‘കുതിരകൾ ഒളിച്ചോടിയാൽ മാത്രമേ നമ്മൾ ഉണരൂ’ -കോൺഗ്രസ്​ നേതൃത്വത്തിനെതിരെ കപിൽ സിബൽ

ന്യൂഡൽഹി: രാജസ്ഥാനിലെ കോൺഗ്രസ്​ ഭരണം അട്ടിമറിക്കാനുള്ള ബി.ജെ.പി ശ്രമം ചെറുക്കുന്നതിൽ പാർട്ടി ​നേതൃത്വം കാണിക്കുന്ന അലസതയെ വിമർശിച്ച്​ മുതിർന്ന കോൺഗ്രസ്​ നേതാവ്​ കപിൽ സിബൽ. സംസ്​ഥാന രാഷ്​ട്രീയത്തിൽ പ്രതിസന്ധി രൂക്ഷമാകുന്നതിനിടെ 12 എം.എൽ.എമാരുമായി കോൺഗ്രസ്​ നേതാവും ഉപമുഖ്യമന്ത്രിയുമായ സചിൻ പൈലറ്റ്​ ​ഡൽഹിയിലെത്തിയിരുന്നു.

മുഖ്യമന്ത്രി അശോക്​ ഗെഹ്​ലോട്ട്​ അട്ടിമറി ആരോപണവുമായി രംഗത്തെത്തിയതിന്​ പിന്നാലെയായിരുന്നു ഇത്​.​ ഇതേത്തുടർന്നാണ്​ സംഘടനാ പ്രശ്‌നങ്ങൾ കൈകാര്യം ചെയ്യുന്നതിൽ പാർട്ടിക്ക്​ സംഭവിക്കുന്ന വീഴ്​ചയിൽ അതൃപ്​തി രേഖപ്പെടുത്തി സിബൽ ട്വീറ്റ്​ ചെയ്​തത്​.

“ഞങ്ങളുടെ പാർട്ടിയുടെ കാര്യത്തിൽ വിഷമമുണ്ട്​. നമ്മുടെ കുതിരപ്പന്തിയിൽനിന്ന്​ കുതിരകൾ ഒളിച്ചോടിയ ശേഷം മാത്രമേ നാം ഉണരുകയുള്ളൂ?’’ എന്നായിരുന്നു കപിലി​​െൻറ ട്വീറ്റ്​. രാജസ്ഥാനിലെ ഗെഹ്​ലോട്ട്​ -പൈലറ്റ്​ കലഹത്തിൽ പാർട്ടി ഹൈക്കമാൻഡി​​െൻറ മൗനം സംബന്ധിച്ചാണ്​ ഈ പരാമർശം.

സംസ്ഥാനത്ത് സർക്കാർ രൂപവത്​കരണം മുതൽ ഇരുവിഭാഗവും തമ്മിൽ അസ്വാരസ്യമുണ്ടായിരുന്നു. കഴിഞ്ഞ കുറച്ച് മാസങ്ങളായി ഇത്​ രൂക്ഷമായി. ഏറ്റവുമൊടുവിൽ, എം.എൽ.എമാർക്ക്​ 15 കോടി നൽകി സർക്കാറിനെ അട്ടിമറിക്കാൻ ബി.ജെ.പി ശ്രമിക്കുകയാണെന്ന്​ അശോക്​ ഗെഹ്​ലോട്ട് ആരോപിച്ചിരുന്നു. ഇതിനിടെയാണ്​ 12 എം.എൽ.എമാരുമായി സചിൻ പൈലറ്റ്​ ​ഡൽഹിയിലെത്തിയത്​. കോൺഗ്രസ്​ ഹൈക്കമാൻഡുമായി സചിൻ ​െപെലറ്റ്​ ചർച്ച നടത്തുമെന്നും ​ റിപ്പോർട്ടുണ്ട്​. എന്നാൽ, ബി.ജെ.പി ക്യാമ്പിലേക്ക്​ പോകാനുള്ള മുന്നൊരുക്കമാണ്​ സചി​ൻ വിഭാഗം നടത്തുന്നതെന്ന അഭ്യൂഹവും ഉയരുന്നുണ്ട്​.

സമാനരീതിയിൽ മധ്യപ്രദേശിൽ മുൻ മുഖ്യമന്ത്രി കമൽ നാഥും ജ്യോതിരാദിത്യ സിന്ധ്യയും തമ്മിലുള്ള ഏറ്റുമുട്ടൽ കോൺഗ്രസിന്​ ഭരണം നഷ്​ടമാവുന്നതിലാണ്​ കലാശിച്ചത്​. സിന്ധ്യയും കൂട്ടാളികളും കൂട്ടത്തോടെ ബി.ജ.പി.യിൽ ചേക്കേറിയതോടെ കമൽനാഥ്​ പുറത്താവുകയായിരുന്നു. ഈ സാഹചര്യം രാജസ്ഥാനിൽ ആവർത്തിക്കാതിരിക്കാനാണ്​ കോൺഗ്രസ്​ നേതൃത്വത്തി​​െൻറ ശ്രമം. ഇതിനിടെയാണ്​ ജാഗ്രതക്കുറവ്​ ചൂണ്ടിക്കാട്ടി കപിൽ സിബൽ രംഗത്തെത്തിയത്​. 
 

Worried for our party

Will we wake up only after the horses have bolted from our stables ?

— Kapil Sibal (@KapilSibal) July 12, 2020