തീവ്രവാദം നേരിടാൻ സംയുക്​ത ശ്രമം വേണം -ഷാങ്ഹായ് ഉച്ചകോടിയില്‍ മോദി

ന്യൂഡല്‍ഹി: തീവ്രവാദത്തിനും മൗലികവാദത്തിനുമെതിരെ ലോകരാജ്യങ്ങള്‍ ഒരുമിച്ച്​ പ്രവര്‍ത്തിക്കണമെന്ന് പ്രധാനമന്ത്രി നരേന്ദ്രമോദി. അഫ്ഗാനിസ്​താനിലെ സാഹചര്യങ്ങള്‍ ലോകം ഇന്ന് നേരിടുന്ന വെല്ലുവിളികള്‍ എന്തൊക്കെയാണെന്ന് തെളിയിക്കുന്നുവെന്നും അദ്ദേഹം പറഞ്ഞു. താജിക്കിസ്​ഥാനിലെ ദുഷാൻബേയിൽ ഷാങ്ഹായ് സഹകരണ സംഘടന ഉച്ചകോടിയില്‍ വെർച്വലായി പ​ങ്കെടുത്ത്​ സംസാരിക്കുകയായിരുന്നു മോദി.

പുരോഗമന സംസ്‌കാരങ്ങളുടെ കോട്ടയാണ് മധ്യേഷ്യ. തീവ്രവാദത്തിനെതിരായ പോരാട്ടത്തിന് പ്രചോദനം നല്‍കുന്നതില്‍ ഈ മേഖലയ്ക്ക് ചരിത്രപരമായ പങ്കുണ്ട്. എന്നാല്‍ മേഖലയുടെ സാമ്പത്തിക പുരോഗതിയെ മൗലികവാദവും തീവ്രവാദവും ബാധിച്ചു. മധ്യേഷ്യയിലെ പുരോഗമന മൂല്യങ്ങളും സഹിഷ്ണുതയും വീണ്ടെടുക്കണം. യുവാക്കളെ മൗലികവാദത്തിലേക്ക് വഴിതിരിച്ചുവിടാതെ ആധുനിക സാങ്കേതികവിദ്യ പരിചയപ്പെടുത്തണം. ശാസ്ത്രവും യുക്തിചിന്തയും പ്രോത്സാഹിപ്പിക്കണം- മോദി പറഞ്ഞു. പാകിസ്താന്‍ പ്രധാനമന്ത്രി ഇംറാൻ ഖാ​െൻറ സാന്നിധ്യത്തിലാണ് പ്രധാനമന്ത്രി സംസാരിച്ചത്​. രാജ്യങ്ങളെ തമ്മില്‍ ചേര്‍ക്കുന്ന പദ്ധതികള്‍ അഖണ്ഡതയെ ബാധിക്കരുതെന്ന് ചൈന-പാകിസ്താന്‍ സാമ്പത്തിക ഇടനാഴിയെ പരോക്ഷമായി സൂചിപ്പിച്ച്​ പ്രധാനമന്ത്രി പറഞ്ഞു. കസാഖ്​സ്ഥാന്‍, കിര്‍ഗിസ്ഥാന്‍, റഷ്യ, താജിക്കിസ്ഥാന്‍, ഉസ്ബക്കിസ്ഥാന്‍, ഇന്ത്യ, പാകിസ്താന്‍, അഫ്ഗാനിസ്താന്‍, ബെലാറസ്, മംഗോളിയ എന്നിവയാണ് ഉച്ചകോടിയിലെ നിരീക്ഷണ പദവിയുള്ള രാജ്യങ്ങള്‍. ഇരുപതാം സഹകരണ ഉച്ചകോടിയില്‍ ഇറാനും പുതിയ അംഗമായി ചേര്‍ന്നിട്ടുണ്ട്.

അതിനിടെ, ദുഷാൻബെയിൽ ഇന്ത്യയുടെ വിദേശകാര്യമന്ത്രി എസ്​. ജയശങ്കറും ചൈനീസ്​ വിദേശകാര്യ മന്ത്രി വാങ്​യിയും ചർച്ച നടത്തി. ഇന്ത്യ-ചൈന ബന്ധത്തെ ആശ്രയിച്ചാണ്​ ഏഷ്യൻ ഐകദാർഡ്യം രൂപപ്പെടുകയെന്ന്​ ജയശങ്കർ വാങ്​യിയോട്​ പറഞ്ഞു. ഇന്ത്യ ഒരിക്കലും സംഘർഷ നാഗരികതയെ ഉൾക്കൊണ്ടിട്ടില്ലെന്നും അതിർത്തിയിൽ നിന്നുള്ള പിൻമാറ്റം പൂർണമായാലേ സമാധാനം കൈവരിക്കാൻ കഴിയൂയെന്നും ജയശങ്കർ പറഞ്ഞു.