കർണാടക സി.ഡി വിവാദം: ​രമേഷ്​ ജാർകിഹോളിക്കെതിരെ പെൺകുട്ടി പരാതി നൽകി; കേസെടുത്തു

ബംഗളൂരു: കർണാടക സി.ഡി വിവാദത്തിൽ മുൻ മന്ത്രി രമേഷ്​ ജാർകിഹോളിക്കെതിരെ പെൺകുട്ടി ബംഗളൂരു പൊലീസ്​ കമീഷണർക്ക്​ പരാതി നൽകി. ഇവരുടെ പരാതിയുടെ അടിസ്ഥാനത്തിൽ കുബ്ബൺ ​പാർക്ക്​ പൊലീസ്​ ജാർകിഹോളിക്കെതിരെ കേസെടുത്തു. സുരക്ഷയിൽ ഭയമുണ്ടെന്നും പെൺകുട്ടി പരാതിയിൽ ചൂണ്ടിക്കാട്ടിയിട്ടുണ്ട്​.

അഭിഭാഷകൻ മുഖേനയാണ്​ അവർ ബംഗളൂരു പൊലീസിനെ സമീപിച്ചത്​. ഐ.പി.സി സെക്ഷൻ 376 സി, 354എ, 504, 506, 417, 67എ തുടങ്ങിയ വകുപ്പുകൾ പ്രകാരമാണ്​ ജാർകിഹോളിക്കെതിരെ കേസെടുത്തത്​.

ജാർകിഹോളി​ കേസിൽ മുൻകൂർ ജാമ്യാപേക്ഷ സമർപ്പിക്കുമെന്നാണ്​ സൂചന. നേരത്തെ പ്രത്യേക അന്വേഷണസംഘം ജാർകിഹോളിയുടെ മൊഴിയെടുത്തിരുന്നു. ഇപ്പോൾ ജാർകിഹോളിക്കെതിരെ രജിസ്റ്റർ ചെയ്​ത കേസും പ്രത്യേക ​അന്വേഷണ സംഘത്തിന്​ കൈമാറുമെന്നാണ്​ സൂചന.