളവർ പണം വാങ്ങി ശശികലക്ക്​ നിയമവിരുദ്ധ സൗകര്യങ്ങൾ നൽകുന്നതായുള്ള റിപ്പോർട്ട്​ രൂപ പുറത്തുവിട്ടത്​ ഏറെ വിവാദമായിരുന്നു. ഇതേതുടർന്ന്​ സർക്കാർ ഇവർക്കെതിരെ നടപടിയെടുത്തു. ജയിൽ ഡി.​െഎ.ജി പദവിയിൽ നിന്ന്​ മാറ്റിയ രൂപയെ ​ട്രാഫിക്​ ആൻഡ്​ റോഡ്​ സുരക്ഷ വിഭാഗത്തിലാണ്​ നിയമിച്ചത്​.