ട്രെയിനിൽ ആൾ​ക്കൂട്ടം കൊന്ന ജുനൈദിന്​ നീതി തേടി കുടുംബത്തിന്‍റെ കാത്തിരിപ്പിന്​ നാലു വർഷം

ന്യൂഡൽഹി: യു.പിയിലെ മഥുരയിലേക്കുള്ള ട്രെയിനിൽ ഗോരക്ഷക ഗുണ്ടകൾ 15കാരനായ ജുനൈദ് ​ഖാൻ എന്ന പാവം ബാലനെ അടിച്ചും കുത്തിയും അരു​ംകൊല ചെയ്​തിട്ട്​ നാലു വർഷം തികഞ്ഞെങ്കിലും നീതി പുലരുമെന്ന പ്രതീക്ഷയിൽ കുടുംബത്തിന്‍റെ കാത്തിരിപ്പിന്​ ഇനിയും വഴികൾ തുറന്നില്ല. ഇന്ന​െല സംഭവിച്ചെന്ന പോലെ വീട്ടുകോലായിൽ വിതുമ്പലടക്കാനാകാതെ മാതാവ്​ സെയ്​റാ ബാനു കാത്തിരിപ്പ്​ തുടരുകയാണ്​.

നാലു വർഷം മു​മ്പ്​ ജൂൺ 22നായിരുന്നു അവൻ സഹോദരനും രണ്ട്​ സുഹൃത്തുക്കൾ​ക്കുമൊപ്പം അവശ്യ വസ്​തുക്കൾ വാങ്ങാനായി പുറപ്പെട്ടത്​. ട്രെയിനിൽ കയറിയ അവനും സുഹൃത്തുക്കൾക്കുമരികെ എത്തിയ ഗോരക്ഷക ഗുണ്ടകൾ ആദ്യം ചെറുതായി തുടങ്ങി അടിയും തൊഴിയും പിന്നെ കത്തികൊണ്ടുള്ള ആ​ക്രമണവുമായി ഒടുവിൽ ജുനൈദിന്‍റെ ജീവനെടുത്താണ്​ മടങ്ങിയത്​. മാരകമായി കുത്തിപ്പരിക്കേൽപിച്ച സംഘം പാവം ബാലനെ ട്രെയിനിൽനിന്ന്​ പുറത്തെറിയുകയും ചെയ്​തു.

പഠനാവശ്യവുമായി ദൂരങ്ങളിലായിരുന്ന മക്കൾ പെരുന്നാൾ അവധിക്ക്​ നാട്ടിലെത്തിയതിനാൽ സന്തോഷം കുളിച്ചുനിന്ന വീട്ടിൽ കടുത്ത വേദന വിരുന്നെത്താൻ ഏറെ വേണ്ടിവന്നില്ല. റമസാൻ അവസാന നാളുകളിലൊന്നിൽ നോമ്പുതുറയോടടുത്ത സമയത്തായിരുന്നു മകന്‍റെ വിയോഗമറിയിച്ച്​ വിളിയെത്തിയത്​.

പിന്നീട്​ എല്ലാം വേദനകളായിരുന്നു. ദിവസങ്ങൾ കഴിഞ്ഞ്​ ഹൃദയാഘാതം വന്ന പിതാവ്​ ആശുപത്രിയിലായി. രണ്ട്​ സ്​ന്‍റെന്‍റുകളുമായി പഴയ ജീവിതത്തിന്‍റെ നിഴലാണിപ്പോൾ പിതാവ്​. സംഭവവുമായി ബന്ധപ്പെട്ട്​ ആറു പേർ അറസ്റ്റിലായിരുന്നു. ഇവർ പിന്നീട്​ ജാമ്യം നേടി പുറത്തിറങ്ങി.

സംഭവത്തെക്കുറിച്ച്​ സി.ബി.​െഎ അന്വേഷിക്കണമെന്ന കുടുംബത്തി​​​െൻറ ഹരജി പഞ്ചാബ്​-ഹരിയാന ഹൈകോടതി തള്ളി. പൊലീസ്​ അന്വേഷണം ശരിയായ ദിശയിലാണെന്നും അന്വേഷണത്തിൽ ഗുരുതര താളപ്പിഴകളുണ്ടെന്ന്​ തെളിയിക്കാൻ പരാതിക്കാർക്ക്​ കഴിഞ്ഞില്ലെന്നും​ ചൂണ്ടിക്കാണിച്ചായിരുന്നു​ ജസ്​റ്റിസ്​ രാജൻ ഗുപ്​തയുടെ ​ബെഞ്ച്​ ഹരജി തള്ളിയത്​. ജൂണിൽ നടന്ന ആൾക്കൂട്ട കൊല സംബന്ധിച്ച്​ ഫരീദാബാദ്​ വിചാരണ കോടതിയിൽ കുറ്റപത്രം സമർപ്പിച്ചു കഴിഞ്ഞതിനാൽ കേസ്​ ഏറ്റെടുക്കാൻ കഴിയില്ലെന്ന്​ ഇൗ മാസാദ്യം സി.ബി.​െഎ ഹൈകോടതിയെ അറിയിച്ചിരുന്നു.

കേസിൽ വാദം കേൾക്കൽ കോവിഡിൽ മുടങ്ങി. വിഷയം കോടതിക്കു പുറത്ത്​ പരിഹരിക്കാൻ പഞ്ചായത്ത്​ ഇടപെട്ടതായും വാർത്തകൾ വന്നു. വേദികൾ പങ്കിട്ടും നാട്ടിൽ വർഗീയത പ്രചരിപ്പിച്ചും പ്രതികൾ ഇ​േപ്പാഴും സജീവമായതോടെ തന്‍റെ കുട്ടികളെ ഇപ്പോൾ പുറത്തുവിടാറില്ലെന്ന്​ മാതാവ്​ സെയ്​റ ബാനു പറയുന്നു.

പുറത്തിറങ്ങേണ്ടിവന്നാൽ പോലും ട്രെയിൻ യാത്രകൾ അരുതെന്ന്​ പ്രത്യേകം നിഷ്​കർഷിക്കാറുണ്ട്​. മതപഠന മേഖലയിലായിട്ടും പാരമ്പര്യ വേഷങ്ങൾ വിട്ട്​ മറ്റു വസ്​ത്രങ്ങളേ അണിയൂ. അതേ സമയം, അതുപോലും ഫലം ചെയ്യാറില്ലെന്ന്​ ജുനൈദിന്‍റെ മൂത്ത സഹോദരൻ ഖാസിം പറയുന്നു. ഒരിക്കൽ ജോലി തേടി ചെന്നപ്പോൾ പേരു പറഞ്ഞതും മുസ്​ലിംകളെ ജോലിക്കെടുക്കാറില്ലെന്നായിരുന്നു മറുപടിയെന്ന്​ ഖാസിം.

നീതിയുടെ വാതിലുകൾ അടഞ്ഞുകിടപ്പാണെങ്കിലും ജുനൈദിന്​ നീതി തേടി പോരാട്ടം കനപ്പിക്കാൻ തന്നെയാണ്​ കുടുംബത്തിന്‍റെ തീരുമാനം.