കല്യാൺ സിങ്​: സവർണ പാർട്ടിയെന്ന പേരുദോഷം മാറ്റാൻ ബി.ജെ.പി പ്രയോഗിച്ച ആയുധം, ബാബരി ധ്വംസനത്തിലൂടെ കുപ്രസിദ്ധൻ

ലഖ്​നൗ: മണ്ഡൽ രാഷ്​ട്രീയത്താൽ തിളച്ചുമറിച്ച ഉത്തരേന്ത്യൻ ഭൂമികയിൽ പിന്നാക്ക ജാതിക്കാർ കളംപിടിച്ചു തുടങ്ങിയപ്പോൾ അതിനെ മറികടക്കാൻ ബി.ജെ.പി കണ്ടെത്തിയ മറുമര​ുന്നായിരുന്നു കല്യാൺ സിങ്ങ്​. പിന്നാക്ക ജാതിയായിരുന്ന ലോധി സമുദായത്തിൽ നിന്നുള്ള കല്യാൺ സിങ്ങിനെ ഉയർത്തിക്കാട്ടിയാണ്​ തങ്ങളുടെ സവർണ പ്രതിച്ഛായ മറികടക്കാൻ ബി.ജെ.പി തീവ്രശ്രമം തുടങ്ങിയത്​. യാദവരല്ലാത്ത ഒ.ബി.സി ജാതിക്കാരെ അണി നിരത്തുന്നതിൽ കല്യാൺ സിങ്ങായിരുന്നു ബി.ജെ.പിയുടെ ട്രബിൾ ഷൂട്ടർ. നാഗ്​പൂരിൽ നിന്നുള്ള നിർദേശങ്ങൾക്കൊത്ത്​ സംഘ്​രാഷ്​ട്രീയത്തിന് അനുകൂലമായി​ ഹിന്ദി ഭൂമികയെ ഉഴുതുമറിക്കുന്നതിന്​ കല്യാൺ സിങ്ങ്​ മുഖ്യപങ്കുവഹിച്ചു.

ഉത്തർപ്രദേശിലെ അലിഗഢ്​ ജില്ലയിൽ 1932ൽ ജനിച്ച കല്യാൺ സിങ്​ ചെറുപ്പം മുതലേ ഹിന്ദുത്വരാഷ്​ട്രീയത്തിൽ ആകൃഷ്​ടനായിരുന്നു. 1967ൽ ജനസംഘിന്‍റെ വിലാസത്തിൽ അട്രോലിയിൽ നിയമസഭ അങ്കത്തിനിറങ്ങിയ കല്യാൺ സിങ്​ ആദ്യ തവണതന്നെ വിജയിച്ചുകയറി. തുടർന്ന്​ പത്ത്​ തവണ ഇതേ മണ്ഡലത്തിൽ മത്സരിച്ച കല്യാൺ സിങ്​ ഒൻപത്​ തവണയും വിജയമണഞ്ഞു. 1980ൽ കോൺഗ്രസിന്‍റെ അൻവർ ഖാന്​ മുന്നിൽ അടിയറവ്​ പറഞ്ഞെങ്കിലും 1985ൽ വീണ്ടും വിജശ്രീലാളിതനായി ഹിന്ദുത്വരാഷ്​ട്രീയത്തിന്‍റെ അമരക്കാരിലൊരാളായി മാറി. 1984ൽ ബി.ജെ.പി ഉത്തർപ്രദേശ്​ സംസ്ഥാന പ്രസിഡന്‍റായ കല്യാൺ സിങ്​ 1989ൽ ബി.ജെ.പി നിയമസഭ കക്ഷി നേതാവുമായി.

രാമജന്മഭൂമി പ്രസ്ഥാനം സംഘ്​പരിവാർ കൂടുതൽ സജീവമാക്കിയ 1980കളുടെ അവസാനത്തിലും 1990കളുടെ ആരംഭത്തിലും ബി.ജെ.പിയുടെ മുൻ നിരയിൽ തന്നെ കല്യാൺ സിങ്ങുമുണ്ടായിരുന്നു. രഥയാത്രയാലും അതിനെത്തുടർന്നുള്ള വർഗീയ കലാപങ്ങളാലും ബി.ജെ.പി അധികാരത്തിലേക്കുള്ള വഴികൾ വെട്ടിയപ്പോൾ ഉത്തർപ്രദേശിന്‍റെ ആദ്യ ബി.ജെ.പി മുഖ്യമന്ത്രിയായതും കല്യാൺ സിങ്​ തന്നെ. 1991ലായിരുന്നു അത്​. ബാബരി മസ്​ജിദ്​ ധ്വംസനത്തിനുള്ള പരസ്യ മു​ദ്രാവാക്യങ്ങൾ വി.എച്ച്​.പിയും ബി.ജെ.പിയും മുഴക്കിയപ്പോൾ സ്വാഭാവികമായും ആശങ്കകളുയർന്നിരുന്നു. എന്നാൽ മസ്​ജിദിന്​ ഒരു പരിക്കും ഏൽപ്പിക്കില്ലെന്നും സുരക്ഷിതമാണെന്നും​ സുപ്രീംകോടതിയിൽ അഫിഡവിറ്റ്​ നൽകിയാണ്​ കല്യാൺ സിങ്​ അതിനെ മറികടന്നത്​.

