മുസ്​ലിം, ദലിത്​ ആക്രമണത്തിനെതിരെ പ്രതിഷേധത്തിന്​ ആഹ്വാനം; ആകാർ പ​ട്ടേലിൻെറ ട്വിറ്റർ അക്കൗണ്ട്​ പൂട്ടിച്ചു

ന്യൂഡൽഹി: മുസ്​ലിം, ദലിത്​ വിഭാഗങ്ങൾക്ക്​ നേരെ നടക്കുന്ന ആക്രമണത്തിനെതിരെ പ്രതിഷേധിക്കാൻ ആഹ്വാനം ചെയ്​ത മാധ്യമപ്രവർത്തകനും മനുഷ്യാവകാശ പ്രവർത്തകനും ആംനസ്​റ്റി ഇന്ത്യ മുൻ തലവനുമായ ആകാർ പ​ട്ടേലിൻെറ ട്വിറ്റർ അക്കൗണ്ട്​ ഇന്ത്യയി​ൽ സസ്​പെൻഡ്​ ചെയ്​തു. ആഫ്രോ അമേരിക്കൻ വംശജനായ ജോർജ്​ ​ഫ്ലോയിഡിനെ അമേരിക്കൻ പൊലീസ്​ കൊലപ്പെടുത്തിയതിനെതിരെ നടക്കുന്ന പ്രക്ഷോഭങ്ങൾക്ക്​ സമാനമായി ഇന്ത്യക്കാരോട്​ ​പ്രതിഷേധിക്കാൻ ആഹ്വാനം ചെയ്​ത്​ കുറിപ്പ്​ പോസ്​റ്റ്​ ചെയ്​തതിനാണ്​ നടപടി. ട്വിറ്റർ അക്കൗണ്ട്​ റദ്ദാക്കിയതിനൊപ്പം കലാപത്തിന്​ ആഹ്വാനം ചെയ്യൽ​ ഉൾപ്പെടെ​ വിവിധ വകുപ്പുകൾ ചുമത്തി ഇദ്ദേഹത്തിനെതിരെ ബംഗളൂരു ​പൊലീസ്​ കേസെടുത്തു.

ഇന്ത്യൻ നിയമത്തിന്​ എതിരാണെന്ന്​ ചൂണ്ടിക്കാട്ടിയാണ്​ ട്വിറ്റർ അക്കൗണ്ട്​ റദ്ദാക്കിയത്​. അതേസമയം ഇന്ത്യക്ക്​ പുറത്ത്​ ആകാർ പ​ട്ടേലിൻെറ ട്വിറ്റർ അക്കൗണ്ട്​ ഉപയോഗിക്കാനാകും. അധികാരികൾ ആവശ്യപ്പെട്ടതിനെ തുടർന്നാണ്​ അക്കൗണ്ട്​ റദ്ദാക്കിയതെന്ന്​ ട്വിറ്റർ വിശദീകരിച്ചു. 

അതേസമയം ട്വിറ്റർ അക്കൗണ്ട്​ ​ബ്ലോക്ക്​ ചെയ്​തതിനെതിരെ ആകാർ പ​ട്ടേൽ രംഗത്തെത്തി. സാമൂഹികമാധ്യമങ്ങൾ സുതാര്യതയുളളവയാകണം. അക്കൗണ്ട്​ ​​റദ്ദാക്കുന്നതും അതിൻെറ കാരണവും അക്കൗണ്ട്​ ഉടമയെ അറിയിക്കുകയെങ്കിലും ചെയ്യണം. ഇത്തരത്തിൽ യാതൊരു വിവരവും തനിക്ക്​ ഇതുവരെ ലഭിച്ചിട്ടില്ല -അദ്ദേഹം പറഞ്ഞു.

ജോർജ്​ ഫ്ലോയി​ഡിൻെറ കൊലപാതകത്തിനെതിരെ നടക്കുന്ന പ്രതിഷേധത്തിൻെറ വിഡിയോക്കൊപ്പം രാജ്യത്ത്​ മുസ്​ലിം, ദലിത്​, ആദിവാസി, സ്​ത്രീകൾ എന്നിവർക്കെതിരെ നടക്കുന്ന അതിക്രമത്തിൽ ഇന്ത്യക്കാരോട്​ പ്രതിഷേധത്തിന്​ ആഹ്വാനം ചെയ്​തുകൊണ്ടുള്ളതായിരുന്നു പോസ്​റ്റ്​. 

വർഷങ്ങളായി നിലനിൽക്കുന്ന വിവേചനത്തിനെതിരായ പോരാട്ടങ്ങൾക്കാണ്​ അമേരിക്ക വേദിയാകുന്നത്​​. ​കറുത്തവർഗക്കാരോ​ടുള്ള ക്രൂരതക്കെതി​രായി സമാനതകളില്ലാത്ത പ്രതിഷേധത്തിനാണ്​ അമേരിക്ക സാക്ഷ്യം വഹിക്കുന്നത്​. അമേരിക്കക്ക്​ പിന്നാലെ മറ്റു രാജ്യങ്ങളിലും വിവിധ വിഭാഗങ്ങൾക്കെതിരായ പ്രതിഷേധവുമായി ജനങ്ങൾ രംഗത്തെത്തി. ഇന്ത്യയിൽ മുസ്​ലിം, ദളിത്​, ആദിവാസി, സ്​ത്രീ വിഭാഗങ്ങൾക്കെതിരെ നടക്കുന്ന അതിക്രമത്തിൽ പ്രതിഷേധിച്ച്​ സാമൂഹമാധ്യമങ്ങളിൽ കാമ്പയിൻ തുടങ്ങികഴിഞ്ഞു​.