ജസ്റ്റിസ്​ നാനാവതി അന്തരിച്ചു

ന്യൂഡൽഹി: ഗുജറാത്ത്​ കലാപവും സിഖ്​ കൂട്ടക്കൊലയും അന്വേഷിച്ച സുപ്രിം കോടതി മുൻ ജഡ്​ജി ജസ്റ്റിസ്​ ഗിരീഷ്​ താക്കൂർലാൽ നാനാവതി അന്തരിച്ചു. 86 വയസ്സായിരുന്നു. ഹൃദയാഘാതത്തെ തുടർന്ന്​ ശനിയാഴ്ച ഉച്ചക്ക്​ അഹമ്മദാബാദിലായിരുന്നു മരണം. വൈകുന്നേരത്തോടെ സംസ്​കാരം നടന്നു.

1935 ഫെബ്രുവരി 17ന്​ ഗുജറാത്തിലെ ഭറൂച്ചിൽ ജനിച്ചു. 1958ൽ​ ബോംബെ ഹൈകോടതിയിൽ അഭിഭാഷകനായി. 1979 ജൂലൈയിൽ ഗുജറാത്ത്​ ഹൈകോടതിയിൽ സ്ഥിര ജഡ്​ജി ആയി നിയമിതനായി.

2002 ലെ ഗോധ്രയിലെ ട്രെയിൻ തീവെപ്പു​ം തുടർന്ന​്​ നടന്ന ഗുജറാത്ത്​ കലാപവും നാനാവതി അന്വേഷിച്ചത് ജസ്റ്റിസ്​ അക്ഷയ്​ മേഹ്​ത്തക്കൊപ്പമായിരുന്നു​. ഗുജറാത്തിലെ നരേന്ദ്ര മോദി സർക്കാരാണ്​ രണ്ടംഗ ജുഡീഷ്യൽ കമീഷനെ നിയമിച്ചത്​. കലാപ സമയത്ത്​ മുഖ്യമ​ന്ത്രി ആയിരുന്ന മോദിക്കും മന്ത്രിസഭാംഗങ്ങൾക്ക​ും പൊലീസിനും കമീഷൻ ക്ലീൻ ചിറ്റ്​ നൽകുകയായിരുന്നു.

2000ൽ എൻ.ഡി.എ സർക്കാറാണ്​ 1984 ലെ സിഖ്​ കൂട്ടക്കൊല അന്വേഷിക്കാൻ നാനാവതിയെ നിയോഗിച്ചത്​. കോൺഗ്രസ്​ നേതാക്കളായിരുന്ന സജ്ജൻകുമാറിനും ജഗദീഷ്​ ടൈറ്റ്​ലർക്കുമെതിരെ റിപ്പോർട്ടിൽ ഗുരുതരമായ കുറ്റപ്പെടുത്തലുകളുണ്ടായിരുന്നു.

പിന്നീട്, 1993 ഡിസംബറിൽ ഒഡീഷ ഹൈകോടതിയിലേക്ക് സ്ഥലംമാറ്റം. 1994 ജനുവരിയിൽ ഒഡീഷ ഹൈകോടതിയിൽ ചീഫ്​ ജസ്റ്റിസായി. അടുത്ത വർഷം മാർച്ചിൽ സുപ്രിംകോടതി ജഡ്​ജിയായി. ​2000 ഫെബ്രുവരി 16ന് വിരമിച്ചു.