മീ ടൂ: ഒന്നും ഓർക്കുന്നില്ലെന്ന് എം.ജെ. അക്​ബർ കോടതിയിൽ

ന്യൂഡൽഹി: ‘മീ ടൂ’ വെളിപ്പെടുത്തലിലൂടെ മാധ്യമപ്രവർത്തക പ്രിയ രമണി നൽകിയ പരാതിയിൽ മുൻ കേന്ദ്രമന്ത്രി എം.ജെ. അക്​ബറി​​െൻറ മൊഴി ഡൽഹി കോടതി രേഖപ്പെടുത്തി. കോടതിമുറിയെ അത്യധികം ചൂടുപിടിപ്പിച്ച്​ രണ്ടു മണിക്കൂറോളം നാടകീയ സംഭവങ്ങൾ അരങ്ങേറി. പ്രിയ രമണി നൽകിയ മാനനഷ്​ട കേസിൽ അക്​ബറിനെ എതിർഭാഗം വിസ്​തരിച്ചു. രമണി ഉന്നയിച്ച കാര്യങ്ങൾ വഞ്ചനപരവും അപകീർത്തിപരവുമാണെന്ന്​​ അഡീഷനൽ ചീഫ്​ മെട്രോപൊളിറ്റൻ മജിസ്​ട്രേറ്റ്​ സമർ വിശാൽ മുമ്പാകെ അക്​ബർ ഉന്നയിച്ചു.

രമണിക്കുവേണ്ടി ഹാജരായ മുതിർന്ന അഭിഭാഷക റബേക്ക ജോൺ ആണ്​ അക്​ബറിനെ വിസ്​തരിച്ചത്​. ‘ദ ഏഷ്യൻ ഏജി’ൽ രമണി തൊഴിലിൽ കയറിയപ്പോഴുള്ള വിശദാംശങ്ങളാണ്​ ഇവർ തേടിയത്​. എന്നാൽ, തനിക്കൊന്നും ഓർമയില്ല എന്നായിരുന്നു മിക്ക ചോദ്യങ്ങൾക്കും അക്​ബറി​​െൻറ മറുപടി.

രാജ്യത്ത്​ അലയടിച്ച ‘മീ ടൂ’ കാമ്പയിനിലൂടെ രമണി വെളിപ്പെടുത്തിയ കാര്യങ്ങൾ വൻ വിവാദമായതിനെ തുടർന്ന്​ കഴിഞ്ഞ ഒക്​ടോബർ 17ന്​ കേന്ദ്രമ​ന്ത്രി പദവി രാജിവെക്കാൻ അക്​ബർ നിർബന്ധിതനായി. മാധ്യമപ്രവർത്തകയായിരിക്കെ 20 വർഷം​ മുമ്പ്​ അക്​ബർ ലൈംഗികോ​ദ്ദേശ്യത്തോടെ പെരുമാറിയെന്നായിരുന്നു ഇവരുടെ വെളിപ്പെടുത്തൽ. കേസ്​ അടുത്ത വാദംകേൾക്കലിനായി കോടതി ഇൗ മാസം​ 20ലേക്ക്​ മാറ്റി.