എന്നാൽ 1992 ഡിസംബർ ആറിന്​ കർസേവകർ ആസൂത്രിതമായി ബാബരി മസ്​ജിദ്​ തകർക്കു​േമ്പാൾ അണിയറയിൽ മുഖ്യമന്ത്രിയായ കല്യാൺ സിങ്ങിന്‍റെ കരങ്ങളുമുണ്ടായിരുന്നു​. മസ്​ജിദ്​ തകർത്തതിന്​ പിന്നാലെ കേന്ദ്ര സർക്കാർ രാഷ്​ട്രപതി ഭരണം പ്രഖ്യാപിച്ചപ്പോൾ സിങ്ങിന്‍റെ മുഖ്യമന്ത്രി സ്ഥാനവും തെറിച്ചു. ഇടവേളക്ക്​ ശേഷം 1997ൽ ബി.എസ്​.പിയുമായുള്ള സഖ്യത്തിലൂടെയാണ്​ കല്യാൺ സിങ്​ വീണ്ടും ഉത്തർപ്രദേശ്​​ മുഖ്യമന്ത്രിയാകുന്നത്​. 1999ൽ ബി.​എസ്​.പി പിന്തുണ പിൻവലിച്ചതോ​െട മുഖ്യമന്ത്രി പദം ഒഴിയേണ്ടിവന്നു.

തുടർന്ന്​​ ബി.ജെ.പിയുമായി തെറ്റിപ്പിരിഞ്ഞ്​ രാഷ്​ട്രീയ ക്രാന്തി പാർട്ടിയുണ്ടാക്കുകയും നിയമസഭയിലേക്ക്​ വിജയിച്ച്​ ശക്തി കാണിക്കുകയും ചെയ്​തു. 2004 ബി.ജെ.പിയിലേക്ക്​ തിരിച്ചെത്തിയ സിങ്​ ബുലന്ദ്​ ഷഹർ ലോക്​സഭാംഗമായി. തുടർന്ന്​ 2009 ൽ ബി.ജെ.പിയുമായി വീണ്ടും ഉടക്കി സമാജ്​ വാദി പാർട്ടിയോട്​ ചാഞ്ഞു. പ്രചാരണത്തിനും ഇറങ്ങി. എന്നാൽ ഇത് തെരഞ്ഞെടുപ്പിൽ​ സമാജ്​വാദി പാർട്ടിയുടെ മുസ്​ലിംവോട്ടുകൾ നഷ്​ടമാക്കിയെന്ന്​ മുലായം സിങ്​ യാദവിന്​​ തന്നെ തുറന്നുപറയേണ്ടിവന്നു.

തുടർന്ന്​ 2010ൽ ഹിന്ദുത്വ ആശയമുള്ള ജൻക്രാന്തി പാർട്ടി രൂപീകരിച്ചു ബി.ജെ.പിക്ക്​ ബദലാകാൻ ശ്രമിച്ചു. അതും അധികം നീണ്ടില്ല.​ 2014ൽ പാർട്ടിയെ ബി.ജെ.പിയിൽ ലയിപ്പിച്ച ശേഷം​ ദേശീയ ഉപാധ്യക്ഷനായി വാണു. ശിഷ്​ട കാലം മോദി സ്​തുതികളുമായി നീക്കി. 2014ൽ​ രാജസ്ഥാൻ ഗവർണറായി നിയമിതനായ അദ്ദേഹം 2019ൽ കാലാവധി അവസാനിക്കും വരെ പദവി വഹിച്ചു. ബാബരി മസ്ജിദ് തകർത്ത കേസിൽ ക്രിമിനൽ ഗൂഢാലോചനക്ക് എൽ.കെ. അദ്വാനി അടക്കമുള്ളവർ വിചാരണ നേരിടു​േമ്പാൾ കൂട്ടുപ്രതിയായ കല്യാൺ സിങ്ങിന് രാജസ്ഥാൻ ഗവർണറായതിനാൽ ഭരണഘടന പദവിയുടെ താൽക്കാലിക തണൽ ലഭിച്ചിരുന്നു. 2020 സെപ്​തംബറിൽ ബാബരി ധ്വംസന ഗൂഢാലോചനക്കേസിൽ 32 പേരെ സി.ബി.ഐ കോടതി ​െവറുതെവിടു​േമ്പാൾ രക്ഷപ്പെട്ടവരിൽ കല്യാൺ സിങ്ങുമുണ്ടായിരുന്നു. തനിക്കിനി സമാധാനപരമായി മരിക്കാമെന്നായിരുന്നു അന്ന്​ സിങ്ങിന്‍റെ പ്രതികരണം.