ജയലളിത മരിച്ചെന്ന് 'വിക്കിപീഡിയ'

ചെന്നൈ: തമിഴ്​നാട്​ മുഖ്യമന്ത്രി ജയലളിത മരിച്ചെന്ന കിംവദന്തിക്ക്​ പിന്നാലെ സ്വതന്ത്ര വിജ്ഞാന കോശമായ വിക്കിപീഡിയയിൽ ജയയുടെ മരണ തീയതിയും. 1948 ഫെബ്രുവരി 24ന്​ ജനിച്ച ജയലളിത 2016 സെപ്​തംബർ 30ന്​മരിച്ചെന്നാണ് വിക്കിപീഡിയയിൽ വന്ന 'പുതിയ വിവരം'. ജയലളിത മരിച്ചതായ വ്യാജവാർത്ത നവമാധ്യമങ്ങളിൽ വ്യാപകമായി പ്രചരിച്ചതിനെ തുടർന്ന്​ കഴിഞ്ഞ ദിവസം രാവിലെ ആറു മണി മുതൽ വൈകിട്ട് നാലു വരെയാണ്​ വിക്കിപീഡിയയിൽ എഡിറ്റിങ് പ്രഹസനം തുടർന്നു കൊണ്ടിരുന്നത്​.​ ചിലർ മരണവിവരം സ്​ഥിരീകരിച്ചിട്ടില്ലെന്ന്​ രേഖപ്പെടുത്തിയപ്പോൾ മറ്റു ചിലർ ഒക്​ടോബർ ഒന്നിന്​ മരിക്കുമെന്ന്​ പ്രതീക്ഷിക്കുന്നതായും തട്ടിവിട്ടു.

ഒാരോ മിനിറ്റിലും എഡിറ്റിങ്​ നടന്നു

 

തമിഴ്​നാട്​ മുഖ്യമന്ത്രിയായ ജയലളിത ജീവിച്ചിരിക്കുന്നതായും നിലവിൽ ആശുപത്രിയിൽ ചികിത്സയിലാണെന്നുമുള്ള വിവരം വിക്കിപീഡിയ അഡ്മിൻ വിഭാഗത്തി​​െൻറ ശ്രദ്ധയിൽ പെടുത്തിയപ്പോഴാണ് തെറ്റായ വിവരം സൈറ്റിൽ നിന്ന് നീക്കം ചെയ്തത്​. സെപ്​തംബർ 22 മുതൽ കടുത്ത പനി ബാധിച്ച്​ചെന്നൈയിലെ അപ്പോളോ ആശുപത്രിയിൽ കഴിയുന്ന ജയലളിതയുടെ ആരോഗ്യനില തൃപ്​തികരമാണെന്നാണ്​ ഡോക്​ടർമാർ അറിയിച്ചിട്ടുള്ളത

കഴിഞ്ഞ മുന്നു ദിവസമായി ആരോഗ്യനില സംബന്ധിച്ച് മെഡിക്കല്‍ ബുള്ളറ്റിന്‍ ആശുപത്രി അധികൃതര്‍ പുറത്തിറക്കാത്തതാണ്​ വ്യാജ പ്രചരണത്തിന്​ വഴിവെച്ചത്​. അടിസ്ഥാന രഹിതമായ വാർത്തകൾ പ്രചരിക്കുന്നത്​ അവസാനിപ്പിക്കാൻ കൃത്യമായ വിവരങ്ങൾ ജനങ്ങളെ ധരിപ്പിക്കണമെന്ന്​ ഡി.എം.കെ അധ്യക്ഷൻ കരുണാനിധിയും തമിഴ്നാട്​ സർക്കാറിനോട്​ ആവശ്യപ്പെട്ടിരുന്നു.