കമ്യൂണിസ്​റ്റ്​ ആശയങ്ങളെ കനയ്യ വഞ്ചിച്ചു –സി.പി.​ഐ

ന്യൂഡല്‍ഹി: വ്യക്തിപരമായ അഭിലാഷങ്ങളാണ് കനയ്യ കുമാറിനെ നയിക്കുന്നതെന്ന് സി.പി.ഐ ജനറൽ സെക്രട്ടറി ഡി. രാജ.​ കമ്യൂണിസ്​റ്റ്​ ആശയങ്ങളേയും പ്രസ്​ഥാനത്തേയും കനയ്യ വഞ്ചിച്ചതായും അദ്ദേഹം പറഞ്ഞു. കനയ്യ കുമാറി​െൻറ കോൺഗ്രസ്​ പ്രവേശനത്തിന്​ പിന്നാലെ പാർട്ടി ആസ്​ഥാനത്ത്​ വിളിച്ച വാർത്തസമ്മേളനത്തിലാണ്​ ഡി. രാജയുടെ പ്രതികരണം.

പാർട്ടിയിൽ ഒരുതരത്തിലുള്ള പ്രശ്​നങ്ങളും കനയ്യ ഉയർത്തിയിരുന്നില്ല. അയാൾ പാർട്ടിയിൽനിന്ന്​ സ്വയം പുറത്തുപോയതാണ്.​ സി.പി.ഐ എന്ന പ്രസ്ഥാനം വ്യക്തിപ്രഭാവത്തില്‍ വിശ്വസിക്കുന്നില്ല. സി.പി.ഐയെ സംബന്ധിച്ച്​ കനയ്യ ഇനി അടഞ്ഞ അധ്യായമാണ്​. പാര്‍ട്ടി തീര്‍ച്ചയായും മറ്റു പരിപാടികളുമായി മുന്നോട്ടുപോകും. കനയ്യ കുമാറി​െന പാർട്ടി പദവികളിൽ നിന്ന്​ പുറത്താക്കിയതായും ഡി. രാജ അറിയിച്ചു.

കോൺ​ഗ്രസ്​ പ്രവേശനത്തിനുമുമ്പ്​ ഇ​​–മെയിൽ വഴി കനയ്യ പാർട്ടിക്ക്​​ രാജിക്കത്ത്​ നൽകി. ആശയപരമായും സംഘടനാപരമായും പാർട്ടിയിൽ മുന്നോട്ടുപോകാനാകില്ലെന്ന്​ രാജിക്കത്തിൽ കനയ്യ പറഞ്ഞു. പട്​ന പാർട്ടി ആസ്​ഥാനത്തെ മുറിയിൽ സ്വന്തം ചെലവില്‍ സ്ഥാപിച്ച എയർ കണ്ടീഷനർ കഴിഞ്ഞ ദിവസം കനയ്യ കുമാർ അഴിച്ചു കൊണ്ടു പോയിരുന്നു.

സ്വന്തംനിലക്ക്​ സ്ഥാപിച്ച എ.സിയാണ് കനയ്യ കൊണ്ടുപോയതെന്നും തന്നോട്​​ അനുമതി ചോദിച്ചിരുന്നതായും സി.പി.ഐ ബിഹാർ സെക്രട്ടറി റാം നരേഷ് പാണ്ഡെ പറഞ്ഞു. കനയ്യ കോൺ​ഗ്രസിൽ ചേരുമെന്ന്​ നേരത്തെ വാർത്തകൾ പുറത്തുവന്നെങ്കിലും സി.പി.ഐ നേതാക്കൾ വിശ്വസിച്ചിരുന്നില്ല. സെപ്റ്റംബർ നാലിനും അഞ്ചിനും ഡൽഹിയിൽ നടന്ന പാർട്ടി ദേശീയ നിർവാഹകസമിതിയിൽ കനയ്യ പങ്കെടുത്തിരുന്നു.