ജെ.ഡി.എസ് വൈസ് പ്രസിഡന്റ് രാജിവെച്ചു; 12 എം.എൽ.എമാർ കോൺഗ്രസുമായി സഹകരിക്കും

ബംഗളൂരു: എൻ.ഡി.എയിൽ ചേർന്നതിൽ പ്രതിഷേധിച്ച് ജെ.ഡി.എസ് മുതിർന്ന നേതാവും സംസ്ഥാന വൈസ് പ്രസിഡന്റുമായ ഷഫീഉല്ല ഖാൻ രാജിവെച്ചു. സംസ്ഥാന പ്രസിഡന്റ് സി.എം. ഇബ്രാഹീമും ഉടൻ രാജിവെക്കു​മെന്നും റിപ്പോർട്ടുണ്ട്. പാർട്ടി വിടുന്ന നേതാക്കൾ ഭാവികാര്യങ്ങൾ ചർച്ച ചെയ്യാൻ ബംഗളൂരുവിൽ യോഗം ചേർന്നു.

12 ജെ.ഡി.എസ് എം.എൽ.എമാർ കോൺഗ്രസുമായി സഹകരിച്ചു പ്രവർത്തിക്കാൻ തീരുമാനിച്ചതായും റിപ്പോർട്ടുണ്ട്. പി.സി.സി അധ്യക്ഷൻ ഡി.കെ. ശിവകുമാർ കുറച്ചു ദിവസങ്ങളായി ​ജെ.ഡി.എസ് എം.എൽ.എമാരുമായി ചർച്ച നടത്തുന്നുണ്ട്.

വെള്ളിയാഴ്ച വൈകീട്ടാണ് എൻ.ഡി.എയിൽ ചേരുന്നതായി ജെ.ഡി.എസ് പ്രഖ്യാപിച്ചത്. ലോക്സഭ തെരഞ്ഞെടുപ്പ് മുന്നിൽ കണ്ടാണ് ജെ.ഡി.എസ് സഖ്യം ചേർന്നത്. കർണാടക നിയമസഭ തെരഞ്ഞെടുപ്പിൽ കനത്ത പരാജയമാണ് ജെ.ഡി.എസ് നേരിട്ടത്.