ജമ്മു-കശ്​മീർ നിയമസഭ ഗവർണർ പിരിച്ചുവിട്ടു

ശ്രീനഗർ: ജമ്മു-കശ്​മീരിൽ സർക്കാർ രൂപീകരണത്തിനുള്ള നടപടികൾ പുരോഗമിക്കുന്നതിനിടെ ഗവർണർ സത്യപാൽ സിങ്​ നിയമസഭ പിരിച്ചുവിട്ടു. മുൻമുഖ്യമന്ത്രിയും പി.ഡി.പി നേതാവുമായ മെഹബൂബ മുഫ്​തി കോൺഗ്രസി​​​​​​​െൻറയും നാഷനൽ കോൺഫറൻസി​​​​​​​െൻറയും പിന്തുണയോടെ സർക്കാർ രൂപവത്​കരിക്കാൻ അവകാശവാദമുന്നയിച്ചതിനു പിന്നാലെ പീപ്പിൾസ്​ കോൺഫറൻസ്​ നേതാവ്​ സജ്ജാദ്​ ലോണും സർക്കാറിന്​ അവകാശവാദം ഉന്നയിച്ചതോടെയാണ്​ ഗവർണറുടെ ഭാഗത്തുനിന്ന്​ നാടകീയ നീക്കമുണ്ടായത്​. ഭരണഘടന വകുപ്പുകൾപ്രകാരം നിക്ഷിപ്​തമായ അധികാരം ഉപയോഗിച്ചാണ്​ നിയമസഭ പിരിച്ചുവിടുന്നതെന്ന്​ ഗവർണർ ഒൗദ്യോഗിക വാർത്തക്കുറിപ്പിൽ അറിയിച്ചു. ഇതോടെ ഡിസംബർ 18 വരെയുള്ള ഗവർണർ ഭരണത്തി​​​​​​​െൻറ കാലാവധി അവസാനിച്ചാൽ സംസ്​ഥാനത്ത്​ കേന്ദ്രഭരണം നിലവിൽവരും.

ജൂൺ 19നാണ്​ ഗവർണർഭരണം നിലവിൽവന്നത്​. ബി.ജെ.പി പിന്തുണ പിൻവലിച്ചതിനെ തുടർന്നാണ്​ മെഹബൂബ മുഫ്​തിസർക്കാർ രാജി​െവച്ചത്​. അതേസമയം, നിയമസഭ പിരിച്ചുവിട്ടിരുന്നില്ല.ജനാധിപത്യത്തില്‍ സ്വീകാര്യമല്ലാത്ത നടപടിയാണ് ഗവർണർ കൈകൊണ്ടതെന്ന്​ മെഹബൂബ മുഫ്​തി പ്രതികരിച്ചു.​ ബി.ജെ.പിയുടെ ഏകാധിപത്യമാണ് നടന്നതെന്ന് കോണ്‍ഗ്രസ്​ നേതാവ്​ ഗുലാം നബി ആസാദ്​ പറഞ്ഞു.

നിയമസഭ പിരിച്ചുവിട്ട നടപടിക്കെതിരെ കോടതിയെ സമീപിക്കുമെന്ന്​ കോൺഗ്രസും പി.ഡി.പിയും നാഷനൽ​ കോൺഫറൻസും വ്യക്​തമാക്കി. ഗവർണർ നടപ്പാക്കിയത്​ ബി.ജെ.പിയുടെ സ്വേച്ഛാധിപത്യ നയമാണെന്ന്​ കോൺഗ്രസ്​ കുറ്റപ്പെടുത്തി. കശ്​മീരിൽ സുസ്​ഥിര ഭരണം സാധ്യമല്ലെന്നിരിക്കെ എത്രയുംവേഗം തെരഞ്ഞെടുപ്പ്​ നടത്തുകയാണ്​ പോംവഴിയെന്ന്​ ബി.ജെ.പി അഭിപ്രായപ്പെട്ടു.

സർക്കാർ രൂപീകരിക്കാൻ ആവശ്യമുന്നയിച്ച്​ പി.ഡി.പി നേതാവ്​ മെഹബൂബ മുഫ്​തി ഗവർണർക്ക്​​​ കത്ത്​ നൽകിയിരുന്നു. എന്നാൽ കത്തിന്​ മറുപടി ലഭിക്കാത്തതിനെ തുടർന്ന്​ ട്വിറ്ററിൽ കത്ത്​ പോസ്റ്റ്​ ചെയ്യുകയും ചെയ്​തു. അതിനിടെയാണ്​ നിയമസഭ പിരിച്ചുവിട്ടത്​​.

Have been trying to send this letter to Rajbhavan. Strangely the fax is not received. Tried to contact HE Governor on phone. Not available. Hope you see it @jandkgovernor pic.twitter.com/wpsMx6HTa8

— Mehbooba Mufti (@MehboobaMufti) November 21, 2018

നേരത്തെ സർക്കാർ രൂപീകരണത്തിന്​ ശേഷം പി.ഡി.പിയുടെ മുതിർന്ന നേതാവ്​ അൽതാഫ്​ ബുഖാരി മുഖ്യമന്ത്രിയായേക്കുമെന്നും സൂചനയുണ്ടായിരുന്നു​. മുൻ ധനമന്ത്രിയായിരുന്ന ബുഖാരി, നാഷണൽ കോൺഫറൻസ്​ നേതാവ്​ ഉമർ അബ്​ദുല്ലയുമായി കൂടിക്കാഴ്​ച നടത്തിയതായും ദേശീയ മാധ്യമങ്ങൾ റിപ്പോർട്ട്​ ചെയ്​തിരുന്നു.

രണ്ട് നാമനിർദേശ അംഗങ്ങൾ അടക്കം 89 പ്രതിനിധികളുള്ള ജമ്മു കശ്മീർ നിയമസഭയിൽ പി.ഡി.പിക്ക് 28 അംഗങ്ങളാണുള്ളത്. നാഷണൽ കോൺഫറൻസ്-15, കോൺഗ്രസ്- 12, ജെ.കെ.പി.സി-2, സി.പി.എം, ജെ.കെ.പി.ഡി.‌എഫ് എന്നിവർക്ക് ഒന്ന് വീതം, മൂന്ന് സ്വതന്ത്രർ എന്നിവരാണ് മറ്റ് അംഗങ്ങൾ. പി.ഡി.പിയുടെ 28ഉം നാഷണൽ കോൺഫറൻസിന്‍റെ 15ഉം കോൺഗ്രസിന്‍റെ 12ഉം അംഗങ്ങൾ യോജിച്ചാൽ 87 അംഗ നിയമസഭയിൽ ഭൂരിപക്ഷമായ 44 തികക്കാൻ സാധിക്കും.