അർണബിന്‍റെ ഇറോ​ട്ടോ മാനിയ പരാമർശത്തിൽ പ്രതികരിച്ച്​ കങ്കണ; ചോർന്ന ചാറ്റുകൾ വായിക്കാൻ നാണമില്ലേയെന്നും ചോദ്യം

ടി.വി അവതാരകൻ അർണബ്​ ഗോസ്വാമിയും ടെലിവിഷൻ റേറ്റിങ്​ കമ്പനിയായ ബാർക്​ സി.ഇ.ഒയ​ും തമ്മിലുള്ള വാട്​സ്​ആപ്പ്​ ചാറ്റുകളിൽ തന്നെക്കുറിച്ചുള്ള പരാമർശത്തിൽ പ്രതികരിച്ച്​ നടി കങ്കണറണാവത്ത്​. ചാറ്റിൽ കങ്കണക്ക്​ 'ഇറോ​ട്ടോ മാനിയ' ആണെന്നാണ്​ അർണബ്​ പറഞ്ഞത്​​. ബോളിവുഡ്​ നടൻ ഹൃതിക്​ റോഷനുമായുള്ള കങ്കണയുടെ തർക്കങ്ങൾ നടക്കുന്ന സമയത്തെ ചാറ്റുകളിലാണ്​ കങ്കണയും കടന്നുവരുന്നത്​. 'കങ്കണ പരിധിവിടുകയാണെന്നും' 'ആളുകൾക്ക്​ അവളെ പേടിയാണെന്നും' അർണബ്​ വാട്​സാപ്പിൽ കുറിച്ചിരുന്നു. ഗോസിപ്പുകാർക്ക്​ നാണമില്ലേയെന്നാണ്​ കങ്കണ ചോദിക്കുന്നത്​.

ആരുടെയെങ്കിലും ചോർന്ന സ്വകാര്യ ചാറ്റുകൾ വായിച്ച്​ അത്​ പ്രചരിപ്പിക്കുന്നത്​ ധാർമ്മിക മൂല്യങ്ങൾക്ക്​ നിരക്കാത്തതാണെന്നും അവർ ട്വിറ്ററിൽ കുറിച്ചു. 'ഇന്നുവരെ ആരുടെയെങ്കിലും ചോർന്ന സ്വകാര്യ ചാറ്റുകൾ, കത്തുകൾ, മെയിലുകൾ, ചിത്രങ്ങൾ, വീഡിയോകൾ എന്നിവ കാണാൻ ഞാൻ ധൈര്യപ്പെട്ടിട്ടില്ല. ഇത് ധാർമ്മിക മൂല്യങ്ങൾ, സ്വഭാവം, ആത്മാഭിമാനം എന്നിവയുമായി ബന്ധപ്പെട്ട വിഷയമാണ്​. ലിബറലുകൾക്ക്​ ഇത്​ മനസ്സിലാകില്ല'-കങ്കണ ട്വിറ്ററിൽ കുറിച്ചു.

'നിങ്ങൾക്ക് കൂടുതൽ ഗോസിപ്പ് വേണോ? എന്തുകൊണ്ടാണ് ഹൃതിക് ഇത് പറഞ്ഞത്, എന്തുകൊണ്ടാണ് ബന്ധം തകർന്നത്, ഹൃതിക് ചങ്ങാതിയായ ശേഷം അർണബ്​ എന്‍റെ സുഹൃത്തായത് എങ്ങനെ? ഈ ലിബറലുകളും ഗോസിപ്പ് പ്രചാരകരും രാജ്യത്തിന്‍റെ അന്തരീക്ഷം നശിപ്പിച്ചു. മറ്റുള്ളവരുടെ ചാറ്റുകളും ഇമെയിലുകളും വായിക്കുന്നത് നിർത്തുക'-മറ്റൊരു ട്വീറ്റിൽ അവർ കുറിച്ചു. കങ്കണക്ക്​ ഇറോ​ട്ടോമാനിയ ആണെന്നാണ്​ അർണബ്​ ചാറ്റുകളിൽ പറഞ്ഞത്​.

ഒരു വ്യക്​തി തന്നെ ആരെങ്കിലും സ്​നേഹിക്കുന്നുണ്ടെന്ന്​ ഉറച്ച്​ വിശ്വസിക്കുകയും അയാൾ അത്​ അറിയാതിരിക്കുകയും ചെയ്യുന്ന അവസ്​ഥയാണ്​ ഇറോ​ട്ടോ മാനിയ. ചിലപ്പോൾ നാം ഒരിക്കലും കണ്ടിട്ടില്ലാത്ത വ്യക്​തിയായിരിക്കും നമ്മെ സ്​നേഹിക്കുന്നതായി നാം വിശ്വസിച്ചിരിക്കുക. അത്​ ചിലപ്പോൾ രാഷ്ട്രീയക്കാരനെയോ നടനെയോ പോലെ പ്രശസ്തരായിരിക്കാം. രോഗം ബാധിച്ചയാൾ ഒരു പ്രത്യേക വ്യക്​തിയുമായി ഒരു ബന്ധത്തിലാണെന്ന് സ്വയം കരുതുന്നു. അതേപറ്റി അയാൾക്ക്​ വളരെ ഉറപ്പുണ്ടായിരിക്കുകയും ചെയ്യും. അങ്ങിനെയല്ല എന്ന്​ തെളിയിക്കുന്ന വസ്​തുതകൾ രോഗി ഒരിക്കലും അംഗീകരിക്കുകയുമില്ല. വളരെ അപൂർവ്വമായി കാണപ്പെടുന്ന രോഗമാണിത്​. സ്കീസോഫ്രീനിയ അല്ലെങ്കിൽ ബൈപോളാർ ഡിസോർഡർ പോലുള്ള മറ്റ്​ മാനസിക പ്രശ്​നങ്ങളുമായി ഈ രോഗം ബന്ധപ്പെട്ടിരിക്കുന്നു. ഇത് ആഴ്ചകളോ വർഷങ്ങളോ നീണ്ടുനിൽക്കും.