രാമനവമിദിനത്തിൽ മാംസാഹാരം വിലക്കിയെന്ന് ജെ.എൻ.യു ഹോസ്റ്റൽ വാർഡൻ

ന്യൂഡൽഹി: രാമനവമിദിനമായ ഞായറാഴ്ച​ ജെ.എൻ.യു ഹോസ്റ്റൽ കാന്‍റീനിൽ സസ്യാഹാരം മാത്രം മതിയെന്ന് നിർദേശം നൽകിയിരുന്നതായി വാർഡൻ ഗോപാൽ റാം. വിദ്യാർഥി​​ മെസ്​ സെക്രട്ടറിക്കാണ്​​ ചിക്കൻ ഒഴിവാക്കാൻ നിർദേശം നൽകിയത്​. എന്നാൽ, 300 കുട്ടികളിൽ 180ഓളം പേർ മാംസം കഴിക്കുന്നവരാണെന്നും ഒഴിവാക്കണമെങ്കിൽ എഴുതി നൽകണമെന്നും മെസ്​ സെക്രട്ടറി ആവശ്യപ്പെട്ടെങ്കിലും ഇതിന് വാർഡൻ തയാറായില്ല. അതിനിടെ, കാന്‍റീനിലേക്ക്​ ചിക്കൻ കൊണ്ടുവന്ന വ്യാപാരിയെ എ.ബി.വി.പി പ്രവർത്തകർ തടഞ്ഞ് തിരിച്ചയക്കുന്ന വിഡിയോ പുറത്തുവന്നു. രാമനവമി പൂജ തടസ്സപ്പെടുത്തിയതിനാലാണ് സംഘർഷമുണ്ടായതെന്ന് എ.ബി.വി.പി പ്രചരിപ്പിക്കുന്നതിനിടെയാണിത്. കാവേരി ഹോസ്റ്റലിൽ നടന്ന പൂജയിൽ താൻ പ​ങ്കെടുത്തിരുന്നുവെന്നും പൂജ ആരും തടസ്സപ്പെടുത്തിയിട്ടില്ലെന്നും കാവേരി ഹോസ്റ്റൽ പ്രസിഡന്‍റും എൻ.എസ്​.യു ഭാരവാഹിയുമായ നവീൻകുമാർ പറഞ്ഞത് എ.ബി.വി.പിക്ക്​​ തിരിച്ചടിയായി.

കാമ്പസ് സംഘർഷത്തിൽ ജെ.എൻ.യു അധികൃതരോട്​ കേന്ദ്ര വിദ്യാഭ്യാസ മന്ത്രാലയം റിപ്പോർട്ട്​ തേടി. സംഭവത്തിൽ ജാമിഅ മില്ലിയ വിദ്യാർഥികൾ പ്രതിഷേധിച്ചു. ജാമിഅ കാമ്പസിന്‍റെ എട്ടാം നമ്പർ ​ഗേറ്റിനു​ മുന്നിൽ നടന്ന പ്രതിഷേധ സംഗമത്തിൽ നിരവധി വിദ്യാർഥികൾ പ​ങ്കെടുത്തു. എ.ബി.വി.പി ആക്രമണത്തിൽ 16ഓളം വിദ്യാർഥികൾക്കാണ്​ പരിക്കേറ്റത്​.

ചിക്കൻ വിളമ്പുന്നതുമായി ബന്ധപ്പെട്ട സംഘർഷമുണ്ടായതിന്‍റെ തലേ ദിവസമാണ്​ എ.ബി.വി.പിയുടെ മാംസ'നിരോധന'ത്തിന്​ വാർഡന്‍റെ പിന്തുണയുണ്ടായത്​. എന്നാൽ, സംഘർഷം ഒഴിവാക്കാൻ നിർദേശം നൽകുക മാത്രമാണുണ്ടായതെന്നാണ്​ വാർഡന്‍റെ വിശദീകരണം.