ഡൽഹിയിൽ ബി.​െജ.പി അധികാരത്തിലെത്തു​ം -കപിൽ മിശ്ര

ന്യൂഡൽഹി: ഡൽഹിയിൽ ബി.ജെ.പി സർക്കാർ രൂപവത്​കരിക്കുമെന്ന്​ പാർട്ടി നേതാവ്​ കപിൽ മിശ്രയുടെ ട്വീറ്റ്​. ശനിയാഴ്​ച നടന്ന വോ​ട്ടെടുപ്പുമായി ബന്ധപ്പെട്ട്​ വിവാദം കനക്കുന്നതിനിടെയാണ്​ മിശ്രയുടെ ട്വീറ്റ്​. മുഴുവൻ എക്​സിറ്റ്​ പോൾ ഫലങ്ങളും ആം ആദ്​മി പാർട്ടി അധികാരത്തിലെത്തുമെന്ന്​ പ്രവചിച്ചിരുന്നെങ്കില​ും ബി.ജെ.പി തന്നെ അധികാരത്തിലെത്തുമെന്നാണ്​ നേതാക്കളുടെ പ്രതികരണങ്ങൾ.

എന്നാൽ, വോട്ടു​ യന്ത്രത്തിൽ വ്യാപകമായി തിരിമറി നടന്നതായി ആം ആദ്​മിയും കോൺഗ്രസും ആരോപണം ഉന്നയിച്ചിരുന്നു. വോട്ടു യന്ത്രങ്ങൾ സൂക്ഷിച്ച സ്​ട്രോങ്​ റൂമുകൾക്ക്​ കാവൽ നിൽക്കാൻ ആം ആദ്​മി ആഹ്വാനം ചെയ്​തിരുന്നു. വോട്ടു യന്ത്രങ്ങൾ പൊലീസ്​ സഹായത്തോടെ കടത്തുന്നതി​​െൻറ വിഡിയോ ദൃശ്യങ്ങളും ആം ആദ്​മി പുറത്തുവിട്ടിരുന്നു.
​

പോളിങ്​ അവസാനിച്ച്​ 24 മണിക്കൂറിന്​ ശേഷവും പോളിങ്​ ശതമാനം പുറത്തുവിടാത്ത തെരഞ്ഞെടുപ്പ്​ കമ്മീഷ​​െൻറ നിലപാട്​ വിവാദമായിരുന്നു. ഇതിനെതിരെ ആം ആദ്​മി പാർട്ടി ശക്തമായ വിമർശനമുയർത്തിയതിന്​ ശേഷമാണ്​ കമ്മീഷൻ ശതമാന കണക്ക്​ പുറത്തുവിട്ടത്​. എന്നാൽ, ഇത്​ വോട്ടു യന്ത്രത്തിൽ തിരിമറി നടത്താനാണെന്നാണ്​ ആരോപണം.