ഝാർഖണ്ഡ്​:​ ​േസാറൻ 29ന്​​ ചുമതലയേൽക്കും

റാഞ്ചി: തകർപ്പൻ വിജയവുമായി ഭരണകക്ഷിയായ ബി.ജെ.പിയെ നിഷ്​പ്രഭമാക്കിയ ഝാർഖണ്ഡ്​ മുക്തിമോർച്ച- കോൺഗ്രസ്​ സഖ്യം മന്ത്രിസഭ രൂപവത്​കരണത്തിന്​. കോൺഗ്രസ്​, ആർ.ജെ.ഡി നേതാക്കൾക്കൊപ്പം ജെ.എം.എം നിയമസഭ കക്ഷി നേതാവ്​​ ഹേമ​ന്ത്​​ സോറൻ രാജ്​ഭവനിലെത്തി ഗവർണർ ദ്രൗപദി മുർമുവിനെ കണ്ട്​ അവകാശവാദമുന്നയിച്ചു.

ഗവർണർക്കു കൈമാറിയ കത്തിൽ ജെ.എം.എം നയിക്കുന്ന മഹാസഖ്യത്തിന്​ ഝാർഖണ്ഡ്​ വികാസ്​ മോർച്ച പ്രചാതന്ത്രിക്​ (ജെ.വി.എം-പി) പ്രതിനിധികളെക്കൂടി ചേർത്ത്​ 50 അംഗങ്ങളുടെ പിന്തുണ അറിയിച്ചു. സന്ദർശനം ഗവർണറുടെ ഓഫിസ്​ സ്​ഥിരീകരിച്ചിട്ടുണ്ട്​. ഡിസംബർ 29ന്​ ഉച്ചക്ക്​ ഒരു മണിക്ക്​ സോറൻ മുഖ്യമന്ത്രിയായി ചുമതലയേൽക്കുമെന്ന്​ ജെ.എം.എം ജനറൽ സെക്രട്ടറി സുപ്രിയോ ഭട്ടാചാര്യ പറഞ്ഞു.

81 അംഗ സഭയിലേക്ക്​ സംസ്​ഥാന തെരഞ്ഞെടുപ്പിൽ ജെ.എം.എം-കോൺഗ്രസ്​ സഖ്യം 47 സീറ്റ്​ നേടിയിരുന്നു. ജെ.എം.എം 30ഉം കോൺഗ്രസ്​ 16ഉം സീറ്റ്​ ​സ്വന്തമാക്കിയപ്പോൾ ആർ.ജെ.ഡി ഒരു സീറ്റ്​ നേടി. സ്വതന്ത്രമായി മത്സരിച്ച്​ മൂന്നു സീറ്റ്​ നേടിയ ബാബുലാൽ മറാൻഡിയുടെ ജെ.വി.എം-പി ഹേമന്ത്​​ സോറ​ന്​ കഴിഞ്ഞ ദിവസം പിന്തുണ പ്രഖ്യാപിച്ചിരുന്നു